Yala i diyanyemɔgɔ dɔ sara wa? O dusukasi sugu waati la, laala i bɛ i yɛrɛ ɲininka: ‘Mun bɛ saya kɔfɛ? Yala an bɛna se ka an diyanyemɔgɔ salenw ye tuguni wa?’ Bibulu bɛ dusudonnkɔnɔ jaabi minnu di, olu sɛgɛsɛgɛ nin kalansen ani kalansen nata kɔnɔ.

1. Mun bɛ saya kɔfɛ?

Yesu ye saya ni sunɔgɔba sanga ɲɔgɔn ma. Mun na? Mɔgɔ min bɛ sunɔgɔba la, o tigi tɛ bɔ fɛn foyi kalama min bɛ ka kɛ a lamini na. O cogo kelen na, mɔgɔ salen tɛ fɛn foyi kalama: A tɛ dimin dɔn wa a tɛ tɔɔrɔ cogo si la bilen. Bibulu b’a fɔ ko: “Mɔgɔ salenw tɛ foyi dɔn.”​—Waajulikɛla 9:5 kalan.

2. Ka tiɲɛ dɔn saya ko la mun na o bɛ an dɛmɛ?

Mɔgɔ caman bɛ siran saya ɲɛ, hali dɔw bɛ siran mɔgɔ salenw ɲɛ! Nka Bibulu bɛ min fɔ saya ko la, o bɛ se ka i dusu saalo. Yesu y’a fɔ ko: “Tiɲɛ na aw hɔrɔnya.” (Yuhana 8:32) Diinɛ dɔw b’a fɔ ko ni mɔgɔ sara, fɛn dɔ bɛ to ɲɛnamaya la a kɔ, nka Bibulu tɛ o fɔ. O la, mɔgɔ si tɛ tɔɔrɔ a ka saya kɔfɛ. Ani fana ikomi mɔgɔ salenw tɛ foyi kalama, o la u tɛ se ka ko jugu kɛ an na. O la sa, kun foyi t’a la ka mɔgɔ salenw bato walima ka fɛn dɔw kɛ walasa u kana dimin an kɔrɔ. Kun foyi t’a la fana ka delili kɛ u ye.

Mɔgɔ dɔw b’a fɔ ko olu bɛ se ka kumaɲɔgɔnya kɛ ni mɔgɔ salenw ye. Nka o tɛ se ka kɛ. Iko an bɔra k’a ye cogo min na, mɔgɔ salenw “tɛ foyi dɔn.” Mɔgɔ minnu b’a miiri ko u bɛ ka kuma ni u diyanyemɔgɔ salenw ye, olu bɛ ka kumaɲɔgɔnya kɛ ni jinɛw de ye minnu bɛ u yɛrɛ kɛ iko o mɔgɔ salenw. O la, ka tiɲɛ dɔn saya ko la, o bɛ an lakana jinɛw ma. Jehova ye an lasɔmi ko an kana a ɲini ka kumaɲɔgɔnya don an ni mɔgɔ salenw cɛ ka da’ kan a b’a dɔn ko ni an ye jɛɲɔgɔnya don an ni jinɛw cɛ, o bɛ ko jugu lase an ma.​—Dutɛrɔnɔmɛ 18:10-12 kalan.

3. Mɔgɔ salenw cogoya ye min ye tiɲɛ yɛrɛ la

Diɲɛ fan bɛɛ, mɔgɔw ka dannayakow tɛ kelen ye fɛn kan min bɛ kɛ saya kɔfɛ. Nka o dannayako ninnu bɛɛ tɛ se ka kɛ tiɲɛ ye.

• Aw ka yɔrɔ la, dannayako jumɛnw de ka ca kosɛbɛ mɔgɔ salenw cogoya kan?

 4. Tiɲɛ ye min ye saya ko la o bɛ an nafa

Tiɲɛ dɔnni saya ko la, o bɛ an hɔrɔnya ka bɔ suw ɲɛsiran na. Waajulikɛla 9:​10 kalan, o kɔ aw ka baro kɛ nin ɲininkali kan:

• Yala mɔgɔ salenw bɛ se ka ko jugu kɛ an na wa?

Bibulu tiɲɛw fana bɛ an hɔrɔnya ka bɔ dannayakow la minnu ye ko, an ka kan ka fɛn dɔw kɛ walasa mɔgɔ salenw kana dimin an kɔrɔ walima ko an ka kan ka u bato. Esayi 8:​19 ani Jirali 4:​11 kalan, o kɔ aw ka baro kɛ nin ɲininkali kan:

• E hakili la, Jehova bɛ mun de miiri mɔgɔ ko la min bɛ mɔgɔ salenw bato walima ka dɛmɛ ɲini u fɛ?

5. Tiɲɛ ye min ye saya ko la o bɛ an dusu saalo

A fɔra mɔgɔ caman ye ko ni u sara u bɛ taa tɔɔrɔ u ka ko jugu kɛlenw kosɔn. Nka k’a dɔn ko mɔgɔ si tɛ tɔɔrɔ a ka saya kɔfɛ ani ko hali mɔgɔ min ye ko jugubaw kɛ, o tɛ tɔɔrɔ a ka saya kɔfɛ, o bɛ an dusu saalo. Romɛkaw 6:7 kalan, o kɔ aw ka baro kɛ nin ɲininkali kan:

• Iko an y’a kalan Bibulu kɔnɔ cogo min na, saya bɛ mɔgɔ hɔrɔnya jurumu ma. O la, yala e hakili la, mɔgɔ minnu sara olu bɛ ka tɔɔrɔ u ka jurumu kɛlenw kosɔn wa?

Ni an bɛ ta’a fɛ ka Jehova dɔn, an bɛna ta’a fɛ k’a dɔn ko Jehova tɛ sɔn abada ka mɔgɔ salenw tɔɔrɔ. Dutɛrɔnɔmɛ 32:4 ani 1 Yuhana 4:8 kalan, o kɔ aw ka baro kɛ nin ɲininkaliw kan:

• Jogo minnu kofɔlen bɛ nin tɛmɛsiraw kɔnɔ, olu bɛ Ala min na, yala o Ala bɛ sɔn ka mɔgɔ salenw tɔɔrɔ wa?

• Tiɲɛ ye min ye saya ko la, yala e bolo o bɛ mɔgɔ dusu saalo wa? Mun na?

 BAKURUBAFƆLI

Ni mɔgɔ sara, a ka ɲɛnamaya bɛ jɔ. Mɔgɔ salenw tɛ tɔɔrɔ wa u tɛ se ka ko jugu kɛ mɔgɔ ɲɛnamaw la.

Seginnkanni

• Mun bɛ saya kɔfɛ?

• Tiɲɛ ye min ye saya ko la o bɛ an nafa cogo di?

• Tiɲɛ ye min ye saya ko la o bɛ an dusu saalo cogo di?