Ẹghẹ hia ẹre Jọn ya gha tae wẹẹ: ‘Ọmwa nọ sẹ mwẹ dee.’ Vbe Jesu ghi rre ukpo 30, ọ na ke Galili gha rrie Ẹzẹ e Jọdan, ehe ne Jọn na gha dinmwi emwa ye amẹ. Jesu na wẹẹ ne Jọn dinmwi irẹn ye amẹ, sokpan e Jọn keghi kha wẹẹ: ‘I ma sẹ nọ gha dinmwi ruẹ ye amẹ. Uwẹ ẹre ọ khẹke nọ dinmwi imẹ ye amẹ.’ Jesu keghi tama rẹn wẹẹ: ‘E Jehova hoo ne u dinmwi mwẹ ye amẹ.’ Ẹre iran na ghi la uwu Ẹzẹ e Jọdan, e Jọn na ghi dinmwi ẹnrẹn ye uwu amẹ fo fẹfẹfẹ.

Vbe Jesu ghi ladian vbuwe amẹ, ọ keghi na erhunmwu. Vbe ọwarọkpa nii, ẹrinmwi keghi kie yotọ, orhiọn ọghe Osanobua keghi tuorre yan Jesu vbe na ghee idu. Ẹre Jehova na ghi guan ke orere ẹrinmwi rre wẹẹ: “Wẹ ọre ovbi mwẹ ne I hoẹmwẹ ọnrẹn, ọmwa ne ekhọe mwẹ rhiẹnrhiẹn ghe ẹsẹsẹmwẹse.”

Orhiọn nọhuanrẹn ọghe Jehova ghi tuorre yan Jesu nẹ, ọ na ghi khian e Kristi ra e Mezaia. Nia, te irẹn khian ghi suẹn iwinna ne Jehova gie ẹre ne ọ do ru vbe agbọn.

Vbe Jesu ghi dinmwiamẹ nẹ, ọ na ya gbe ikpẹdẹ 40 vbuwe ato. Vbe ọ ghi ke uwu ato rre, ọ na ya miẹn e Jọn. Vbe Jọn ghi bẹghe Jesu, ọ na kha wẹẹ: ‘Ọna ọre Oteghe Ohuan ọghe Osanobua nọ do rhie orukhọ hin agbọn na rre.’ Te Jọn ta ẹmwẹ na, ne ọ ya gi emwa rẹn wẹẹ Jesu ọre ne Mezaia. Uwẹ rẹn emwi nọ sunu dae Jesu vbe ẹghẹ ne ọ ya gha rre uwu ato ra? Gi ima gualọ otọre.