KALANSEN 24

Tiɲɛ ye mun ye mɛlɛkɛw ko la?

A BILA A LA

Jehova ka denbaya kɔnɔmɔgɔ minnu bɛ sankolo la, a b’a fɛ an ka fɛn caman dɔn olu kan. Mɛlɛkɛw sen bɛ o denbaya kɔnɔmɔgɔw la, olu minnu welela “Ala denkɛw”. (Job 38:7) Bibulu bɛ mun de fɔ mɛlɛkɛw ko la? U bɛ nɔ jumɛn bila mɔgɔw la? Ani yala mɛlɛkɛw bɛɛ sen bɛ Ala ka denbaya kɔnɔmɔgɔw la wa?

1. Mɛlɛkɛw ye jɔniw ye?

Jehova ye mɛlɛkɛw da sani a ka dugukolo da. Iko Jehova cogo, mɛlɛkɛw tɛ ye ani u bɛ ɲɛnamaya kɛ sankolo la. (Heburuw 1:14) Mɛlɛkɛ miliyɔn caman bɛ yen ani u bɛɛ ni u jogo don. (Jirali 5:11) U bɛ Jehova “ka ci fɔlenw kɛ, k’a kan minɛ”. (Zaburu 103:20) Fɔlɔ-fɔlɔ la, Jehova tun bɛ mɛlɛkɛw ci tuma dɔw la u ka taa a ka ciw lase a ka mɔgɔw ma, ka u dɛmɛ ani ka u kisi. Bi bi in na, mɛlɛkɛw bɛ krecɛnw ɲɛminɛ ka taa ni u ye mɔgɔw yɔrɔ minnu b’a fɛ ka Ala dɔn.

2. Sitanɛ n’a ka jinɛw ye jɔniw ye?

Mɛlɛkɛ dɔw ma to kantigiya la Jehova kɔ. Mɛlɛkɛ fɔlɔ min murutira o “tɔgɔ ko sendonbaa ni Sitanɛ, o min bɛ dugukolo kan mɔgɔw bɛɛ lafili”. (Jirali 12:9) Sitanɛ tun b’a fɛ ka tɔw mara, o la a ye mɔgɔ fɔlɔw bila u ka muruti Jehova ma, ani o kɔ a ye mɛlɛkɛ wɛrɛw yɛrɛ fana bila olu ka fara a kan a ka murutili kɔnɔna na. O mɛlɛkɛ murutilenw de bɛ wele ko jinɛw. Jehova ye u gɛn ka bɔ sankolo la ani u bɛna halaki.—Jirali 12:9, 12 kalan.

3. Sitanɛ ani jinɛw bɛ k’a ɲini ka mɔgɔw lafili cogo di?

Sitanɛ ni jinɛw bɛ mɔgɔ caman lafili jinɛkow walima sitanɛbaara sababu fɛ. O ye sira ye min fɛ mɔgɔw b’a ɲini ka kumaɲɔgɔnya suguw bɛɛ don u ni jinɛw cɛ. Misali la, mɔgɔ dɔw bɛ taa dolo taamashyɛn dɔnbagaw, filɛlikɛlaw, sukililaw walima furakɛla subagaw sɛgɛrɛ. Dɔw bɛ furakɛli cogow ɲini minnu ni sitanɛbaara bɛ taa ni ɲɔgɔn ye. Dɔ wɛrɛw fana dalen b’a la ko u bɛ se ka kuma ni mɔgɔ salenw ye. Nka Jehova ye nin lasɔmini di: “Aw kana tugu sukililaw ni dɔnbaaw la. Aw kana filɛli kɛ u fɛ”. (Levitike 19:31) A ye nin lasɔmini di an ma walasa ka an lakana Sitanɛ ani jinɛw ma. Olu ye Ala juguw de ye ani u b’a fɛ ka ko jugu kɛ an na.

DƆ FARA I KA DƆNNIYA KAN

An k’a ɲini k’a dɔn mɛlɛkɛw bɛ ka fɛn ɲuman minnu kɛ, faratiko minnu bɛ sitanɛbaara la, ani an bɛ se ka an yɛrɛ lakana cogo min na Sitanɛ ani jinɛw ma.

4. Mɛlɛkɛw bɛ mɔgɔw dɛmɛ u ka Jehova dɔn

Ala ka mɛlɛkɛ yɛrɛw tɛ taa kuma mɔgɔw fɛ ka u waaju. Nka u bɛ se ka Ala batobagaw ɲɛsin mɔgɔw ma minnu b’a fɛ ka Ala dɔn. Jirali 14:6, 7 kalan, o kɔ aw ka baro kɛ nin ɲininkaliw kan:

Mun na an mago bɛ mɛlɛkɛw ka dɛmɛ na waajuli la?
Mɛlɛkɛw bɛ se ka i ɲɛminɛ ka taa ni i ye mɔgɔw yɔrɔ, minnu b’a fɛ ka fɛn caman dɔn Bibulu kan. Yala o dɔnni bɛ dusu don i kɔnɔ wa? Mun na?

5. I yɛrɛ tanga sitanɛbaara ma

Sitanɛ ni jinɛw ye Jehova juguw de ye. U ye anw fana juguw de ye. Luka 9:38-42 kalan, o kɔ aw ka baro kɛ nin ɲininkali kan:

Jinɛw bɛ mun de kɛ mɔgɔw la?

An t’a fɛ ka jinɛw wele u k’u sen don an ka ɲɛnamaya la. Dutɛrɔnɔmɛ 18:10-12 kalan, o kɔ aw ka baro kɛ nin ɲininkaliw kan:

Sira jumɛnw de fɛ jinɛw b’a ɲini ka an sɔrɔ ani ka kuma an fɛ? Jinɛw ka ko jumɛnw de bɛ kɛ ka caya aw ka yɔrɔ la?
Yala e bolo, a bɛnnen don Jehova k’a fɔ ko an kana sitanɛbaaraw kɛ wa? Mun na?

A’ye WIDEYO lajɛ, o kɔ aw ka baro kɛ nin ɲininkaliw kan:

WIDEYO: “A’ ye jɔ Sitanɛ ɲɛ ka a kɛlɛ” (5:02)

Sɛbɛn min tun sirilen bɛ Palesa denmuso bolo la, yala e hakili la, o tun ye ko jugu ye wa? Mun na?
Palesa tun ka kan ka mun de kɛ walasa ka a yɛrɛ lakana jinɛw ma?

Krecɛn lakikaw furadama ye jinɛw kɛlɛ. Kɛwalew 19:19 ani 1 Kɔrɛntekaw 10:21 kalan, o kɔ aw ka baro kɛ nin ɲininkali kan:

Fɛn o fɛn bɛ i bolo, ni jɛɲɔgɔnya bɛ u ni sitanɛbaara cɛ, mun na a nafa ka bon i ka olu bɛɛ tiɲɛ pewu-pewu?

6. Se sɔrɔ i ni Sitanɛ ni a ka jinɛw ka kɛlɛ la

Jinɛw bɛ Sitanɛ de ka mara kɔnɔna na. Nka Mɛlɛkɛba Misɛl de bɛ ka mɛlɛkɛ kantigiw ɲɛminɛ, o min tɔgɔ wɛrɛ ye Yesu. Yala fangaba bɛ Misɛl bolo wa? Jirali 12:7-9 kalan, o kɔ aw ka baro kɛ nin ɲininkaliw kan:

Jɔni de ka fanga ka bon ni jɔni ta ye? Misɛl ni a ka mɛlɛkɛw walima Sitanɛ ni a ka jinɛw?
Yala e hakili la, Yesu nɔfɛmɔgɔw ka kan ka siran Sitanɛ ni a ka jinɛw ɲɛ wa?

I bɛ se ka se sɔrɔ i ni Sitanɛ ni a ka jinɛw ka kɛlɛ la. Yakuba 4:7 kalan, o kɔ aw ka baro kɛ nin ɲininkali kan:

I bɛ se ka i yɛrɛ lakana cogo di Sitanɛ ni jinɛw ma?

MƆGƆ DƆW B’A FƆ KO: “Ko jugu foyi t’a la ka tulon kɛ ni tulonkɛ minɛnw walima ka filimuw lajɛ minnu bɛ sitanɛbaara kan. O ye k’i ɲɛnajɛ dɔrɔn de.”

Mun na o hakilina ye faratiko ye?

BAKURUBAFƆLI

Mɛlɛkɛ kantigiw bɛ an dɛmɛ. Sitanɛ ni a ka jinɛw ye Jehova juguw de ye, ani u bɛ baara kɛ ni sitanɛbaara ye walasa ka mɔgɔw lafili.

Seginnkanni

Jehova ka mɛlɛkɛw bɛ ka mɔgɔw dɛmɛ cogo di u k’a dɔn?
Sitanɛ ni a ka jinɛw ye jɔniw ye?
Mun na i t’a fɛ ka i sen don fewu-fewu sitanɛbaara la?

Kalansen banna don min na:

A ɲini ka nin kɛ

I yɛrɛ sɛgɛsɛgɛ k’a lajɛ ni fɛn dɔw bɛ i bolo minnu ni sitanɛbaara bɛ ɲɔgɔn ɲɛsira la. Ni olu dɔw bɛ i bolo, i ka Ala deli a ka hakilitigiya di i ma walasa i ka latigɛli ɲuman kɛ u ko la.

Fɛn wɛrɛ:

Your other goal