IRUẸMWI 50
E Jehova Keghi Gbinna Ne Jehosiafat
E Jehosiafat ne ọba ọghe Juda keghi guọghọ aka ọghe Bel kevbe ẹbọ hia ni rre otọ e Juda. Ọ na gha hoo ne emwa ọghẹe rẹn uhi ọghe Jehova. Rhunmwuda ọni, ọ keghi gie avbe okoro kevbe Ivbi e Livai ne iran ya maa emwa rẹn, uhi ọghe Jehova.
Ohan ma gi agbẹnvbo ni lẹga e Juda do gu iran khọn rhunmwuda ne Jehova na gha rre iran iyeke. Iran na kue gha hako gie Ọba e Jehosiafat. Sokpan Ivbi e Moab, Ivbi Amọn kevbe Ivbi Idọm keghi do gu e Juda khọn. E Jehosiafat rẹnrẹn wẹẹ, irẹn gualọ iyobọ ọghe Jehova. Ẹre ọ na si emwa hia koko vbe Jerusalẹm. Ọ na sirra iran hia na erhunmwu wẹẹ: ‘E Jehova, vbe ẹi re te u mudia ne ima, ma i khian sẹtin khọn miotọ. Lahọ, tama ima emwi ne ima gha ru.’
E Jehova keghi wanniẹn wẹẹ: ‘Uwa ghẹ gi ohan mu uwa. I gha ru iyobọ ne uwa. Uwa mudia gbain vbe ehe ne uwa ye, ne uwa ghee vbene I khian ya miẹn uwa fan hẹ.’ De vbene Jehova ya miẹn iran fan hẹ?
Vbe ẹdẹ ghi gbe, e Jehosiafat keghi viọ emwa ni gua so ihuan gha rrie odaro okuo vbe ehe na tiẹre Tekoa, vbene ivbi iyokuo ọghe iran na gha rre iyeke.
Zẹvbe ne iran ya gha so ihuan urhomwẹ gie Jehova vbe urhu nọ lae, e Jehova keghi gbinna ne iran. Ọ keghi si olighi ye uwu ẹbu Ivbi e Moab kevbe Ivbi Amọn, iran na suẹn gha gbele egbe iran rua. Sokpan e Jehova keghi gbogba ga Ivbi e Juda hia kevbe avbe ohẹn. Agbẹnvbo ni lẹga iran keghi họn okhekhe ọghe vbene Jehova ya gbinna ne emwa rẹn hẹ. Odẹ ughughan ẹre Jehova ya miẹn emwa rẹn fan. Irẹn i gualọ iyobọ emwa nagbọn, ọ ke sẹtin ru vberriọ.
“Ẹi re uwa ẹre ọ khian khọn okuo na. Uwa mudia gbain vbe ehe ne uwa ye, ne uwa ghee vbene Jehova khian ya miẹn uwa fan hẹ.”—2 Krọnikol 20:17, NW
