“Waati dɔ kɛra, a tɛ waati jan bɔ yɛrɛ min na an tun tɛ se k’a miiri cogo si la ko an bɛ se ka an ka gafew sɔrɔ an ka masinimanfɛnw kan.” Yala aw sɔnna o kuma ma wa? Geoffrey Jackson de y’o kumaw fɔ a ka jɛmukan dɔ sen fɛ o min ye dusu don mɔgɔw kɔnɔ, Ɲɛmɔgɔ kulu ka san 2020 ɲɛfɔli 6nan la. A y’a fɔ fana ko: “Nka sisan, a bɛ se ka kɛ ko an b’an yɛrɛ ɲininka kow tun bɛna kɛ cogo min na fiɲɛbana in sen fɛ, ni baarakɛminɛn dɔw tun tɛ an bolo i n’a fɔ JW Library application. Jehova de ye an labɛn san caman kɔnɔ nin kow ni a ɲɔgɔnnaw kama.”

 Jehova ye an labɛn cogo di? Baara jumɛn de kɛra walasa ka JW Library application dilan ani baara jumɛn de bɛ ka kɛ walasa a ka se ka baara kɛ koɲuman ani k’a cogo fisaya?

 San 2013 Mɛkalo la, Ɲɛmɔgɔ kulu y’a ɲini MEPS Programming fɛ, o min ye jɛkulu sigiyɔrɔsoba ka baarada dɔ ye, u ka application dɔ dilan Traduction du monde nouveau révisée bɛ se ka sɔrɔ min kɔnɔ. Paul Willies, o min bɛ baara kɛ ni MEPS Programming ye, o ko: “An tun ma deli ka application dilan fɔlɔ mɔgɔw bɛ se ka min ta telefɔni ni a ɲɔgɔnnaw kan. Nka an ye ekipu dɔ sigi sen kan, ka baara dɔw bila kɛrɛfɛ fɔlɔ ani ka baara kɛ ni baarada wɛrɛw ye walasa ka application in ni a kɔnɔfɛnw dilan. Tuma caman na, an tun bɛ delili kɛ, wa ni Jehova ka dɛmɛ ye application in sera ka bɔ an ka tɔn ka lajɛ la min bɛ kɛ san o san, kalo duuru dɔrɔn baara in daminɛnen kɔfɛ!”

 Gɛlɛya wɛrɛ min tun bɛ yen, o tun ye, ka application in yɛlɛma k’a kɛ bibiliyotɛki yɛrɛ yɛrɛ ye gafe caman bɛ sɔrɔ yɔrɔ min na, kan caman na. San 2015, zanwuyekalo la, gafe minnu tun bɛ yen, olu fanba tun bɛ sɔrɔ application in kan angilɛkan na, wa kalo wɔɔrɔ dɔrɔn o kɔ mɔgɔw tun bɛ se ka o gafew ta kan kɛmɛ caman na.

 Kabini o waati, an balimaw ye application in cogo fisaya sira caman fɛ. U ye wideyow bila a kɔnɔ ani an ka gafew ni an ka jɛkulu lajɛ porogaramu kɔnɔfɛnw bɛɛ bila yɔrɔ kelen na a kɔnɔ, ani k’a to an ka se ka Guide de recherche kumaw sɔrɔ Bibulu tɛmɛsiraw kɔnɔ walasa ka se ka ɲinini kɛ teliya la.

 JW Library application bɛ dayɛlɛ masini hakɛ min kan don o don, o bɛ taa miliyɔn 8 na ani a bɛ dayɛlɛ masini hakɛ min kan kalo o kalo, o ka ca ni miliyɔn 15 ye! Mun de ka kan ka kɛ walasa application in ka baara kɛ koɲuman o masini ninnu bɛɛ kan? Balimakɛ Willies y’a fɔ ko: “Application minnu bɛ bila telefɔni ni a ɲɔgɔnnaw kan, baara min bɛ kɛ olu kan, o tɛ ban tuma si. O la, an bɛ baara kɛ tuma bɛɛ ka fɛn kuraw fara an ka application in kan walasa mɔgɔw ka se ka baara kɛ ni u ye nɔgɔya la. Minnu bɛ masinimafɛnw porogaramu dilan, olu bɛ u kɔnɔfɛnw lakuraya tuma bɛɛ, o la an ka kan ka application in labɛn tuma bɛɛ fana walasa a ni u ka fɛn lakurayalenw ka bɛn ɲɔgɔn ma. An ka gafew ni an ka fɛn lajɛta ni lamɛnta minnu bɛ JW Library application kan, ikomi olu hakɛ bɛ ka ta’a fɛ ka caya, an ka kan ka baara kɛ an ka porogaramu kan walasa a ka se ka baara kɛ koɲuman.” JW Library application kɔnɔ, kan hakɛ minnu bɛ yen, ni i ye olu bɛɛ fara ɲɔgɔn kan, gafe 200.000 ɲɔgɔn de bɛ a kɔnɔ sisan ani wideyow ni fɛn lamɛntaw 600.000 ni kɔ!

 Walasa o baara ka se ka kɛ koɲuman, an mago tɛ infɔrmatiki baarakɛminɛnw dɔrɔn na. An ka kan ka porogaramu dɔw san de walasa ka se ka baara kɛ ni u ye. Walasa ka yamaruya sɔrɔ ka baara kɛ ni porogaramu kelen ye, o sɔngɔ bɛ bɛn dolari wari 1.500 de ma, wa o ye sefa wari 900.000 ni kɔ ye. Ka fara o kan, san o san MEPS Programming baarada mɔgɔw bɛ dolari wari 10.000 ɲɔgɔn de bɔ ni o bɛ bɛn sefa wari 6.000.000 ni kɔ ma. U bɛ o wari bɔ walasa ka masinimafɛnw marki kura bɔlenw caman san walasa k’a dɔn ni JW Library application bɛna ta’a fɛ ka baara kɛ koɲuman ɔrdinatɛri, tablɛti ani telefɔni kura bɔlenw kan.

 An bɛ wari min bɔ ka an ka sɛbɛnw papiyelama bɔ, ka u kɛ gafew ye ani ka u ci ka taa yɔrɔ wɛrɛw la, JW Library ye dɔ bɔ kosɛbɛ o wariw sɔngɔ la. An ka misali ta an ka texte du jour gafe kan. San 2013 kɔnɔ, texte du jour gafe papiyelama hakɛ min bɔra, o taara miliyɔn 12 ɲɔgɔn na. Nka san 2020 kɔnɔ, texte du jour gafe papiyelama hakɛ min bɔra, o taara miliyɔn 5 ɲɔgɔn dɔrɔn de la hali ni weleweledala 700.000 farala an kan diɲɛ fan bɛɛ. Mun y’a to o yɛlɛma sera ka kɛ? Sisan, an balimaw caman bɛ texte du jour kalan JW Library a application de kan.

 Minnu bɛ baara kɛ ni JW Library application ye, a bɛ olu dɛmɛ fana sira caman fɛ. Geneviève, o min bɛ Kanada, o y’a fɔ ko JW Library application in ye ale dɛmɛ a ka se ka yɛrɛkalan kɛ tuma bɛɛ. A y’a fɔ fana ko: “Tiɲɛ na, ni ne tun ka kan ka gafew ɲini ka u fara ɲɔgɔn kan walasa ka kalan kɛ, ne ma d’a la ni ne tun bɛna se ka kalan kɛ don o don sɔgɔma. Nka ni nin application in ye, ne dan ye dɔrɔn ka n’ka tableti ta wa ne mago bɛ fɛn o fɛn na, ne bɛ o sɔrɔ a kɔnɔ. Ne bɛ o kalan min kɛ tuma bɛɛ, o ye ne ka dannaya kologɛlɛya ani ka n’ka alako bonya.”

 JW Library application ye dɛmɛ kɛ kosɛbɛ COVID-19 fiɲɛbana sen fɛ. Charlyn o min bɛ Etazuni jamana la, o ko: “COVID-19 fiɲɛbana in kosɔn, ne ma an ka gafew papiyelama si ye san kelen kɔnɔna na. Nka an mago min na alako ta fan fɛ, JW Library y’a to an sera ka o sɔrɔ, wa nɛ bɛ Jehova fo a ka o fɛn dilenw kosɔn ni kanuya ye.”

 Faye, o min bɛ Filipini, o ni mɔgɔ caman hakilina kɛra kelen ye. A y’a fɔ ko: “Ne bɛ baara kɛ ni nin application nafamanba in ye walasa n’gɛrɛlen ka to Jehova la. Ne bɛ ale fɔlɔ de dayɛlɛ ka kalan kɛ sɔgɔma. Ne bɛ a kɔnɔfɛnw de lamɛn ka ne to sokɔnɔ baaraw la. Ne bɛ lajɛw labɛn ni ale de ye. Wa, ne bɛ n’labɛn ni ale de ye sani ne ka taa Bibulu kalan kɛ dɔ kun. Ni waati bɛ n’bolo, n’bɛ wideyow lajɛ a kɔnɔ. Ni ne bɛ kɔnɔni na yɔrɔ dɔ la, ne bɛ sɛbɛnw ni Bibulu kalan a kɔnɔ. Tiɲɛ na nafaba bɛ a la.”

 Application in bɛ dɛmɛ kɛ kosɛbɛ fana waajuli baara kɔnɔna na. Misali la, balimamuso dɔ, min bɛ bɔ Kameruni, o tun b’a fɛ ka tɛmɛsira dɔ jira dɔ la ka a to waajuli la, balimamuso wɛrɛ tun ye baara kɛ ni min ye a bɛ waatinin bɔ. Nka, a hakili bɔra o tɛmɛsira in sɔrɔ yɔrɔ kɔ. A ko: “ Ne hakili tora o tɛmɛsira in kumasen dɔ la. O la ne ye application in dayɛlɛ, ka taa Bibulu kɔnɔ ani ka kumasen in don ɲinini kɛyɔrɔ la. O yɔrɔnin bɛɛ, ne ye tɛmɛsira in sɔrɔ. Ni nin application in ye, ne bɛ se ka tɛmɛsira caman sɔrɔ ne bɛ ɲinɛ minnu kɔ tuma dɔw la.”

 Aw tɛmɛnna fɛɛrɛ minnu fɛ minnu kofɔlen bɛ donate.jw.org kan walasa ka bolomafaraw di ni ɲumanya ye, o y’a to an ka se ka JW Library application dilan, k’a to a ka baara kɛ koɲuman ani k’a cogoya fisaya an balimaw ye diɲɛ fan bɛɛ. Aw ni ce aw ka bololabilalenya la.

1. San 2013 ɔkutɔburukalo la—JW Library application bɔra, wa Traduction du monde nouveau révisée kɛra a kɔnɔ

2. San 2015 zanwuyekalo la—Sɛbɛn wɛrɛw bilala a kɔnɔ angilɛkan na, o kɔ sɛbɛnw bilala a kɔnɔ kan kɛmɛ caman wɛrɛw la

3. San 2015 nowanburukalo la—Ka se ka tɛrɛ ci sɛbɛnw kumaw kɔrɔ, o farala a baarakɛminɛnw kan

4. San 2016 mɛkalo la—Lajɛ minɛnw bilala a kɔnɔ

5. San 2017 mɛkalo la—Ka se ka sɛbɛnni kɛ a kɔnɔ, o farala a baarakɛminɛnw kan

6. San 2017 desanburukalo la—Bible d’étude bilala a kɔnɔ

7. San 2019 marisikalo la—Ka se ka fɛn lamɛntaw ta a kan, ka wideyow lajɛ k’a sɔrɔ i ma u ta ani ka se ka baara kɛ ni Guide de recherche ye, olu farala a kan

8. San 2021 zanwuyekalo la—Fɛn kuraw farala a kan Ɲɛnamaya kɛ nisɔndiya la fo badaa! gafe kama