Vbe iyeke Okuo Amẹ nii, ivbi e Noa keghi biẹlẹ emọ nibun. Vbene iran ya gha bun vbe ẹgbẹe, erriọ iran ya ghae egbe ye ehe ughughan vbe uhunmwu otagbọn zẹvbe ne Jehova wẹẹ ne iran ru ẹre.

Sokpan eso vbọ ma họn ẹmwẹ ne Jehova. Iran na kha wẹẹ: ‘Gi ima bu ẹvbo ye emwa. Ma ghi do bọ owa nọkhua nọ gha yo sẹ orere iso. Emwa hia ghi do gha họn usi ima rre.’

 Ẹko ma rhiẹnrhiẹn e Jehova ye emwi ne iran ru na, rhunmwuda ọni, ọ na wẹẹ irẹn gha dobọ re yi. Uwẹ rẹn vbene Jehova ya ru ẹre hẹ ra? Ọ na ruẹ ne iran suẹn gha zẹ urhuẹvbo ughughan. Ugbẹnvbe iran ma ghi sẹtin gha gu egbe guan, iran na ghi dobọ iwinna nii yi. A na do gha tie ẹvbo nii e Babẹl. Emwi ne eni ẹvbo nii rhiema ọre “Ezagha.” Emwa na ghi kpa hin ẹvbo nii rre gha rrie ehe ughughan vbe uhunmwu otagbọn. Sokpan iran na ye gha ru emwi dan vbe ehe ne iran ye. Ọmwa ye gha rrọọ nọ hoẹmwẹ e Jehova vbe ẹghẹ nii ra? Ma gha ziro yan ọni vbe uhunmwuta nọ lelẹe.