KALANSEN 06
Ɲɛnamaya daminɛna cogo di?
“Ɲɛnamaya ji boyi bɛ sɔrɔ [Ala] de fɛ.” (Zaburu 36:10) Yala e dalen b’o la? Mɔgɔ dɔw b’a fɔ ko mɔgɔ si ma ɲɛnamaya da. Ni o ye tiɲɛ ye, o b’a jira ko an bɛ ɲɛnamaya la an yɛrɛ ma ten. Nka ni Jehova Ala de ye ɲɛnamaya da, o la kun ka kan ka kɛ ɲɛnamaya la, yala o tɛ tiɲɛ ye wa? a Bibulu maana min bɛ kuma ɲɛnamaya daminɛ kan ani kun min na o maana ye tiɲɛ ye, o sɛgɛsɛgɛ.
1. Dunuya daminɛna cogo di?
Bibulu b’a fɔ ko: “Fɔlɔfɔlɔ Ala ye sankolo ni dugukolo da.” (Jenɛse 1:1) Siyansi dɔnnikɛlabaw caman sɔnna a ma ko daminɛ bɛ dunuya la. Ala ye a da cogo di? Ala fanga, a bɛ baara kɛ ni min ye, o ye a ka hakili senu ye. A ye baara kɛ ni o de ye walasa ka dunuya kɔnɔfɛnw bɛɛ da, galaksiw, dolow ani planɛtiw sen b’o la.—Jenɛse 1:2.
2. Mun na Ala ye dugukolo da?
Jehova “ma [dugukolo] da ka a lankolon bila, nka a ye a da walisa mɔgɔw ka sigi a kan.” (Esayi 45:18) A ye dugukolo da ka a kɛ yɔrɔ cɛɲumanba ye ɲɛnamaya bɛ kɛ yɔrɔ min na ani Hadamadenw mago bɛ fɛn o fɛn na walasa ka ɲɛnamaya kɛ fo badaa, a ye dugukolo da ni o fɛnw bɛɛ ye. (Esayi 40:28; 42:5 kalan.) Siyansi dɔnnikɛlabaw y’a jira ko dugukolo ɲɔgɔn tɛ yen ani ko danfara bɛ a ni planɛti tɔw cɛ. Dugukolo dɔrɔn de ye yɔrɔ ye, a dɔnnen don ko ɲɛnamaya bɛ se ka kɛ min kan.
3. Danfara jumɛnw de bɛ Hadamadenw ni baganw cɛ?
Jehova kɛlen kɔ ka dugukolo da, a ye ɲɛnamaya da a kan. A fɔlɔla ka falenfɛnw ni baganw de da dugukolo kan. O kɔ, “Ala ye mɔgɔ da a yɛrɛ ja la”. (Jenɛse 1:27 kalan.) Mun de la Hadamadenw ni fɛn tɔw tɛ kelen ye? Ikomi an dara Ala ja la, an bɛ se ka a jogow waleya, i n’a fɔ kanuya ani tilennenya. A ye an da ni nin fɛn ninnu kɛli se ye: Kanw degeli, ka fɛnw cɛɲɛ dɔn ani ka fɔli dumanw diya dɔn. Baganw danfara la, anw bɛ se ka an dabaga bato.
DƆ FARA I KA DƆNNIYA KAN
An ka daliluw sɛgɛsɛgɛ minnu b’a jira ko ɲɛnamaya dilanna ani ko Bibulu maana min bɛ kuma dali ko la, ko o ye tiɲɛ ye. Jogo minnu bɛ Hadamadenw la, olu bɛ an kalan min na Ala ko la, an k’a ɲini k’o dɔn.
4. Ɲɛnamaya dilanna
Ni Hadamadenw ye fɛn danen filɛ ka fɛn dɔ dilan o fɛn danen cogoya la, mɔgɔw bɛ u tanu kosɛbɛ o ko la. O la, jɔni de ka kan ka tanu fɛn danenw ko la mɔgɔw bɛ ka minnu ladege? A’ye WIDEYO lajɛ, o kɔ aw ka baro kɛ nin ɲininkali kan:
-
Hadamadenw ye mun de dilan fɛn danen ja la?
Sow bɛɛ ko sigira sen kan ani ka u jɔ mɔgɔ dɔ fɛ. Nka jɔni de ye fɛn danenw ko sigi sen kan ani ka u dilan? Heburuw 3:4 kalan, o kɔ aw ka baro kɛ nin ɲininkaliw kan:
-
Fɛn danen jumɛnw de bɛ i dabali ban?
-
Yala hakilitigiyako don ka d’a la ko dunuya ni a kɔnɔfɛnw bɛɛ dilanna wa? Mun na?
I tun bɛ nin dɔn wa?
I bɛ se ka barokunw ani wideyow sɔrɔ nin barokun ko la jw.org kan nin fɛnw yɔrɔ la: “Évolution ou conception ?” ani “Points de vue sur l’origine de la vie.”
“Sow bɛɛ bɛ jɔ mɔgɔ dɔ fɛ, nka fɛn bɛɛ jɔbaa ye Ala de ye”
5. Bibulu maana min bɛ fɛnw dali kofɔ, o ko ye tiɲɛ ye
Dugukolo ani ɲɛnamaya min b’a kan, Bibulu ye olu daminɛ cogo ɲɛfɔ Jenɛse tilayɔrɔba 1 kɔnɔ. Yala i bɛ se ka da o maana ko la, walima o maana ye nsiirin dɔrɔn de ye wa? A’ye WIDEYO lajɛ, o kɔ aw ka baro kɛ nin ɲininkaliw kan:
-
Dugukolo ani ɲɛnamaya min b’a kan, yala Bibulu b’a fɔ ko olu dara tile wɔɔrɔ kɔnɔ, minnu lɛrɛw ye 24 ye wa?
-
Bibulu maana min bɛ fɛnw dali kofɔ, yala e hakili la, o ko ye hakilitigiyako ani tiɲɛ ye wa? Mun na e sɔnnen bɛ o ma walima mun na e ma sɔn o ma?
Jenɛse 1:1 kalan, o kɔ aw ka baro kɛ nin ɲininkali kan:
-
Siyansi dɔnnikɛlabaw b’a fɔ ko daminɛ bɛ dunuya la. Olu bɛnna min kan ani i bɔra ka min kalan Bibulu kɔnɔ, olu bɛ sanga ɲɔgɔn ma cogo di?
Mɔgɔ dɔw b’u yɛrɛ ɲininka n’a y’a sɔrɔ Ala ye baara kɛ ni yɛlɛma-yɛlɛmali ye ka ɲɛnamaya da. Jenɛse 1:21, 25, 27 kalan, o kɔ aw ka baro kɛ nin ɲininkaliw kan:
-
Yala Bibulu b’a fɔ ko Ala ye ɲɛnamaya da cogo dɔ la ani k’a to a ka to ka yɛlɛma-yɛlɛma ka kɛ baganw ani Hadamadenw ye wa? Walima a ye ɲɛnamaya “sifaw” bɛɛ siw da wa? b
6. Hadamadenw ni Ala ka fɛn danen tɔw si tɛ kelen ye
Jehova de ye Hadamadenw ni baganw da. O bɛɛ n’a ta fɛn dɔw bɛ yen minnu bɛ danfara don Hadamadenw ni baganw cɛ. Jenɛse 1:26 kalan, o kɔ aw ka baro kɛ nin ɲininkali kan:
-
An dara Ala ja la, o de kosɔn se bɛ an ye ka kanuya ni hinɛ jira, o b’a jira ko jogo jumɛnw bɛ Ala la?
MƆGƆ DƆW B’A FƆ KO: “Bibulu maana min bɛ fɛnw dali kofɔ, o ye nsiirin de ye.”
-
E hakilina ye mun ye? Mun na?
BAKURUBAFƆLI
Jehova de ye dunuya ni ɲɛnamaya bɛɛ da.
Seginnkanni
-
Bibulu bɛ mun de fɔ dunuya daminɛ cogo kan?
-
Yala Ala y’a to ɲɛnamaya sifaw ka to ka yɛlɛma-yɛlɛma ka kɛ ɲɛnamaya sifa wɛrɛ ye, walima a ye u bɛɛ da de wa?
-
Mun de la Hadamadenw ni fɛn tɔw tɛ kelen ye?
NINNU LAJƐ
Fɛn danen misali dɔw lajɛ.
Bibulu maana min bɛ fɛnw dali kofɔ, a lajɛ denfa dɔ bɛ se ka o ɲɛfɔ a denkɛnin ye cogo min na.
A lajɛ ni kolo kɔrɔ sɔrɔlenw walima siyansi dɔnnikɛlabaw ka dɔnniya b’a jira ko ɲɛnamaya dara de, walima n’o b’a jira k’a nana a yɛrɛ ma ten.
a Kalansen 25nan na, an bɛna kuma Ala sagonata kan ka ɲɛsin Hadamadenw ma.
b Bibulu kɔnɔ, daɲɛ min ye ko “sifa”, o bɛ fɛn danen kulu de jira minnu bɛɛ ye fɛn suguya kelen ye.
