E Jezibẹl ghaa mwẹ ọmọ okhuo ọkpa na tie ẹre Atalaia, nọ wa vbe guẹ emwi dan ne iyẹe guẹ. Atalaia keghi rọnmwẹ ọba ọghe Juda. Vbe ọdafẹn ọnrẹn ghi wu nẹ, ovbi ẹre na suẹn gha kha. Sokpan vbe ovbi ẹre ghi wu, Atalaia keghi ya egbe ẹre khian ọba ọghe Juda. Ọ na gha hoo nọ wabọ uniẹn ọghe ọba nii hia rua, uhiẹn ya sẹ egbe avbe eyẹ ọre, na ghẹ mieke na miẹn ọmwa nọ khian ghi rri ọba. Emwa hia na gha mu ohan okhuo na vbe otọ e Juda.

Ogiohẹn ighẹ e Jehoiada kevbe amwẹ ọnrẹn ighẹ e Jehosiba ma rhie obọ ba emwi dan ne Atalaia ru na. Iran keghi mu arrọọ ọghe iran ye ikpadede, iran na mu e Jehoas nọ re eyẹ ọghe Atalaia lẹẹ gha rrie ọgua Osa; evba ẹre ọ na ghi waan.

Vbe Jehoas ghi sẹ ukpo ihinrọn nẹ, e Jehoiada keghi si avbe ọkaolotu kevbe Ivbi e Livai koko, ọ na tama iran wẹẹ: ‘Uwa gha bodẹ, ne uwa ghẹ gi ọmwa rhọkpa la ọgua Osa na.’ Ẹre Jehoiada na ghi mu ẹde ye uhunmwu e Jehoas, ọ na ma re ọba ọghe Juda. Ẹre Ivbi e Juda na ghi kha wẹẹ: ‘Ọba gha tọ, ọ kpẹẹ re!’

Vbe Oloi Atalaia ghi họn owogho ọghe emwa, ọ na rhulẹ gha rrie ọgua Osa. Vbe ọ ghi bẹghe ẹre wẹẹ e Juda mwẹ ọba ọgbọn nẹ, ọ na datu wẹẹ: ‘Isọtẹ! Isọtẹ!’ Avbe ọkaolotu nii keghi mu Atalaia kpa, iran na ya gbe ẹre rua. Sokpan vbe a khian ghi ruẹ hẹ nia, ugbẹnvbe ọ kẹ ọre ya si emwa nibun vbe agbẹnvbo nii, la ugamwẹ igẹbọ nẹ?

E Jehoiada keghi ru iyobọ ne emwa rẹn, ne iran ya ta ile ma e Jehova wẹẹ, irẹn ọkpa ẹre iran khian ga. E Jehoiada keghi wẹẹ ne emwa guọghọ ọgua ọghe Bel rua. Ọ keghi tama avbe ohẹn  kevbe Ivbi e Livai ne iran dọlọ ọgua Osa yi, ne iran mieke na sẹtin werriegbe gha ga e Jehova vba. Ọ keghi viọ avbe ọbodẹ ye onurho ọgua Osa, ne ọmwa nọ ma huan ghẹ mieke na sẹtin laọ. Ẹre Jehoiada kevbe avbe ọkaolotu na ghi rhie Jehoas gha rrie ẹguae, ne ọ ya tota ye ẹkete. Ivbi e Juda na gha ghọghọ. Te iran ghi sẹtin ga e Jehova nia, ugbẹnvbe a miẹn wẹẹ Atalaia ne ọmwa dan kevbe uyinmwẹ igẹbọ i ghi rrọọ. U ma bẹghe vbene udinmwẹ ọghe Jehoiada ya ru iyobọ ne emwa nibun hẹ?