Dɔnkili ye nilifɛn ɲumanba ye min bɔra Jehova yɔrɔ. A bɛ se ka nɔ bila an miiricogo la, ka an kɔnɔnakow yɛlɛma ani ka an bila ka fɛn dɔw kɛ. Wa, an ka dɔnkili kɛrɛnkɛrɛnnennw bɛ o yɛrɛ de kɛ an na. Nka u bɛ fɛn wɛrɛ kɛ min nafa ka bon ni o bɛɛ ye: u bɛ se ka to an ka gɛrɛ Jehova la.

 Kabini san 2014, dɔnkili kɛrɛnkɛrɛnnen 70 ni kɔ ɲɔgɔn de bɔra. Wa sisan, o dɔnkiliw bɛɛ cɛla, i bɛ ta’a sɔrɔ dɔnkili kelen ɲɔgɔn bɛ sɔrɔ fo kan 500 ni kɔ ɲɔgɔn na! Nka a bɛ se ka kɛ ko i b’i yɛrɛ ɲininka jɔni de bɛ baara kɛ o dɔnkiliw kan ani u bɛ dilan cogo min na.

 Ɲɛmɔgɔ kulu ka Mɔgɔw kalanni komite bɛ baarada dɔ ɲɛminɛ ni o ye Fɛn lamɛntaw ani wideyow baarada ye. Ekipu dɔ bɛ o baarada la min bɛ dɔnkili kɛrɛnkɛrɛnnenw dilan. Balimakɛ ni balimamuso 13 de bɛ o ekipu kɔnɔ minnu bɛ dɛmɛ kɛ walasa ka dɔnkili kumaw sɛbɛn, ka fɔlikanw dilan ni masiniw ye, ka kow kɛcogo boloda, ani fɛn caman wɛrɛw minnu ka kan ka kɛ. Ka fara o kan, Mɔgɔw kalanni komite ye a ka yamaruya di walasa balima minnu bɛ diɲɛ fan bɛɛ, ni u b’a bɔ u yɛrɛ la ka baara kɛ jɛkuluba ye, olu ka se ka dɛmɛ kɛ o baara in kɔnɔna na, k’u to u ka so. Dɔnkili sɛbɛnnaw, fɔlikɛlaw ani dɔnkilidalaw bɛ o mɔgɔw cɛla. O balimakɛw ni o balimamusow bɛ baara kɛ ni u seko bɛɛ ye ni majiginnenya ye k’a sɔrɔ u m’a ɲini mɔgɔw ka u fo o kosɔn.

 Dɔnkili kɛrɛnkɛrɛnnenw bɛ dilan cogo di? Mɔgɔw kalanni komite bɛ fɔlɔ ka tɛmɛsira dɔ sugandi dɔnkili bɛ sinsin min kan, ani u b’a fɛ dɔnkili ka hakilina min lase mɔgɔw ma, u bɛ o fana sugandi. O kɔ, dɔnkilida ekipu bɛ dɔnkili fɔlisen ni dɔnkili kumaw sɛbɛnni kalifa balima dɔw ma. O balimaw mana tila o baara la, u bɛ a jira Mɔgɔw kalanni komite mɔgɔw la walasa u ka a lamɛn ani u ka u hakilina fɔ u ye. O kɔ, yɛlɛmali minnu ka kan ka kɛ, dɔnkilida ekipu bɛ olu kɛ, ani ka dɔnkili kan ta. O dɔnkiliw kan bɛ ta yɔrɔ caman na, i n’a fɔ tɔn bolofaraw kɔnɔna na walima balima dɔw fɛ yen, kantali minɛnw bɛ minnu bolo.

 Walasa ka dɔnkili kɛrɛnkɛrɛnnew dilan ani ka u kan ta, balimaw bɛ baara kɛ ni ɔrdinatɛri porogaramu dɔw de ye. Walasa ka o baara kɛ, dɔnkilida ekipu mago bɛ fɔlikɛ minɛnw la, ani masini dɔw minnu bɛ dɔnkili labɛn ani minnu bɛ a kan bonya, ani mikorow fana. Mikoro kelen sɔngɔ bɛ taa dolari wari 100 la, ni o bɛ bɛn sefa wari 68.000 ɲɔgɔn ma, ka taa a bila dolari wari 1.000 la, ni o bɛ bɛn sefa wari 680.000 ɲɔgɔn ma. San 2020, an ye wari min don kantali minɛnw na dɔnkilida kama, o bɛnna dolari wari 116.000 ma, ni o bɛ bɛn sefa wari miliyɔn 78 ɲɔgɔn ma.

 Bolomafara minnu bɛ di, balimaw bɛ mun de kɛ walasa o wariw kana tiɲɛ? Sani ka mɔgɔ caman ta Betɛli la ka u kɛ ekipu ye dɔnkilida kama, balima minnu b’a bɔ u yɛrɛ la ka baara kɛ jɛkuluba ye k’u to u ka so, betɛli mɔgɔw ni olu caman de be baara kɛ ɲɔgɔn fɛ. Ka fara o kan, sani Betɛli ka balimaw caman wele u ka na ni u ka fɔlikɛ minɛnw ye walasa ka dɔnkili dɔ labɛn, tuma caman na an balimaw bɛ dɔnkiliw fɔlisenw dilan ni ɔrdinatɛri ye.

 Dɔnkili kɛrɛnkɛrɛnnenw lamɛnni ka di balimakɛw ni balimamusow ye kosɛbɛ. Tara, o min bɛ Alimaɲi, o ko: “Ni ne jɔrɔlen don, o dɔnkiliw lamɛnni bɛ ne hakili sigi. Ni ne ye u lamɛn n’yɛrɛ ka kan na, a bɛ kɛ ne ɲɛ na ko Jehova bɛ ka ne minɛ n’bolo ma.” Dimitry, o min bɛ Kazakhstan, o ko: “Ne b’a dɔn ko ne bɛ se ka o dɔnkiliw lamɛn k’a sɔrɔ ne ma n’yɛrɛ ɲininka ni kuma juguw bɛ u kɔnɔ. Wa, o ka di ne ye kosɛbɛ. Ka fara o kan, dɔnkiliw bɛ ne dɛmɛ ne gɛrɛlen ka to Jehova la.”

 Delia, o min bɛ Afriki du Sud, ale ye a fɔ a hakilina ye min ye dɔnkili kɛrɛnkɛrɛnnenw ko la. A ko: “O dɔnkiliw bɛ ne ka dannaya kologɛlɛya. Ni ne dusu kasilen don, walima ni gɛlɛya dɔ bɛ ne kan, o dɔnkiliw cɛla kelen bɛ sɔrɔ yen tuma bɛɛ min bɛ ne dɛmɛ. Tuma caman na, ni ne ye hali dɔnkili fɔlisen dɔrɔn mɛn o bɛ ne bɔ walasa ka nisɔndiya sɔrɔ!”

 Dɔnkili kɛrɛnkɛrɛnnen dɔw bɛ yen minnu ka di kosɛbɛ mɔgɔw ye. Lerato, o min fana bɛ bɔ Afriki du Sud, o ko: “Waati min na ne bɛna se ka n’ba ye kokura Alijinɛ kɔnɔ, dɔnkili kɛrɛnkɛrɛnnen fila minnu tɔgɔ ye ko ‘Juste à notre porte’ ani ‘Le monde nouveau’, olu b’a to ne ka miiri o waati la. Ni ne bɛ ka o dɔnkili fila lamɛn tuma o tuma, a bɛ kɛ i ko ne bɛ n’ba bolitɔ ye ka na ne yɔrɔ ani k’a meleke ne kan na.”

 Dɔnkili kɛrɛnkɛrɛnnen dɔ bɛ yen min ye sungurunin dɔ dɛmɛ, o min bɛ Siri Lanka. O ko: “Ne ka siyansi karamɔgɔmuso ye ne kɔrɔfɔ kalanden tɔw ɲɛ na bawo ne ye Jehova Seere ye. Ne siranna, wa ne m’a dɔn ne tun ka kan ka min fɔ. Ne selen so, ne bamuso y’a ɲini ne fɛ ne ka dɔnkili kɛrɛnkɛrɛnnen dɔ lamɛn min tɔgɔ ye ko ‘Étudier rend fort’. O dɔnkili ye ne dɛmɛ ne k’a faamu ko ne ka kan ka ɲininiw kɛ ani ka jaabi dɔ labɛn. O don dugusajɛ ne kumana ne ka karamɔgɔmuso fɛ. A ye ne ka kuma lamɛn ani ka a fɔ ko sisan a ye Jehova Seerew ka dannayakow faamu ka ɲɛ. Ne bɛ Jehova ka jɛkuluba waleɲumandɔn kosɛbɛ nin dɔnkiliw bɛɛ kosɔn, o minnu bɛ dusu don an kɔnɔ.”

 Walasa o dɔnkiliw ka se ka bɔ, an bɛ o wari sɔrɔ min? Aw bɛ bolomafara minnu di an ka baaraw kama diɲɛ bɛɛ kɔnɔ, ni aw bɛ olu caman kɛ donate.jw.org sababu fɛ, an bɛ o dɔnkiliw dilanni wari sɔrɔ yen de. Aw bolo labilalalen bɛ bolomafara minnu di, aw ni ce o kosɔn.