IRUẸMWI 26
Vbọzẹ Ne Emwi Dan Kevbe Usẹ Na Gba Ehe Hia?
Ọta ne emwa mobọ nọ vbe emwi nọ wegbe gha sunu ọre: “Vbọzẹ ne emwi vbenian na sunu?” Ma ghọghọ wẹẹ, e Baibol zẹ ewanniẹn nọ khẹke ye inọta na!
1. De emwi ne Setan ru nọ ghi ya emwi dan gba agbọn na?
Setan keghi sọtẹ daa Osanobua. Ne Setan na gha hoo nọ gha kha yan emwa ọvbehe, ọ keghi ta ohoghe ma Ivi. Ohoghe na, ẹre ọ ya Adam vbe Ivi sọtẹ daa Osanobua. (Gẹnẹsis 3:1-5) Esu na ya Ivi gha roro ẹre wẹẹ, ọ mwẹ emwi nọ maan ne Jehova ma hoo nọ sẹ ọre obọ. Ọ na gha hoo nọ kọe ye iran orhiọn wẹẹ, emwa nagbọn gha he ẹmwẹ ye Osanobua obọ, ẹre iran khian na gele gha sọyẹnmwẹ. Setan keghi ta ohoghe nokaro vbe ọ tama Ivi wẹẹ, ẹi khian wu. Ọna ẹre ọ ya e Baibol tie Setan ọhọnhoghe “kevbe erha ohoghe hia.”—Jọn 8:44.
2. De azẹ ne Adam vbe Ivi ru?
Ẹi re avbiẹ emwi ẹre Jehova ya ru Adam vbe Ivi ẹse. Vbe uwu ọmọ erhan hia ni ghaa rre ogba ọghe Idẹni, ọkpa kẹkan ẹre ọ wẹẹ ne iran ghẹ re. (Gẹnẹsis 2:15-17) Sokpan iran na ye re vbọ. Ivi keghi “rhie vbe ọmọ erhan nii, ọ na rriọe.” Iyeke ọni, Adam “keghi vbe rriọe.” (Gẹnẹsis 3:6) Erriọ iran ya sọtẹ daa Osanobua. Ne Adam vbe Ivi na gha re emwa ni gbae, emwi esi na ru ma zẹdẹ gha lọghọ iran. Sokpan, vbe iran ya ekhọe obọ iran he ẹmwẹ ye Osanobua obọ, iran keghi ru orukhọ, erriọ iran ya he ọdakha ọghe Osanobua yotọ. Iran rri oya ọghe ọhanabe ye azẹ ne iran ru na.—Gẹnẹsis 3:16-19.
3. De emwi ne azẹ ne Adam vbe Ivi ru si ye ima egbe?
Adam vbe Ivi ghi ru orukhọ nẹ, iran na khian emwa ni ma gba. Emọ hia ne iran biẹlẹ na vbe khian emwa ni ma gba. Ọna ọre emwi ne Baibol tae vbekpa Adam: “Obọ orhiọnkpa kẹkan ọre orukhọ la la agbọn, orukhọ keghi rhie uwu mwẹ obọ gha dee. Emwi nọ ghi ke ẹre ikian ọrọre wẹẹ, uwu keghi sẹ egbe emwa ni rre agbọn na hia.”—Rom 5:12.
Emwi bun nọ ya ima rri oya. Ugbẹnso, ma keghi rri oya ye azẹ ne ima ru nọ ma khẹke, ra azẹ nọ ma deyọ ne emwa ọvbehe ru. Evba ma roro, a ma kọ nọ sunu, vbe ya ima rri oya.—Tie Asan-Ibo 9:11, NW.
GUALỌ OTỌ RE SAYỌ
Gia ziro yan evbọ ya ima rẹn wẹẹ, ẹi re Osanobua ẹre ọ si emwi dan kevbe usẹ nọ gba agbọn na. Gia vbe ziro yan vbene ọ ye Osanobua hẹ vbe ekhọe vbe ima ghaa rri oya.
4. Ọmwa nọ si ima fi ene ima ye na
Emwa nibun yayi wẹẹ Osanobua ẹre ọ kha yan agbọn na. Ẹmwata ẹre ọni khin ra? Kpee VIDIO na.
Tie Jems 1:13 kevbe 1 Jọn 5:19, iyeke ọni, uwa ghi ziro yan avbe inọta na:
-
Osanobua ẹre ọ si ẹre ne emwa na rri oya ra? Irẹn ẹre ọ si ẹre ne emwi dan na gba ehe hia ra?
5. Emwi na he lae miẹn ke ne Esu ke khaevbisẹ
Tie Gẹnẹsis 3:1-6, iyeke ọni, uwa ghi ziro yan avbe inọta na:
-
De ohoghe ne Setan tae?—Ghee uviẹn 4 kevbe 5.
-
De vbene Setan ya gha hoo nọ kọe ye emwa orhiọn wẹẹ, ọ mwẹ emwi nọ maan ne Jehova ma hoo nọ sẹ emwa nagbọn obọ?
-
Setan kegha hoo nọ kọe ye emwa orhiọn wẹẹ, iran gha sẹtin gha sọyẹnmwẹ, ọ gha khọnrẹn wẹẹ iran i rre ototọ ọdakha ọghe Jehova. Vbe ọ ya ru ọna hẹ?
Tie Asan-Ibo 8:9, iyeke ọni, uwa ghi ziro yan inọta na:
-
Vbọ he sunu ke na ya miẹn wẹẹ, ẹi re Jehova ẹre ọ kha yan agbọn na?
-
Emwa ni gbae ẹre Adam vbe Ivi ghaa khin. E Paradais ẹre iran ghaa ye. Sokpan iran keghi họn ẹmwẹ ne Setan, iran na sọtẹ daa e Jehova
-
Iran ghi sọtẹ nẹ, agbọn na ghi vuọn ne orukhọ, usẹ kevbe uwu
-
E Jehova gha wabọ orukhọ, usẹ kevbe uwu hin agbọn na rre. Emwa nagbọn ghi werriegbe do khian emwa ni gbae, iran ghi gha rre Paradais
6. Ọ keghi da e Jehova vbe ima ghaa susẹ
Ọ gele da Osanobua vbe ima ghaa susẹ ra? Gia ziro yan emwi ne Ọba e Devid kevbe ukọ e Pita khare vbekpa ọna. Tie Psalm 31:7 kevbe 1 Pita 5:7, iyeke ọni, uwa ghi ziro yan inọta na:
-
Vbọ ye ruẹ hẹ vbe ekhọe ne u na rẹn wẹẹ, e Jehova bẹghe oya ne ima re kevbe wẹẹ, ọ vbe dae vbe ekhọe?
7. Osanobua gha sọfurre ye ọlọghọmwa hia ne emwa nagbọn ye
Tie Aizaia 65:17 kevbe Arhie Maan 21:3, 4, iyeke ọni, uwa ghi ziro yan inọta na:
-
Vbọzẹ nọ na fu ọmwa ẹko rre, ne ima na rẹn wẹẹ, e Jehova gha sọfurre ye ọlọghọmwa ọghe emwa nagbọn hia?
U ka rẹn ra?
Vbe Setan ta ohoghe nokaro, ọ keghi sa ọrho ye eni e Jehova. Ọ na do ya emwa gha roro ẹre wẹẹ, obọ dan ẹre Jehova ya mu emwa nọ kha yan. E Jehova gha do sọfurre ye ọlọghọmwa ọghe emwa nagbọn, ọ ghi kpe eni ẹnrẹn huan. Ọ ghi rhie ẹre ma wẹẹ, odẹ ne irẹn ya khaevbisẹ, ẹre ọ maan sẹ. Emwi nọ ghi ru ekpataki sẹ vbe agbọn vbe ẹrinmwi, ọre na ya eni e Jehova khian nọhuanrẹn.—Matiu 6:9, 10.
EMWA ESO KEGHI KHA WẸẸ: “Emwamwa ọghe Osanobua nọ, ne ima gha susẹ.”
-
Vbua khian tama ọmwa vberriọ?
OLIKA ẸMWẸ
Esu, Adam kevbe Ivi, ẹre ọ wa si emwi dan nọ gba agbọn na. Ọ keghi da e Jehova vbe ima ghaa susẹ. Vbe nẹi khian ghi kpẹẹ gbe, ọ gha sọfurre ye ọlọghọmwa hia ne ima ye.
Ogbewerriẹ
-
De ohoghe ne Esu tama Ivi?
-
De emwi ne isọtẹ ọghe Adam vbe Ivi si ye ima hia egbe?
-
Vbọ ya ima rẹn wẹẹ, ọ da e Jehova vbe ima ghaa susẹ?
RUẸ SAYỌ
Ghee vbene Baibol ya rhan otọ emwi na ya orukhọ kha.
Ruẹ sayọ vbekpa vbene Esu ya si e Jehova evẹn hẹ vbe ogba ọghe Idẹni.
“Vbọzẹ Ne Osanobua Na Kue Ne Emwa Gha Susẹ?” (The Watchtower, January 1, 2014)
Ghee ewanniẹn nọ fu ọmwa ẹko rre, ne Baibol rhie ye inọta ọkpa nọ kpokpo emwa vbe orhiọn.
Ghee vbene okpia ọkpa ya do rẹn evbọzẹe ne emwa na rri oya.
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
