Te ọ wa khẹke ne Ivbi Izrẹl rhie urhomwẹ ne Jehova, rhunmwuda irẹn ẹre ọ viọ iran ladian vbe otọ Igipt, irẹn ẹre ọ vbe miẹn iran fan vbe obọ e Fero kevbe ivbiyokuo ọghẹe. (Ẹks 15:1, 2) Te Jehova wa ye ru ẹse ne emwa rẹn do fi ebanban. De vbene ima khian ya kpọnmwẹ ọnrẹn hẹ?—Psm 116:12.

Odẹ ọkpa ne ima khian ya ru ọna, ọre ne ima rhie obọ ye iwinna arọndẹ ọghe ovbi ẹghẹ kherhe ra ọghe ẹghẹ hia. U sẹtin na erhunmwu gie Jehova, nọ ru iyobọ nuẹn ya gha hoo ne u rhie obọ ye iwinna arọndẹ kevbe nọ rhie ẹtin nuẹn ya sẹtin ru vberriọ. (Fil 2:13) Arọndẹ ọghe ovbi ẹghẹ kherhe ẹre etẹn nibun ka ya suẹn. Vbe uki ọghe March, April kevbe uki ne ọgbaroghe ọghe otako ya mu otuẹ rrie iko ne u ye, u sẹtin rhie ughaẹdẹ 30 ra 50 ladian vbe ikporhu. U gha bẹghe vbene iwinna arọndẹ ọghe ovbi ẹghẹ kherhe ya ọmwa sọyẹnmwẹ hẹ, ọna sẹtin ya ruẹ gha hoo ne u rhie obọ ye iwinna arọndẹ ọghe ẹghẹ hia. Uhiẹn, etẹn eso ni winna vbe Mọnde ya sẹ Fraide kevbe eso ne egbe ma rran ye sẹtin rhie obọ ye iwinna arọndẹ ọghe ẹghẹ hia. (mwb16.07 8) Vbene ẹmwata, ma rẹn wẹẹ ẹrhiọn ke ẹrhiọn ne ima rhirhi loo i re nọ de ihoi rua rhunmwuda, e Jehova wa sẹ ne ima gha ru ẹre na!—1 Krọ 16:25.

GHEE VIDIO NỌ MWẸ UHUNMWUTA NỌ KHARE WẸẸ ETẸN NIKHUO EHA NI RRE MONGOLIA, VBE IYEKE ỌNI, A GHI ZẸ EWANNIẸN YE AVBE INỌTA NA:

• De isievẹn ne etẹn nikhuo eha na la gberra iran ke sẹtin rhie obọ ye iwinna arọndẹ?

• De afiangbe eso ne iran he miẹn?

• De ẹkpotọ nọ kie ne iran ya ru sayọ vbe ugamwẹ ọghe Jehova rhunmwuda ne iran na rhie obọ ye iwinna arọndẹ?

• De vbene igiemwi esi ọghe iran ya ru iyobọ ne emwa ọvbehe hẹ?