Maana 115nan

Alijinɛ kura dugukolo kan

E KA nin jiri janmanjanw lajɛ. Filɛruw fana cɛ ka ɲi kosɛbɛ. Nin kulujanw fana lajɛ. Yala nin yɔrɔ cɛ man ɲi wa? E k’a lajɛ minan bɛ ka dumuni kɛ cogo min na cɛnin tɛgɛ kɔnɔ. E ka warabaw ani sow lajɛ minnu bɛ bin na. Yala i t’a fɛ ka sigi nin yɔrɔ cɛɲi sugu la wa?

Ala b’a fɛ i ka ɲɛnamaya kɛ kudayi alijinɛ kɔnɔ, dugukolo kan yan. Tɔɔrɔ minnu bɛ mɔgɔw kan bi, a t’a fɛ i ka o tɔɔrɔ si sɔrɔ. Mɔgɔ minnu bɛna sigi alijinɛ kura kɔnɔ, Bibulu ye nin layidu ta olu ye ko: ‘Ala na kɛ u fɛ. Saya tɛna kɛ tun wala kasikan wala dimi. Fɛn kɔrɔw tɛmɛna.’

Yesu bɛna fɛɛrɛ tigɛ walasa dugukolo ka yɛlɛma ka ɲɛ nin cogo la. I b’a dɔn o bɛna kɛ tuma min na wa? O bɛna kɛ tuma min na Yesu bɛna kojugu ni mɔgɔjugu bɛɛ bɔ yen. I hakili jigin, Yesu tun bɛ  dugukolo kan tuma min na, a ye bana sugu bɛɛ kɛnɛya, ka suw lakunun yɛrɛ. Yesu tun ye o kow kɛ walisa k’a jira, a bɛna min kɛ dugukolo yɔrɔ bɛɛ la, tuma min na a bɛna kɛ Ala ka masaya masakɛ ye.

E ka miiri a bɛna kɛ dakabanako min ye ka kɛ alijinɛ kura kɔnɔ, dugukolo kan! Yesu ani a ye mɔgɔ minnu sugandi, u bɛna kuntigiya kɛ ɲɔgɔn fɛ sankolo la. O kuntigi ninnu bɛna u mago don dugukolo-kan-mɔgɔw kelen-kelen na walisa bɛɛ lajɛlen ka hɛrɛ sɔrɔ. An k’a lajɛ an ka kan ka min kɛ walisa Ala ka ɲɛnamaya banbali di an ma a ka alijinɛ kura kɔnɔ.

Jirali 21:​3, 4; 5:​9, 10; 14:​1-3.