Maana 74nan

Cɛ min tun ma siran

E KA mɔgɔw lajɛ ka yɛlɛ nin kamalennin ma. I b’a dɔn mɔgɔ min don wa? Ala ka kiraba dɔ don min tɔgɔ ye ko Jeremi.

Masakɛ Josiyasi ye boliw halakili daminɛ a ka jamana kɔnɔ tuma min na, a ma mɛn o kɔfɛ, Jehova y’a fɔ Jeremi ye ko a ka kɛ Ale ka kira ye. Jeremi bolo, ale ka dɔgɔ kiraya ma. Nka, Jehova y’a fɔ a ye, ko Ale bɛna a dɛmɛ a ka baara la.

Jeremi y’a fɔ Israɛlkaw ye k’u ka kojugukɛ dabila. A ko: ‘Jamana wɛrɛ mɔgɔw bɛ fɛn minnu bato, olu ye boliw de ye.’ Nka, Israɛlka caman tun ye bolibato fisaya ni Ala lakika ka bato ye. Jeremi y’a fɔ u ye tuma min na ko Ala bɛna u ɲangi u ka kojuguw kosɔn, u yɛlɛla a ma.

San caman tɛmɛna. Josiyasi sara. Kalo saba o kɔfɛ, a denkɛ Jojakim kɛra masakɛ ye. Jeremi tora k’a fɔ mɔgɔw ye ko: ‘Ni aw ma aw ka sirajuguw bila, Jerusalɛm bɛna halaki.’ Sarakalasebagaw ye Jeremi minɛ, ka pɛrɛn a kunna ko: ‘I ka kan ka faga nin ko suguw fɔli la.’ U tilala k’a fɔ Israɛl kuntigiw ye ko: ‘Jeremi ka kan ka faga, bawo a ye kojugu fɔ ka ɲɛsin an ka dugu ma.’

Jeremi bɛna mun kɛ sisan? A ma siran. A y’a fɔ u bɛɛ ye ko: ‘Jehova de ye ne ci ka nin kow fɔ aw ye. Ni aw ma aw ka sirajuguw bila, Jehova bɛna Jerusalɛm halaki. Nka, aw k’a dɔn ko ni aw ye ne faga, aw ye mɔgɔ faga min ma kojugu kɛ.’

Kuntigiw ma Jeremi faga, nka Israɛlkaw ma u ka sirajuguw bila. Kɔfɛ, Nebukadnezar, n’o ye Babilonɛ masakɛ ye, o nana Jerusalɛm kɛlɛ. A laban na, a sera Israɛlkaw la, ka u kɛ a ka jɔnw ye. Nebukadnezar taara ni Israɛlka ba caman ye Babilonɛ. Ni u ye i ta diyagoya la ka taa ni i ye jamana wɛrɛ la, o bɛna kɛ dusukasiba ye i bolo, tiɲɛ tɛ ?

Jeremi 1:​1-8; 10:​1-5; 26:​1-16; 2 Masakɛw 24:​1-17.