IRUẸMWI 83
Jesu Ya Evbare Koko Ọkhọngborrie Emwa
A ke do Ugie Alagberra vbe ukpo 32 C.E., avbe ukọ ọghe Jesu keghi ke ehe ne iran na ya kporhu rre. Jesu ghi bẹghe ẹre wẹẹ egbe wọọ iran, ọ na wẹẹ ne iran lae okọ gha rrie Bẹtsaida ne iran ya hẹwẹ. Sokpan iran ke sẹ eke ne iran rrie, Jesu keghi miẹn vbe ọkhọngborrie emwa bi lele iran dee. Ọ ma khulo iran, agharhemiẹn wẹẹ, ọ te gha hoo ne irẹn vbe avbe ukọ ọghẹe gualọ ehe na hẹwẹ. Ọ keghi mu iran ni khuọnmwi egbe rran. Ọ na vbe maa iran emwi vbekpa Arriọba Osanobua. Ẹdẹ ohoho ẹre Jesu wa ya maa iran emwi. Vbe ọ ghi rre ẹghẹ ota, avbe ukọ ọghẹe na do tama rẹn wẹẹ: ‘Ẹi mwẹ ohanmwẹ ma gha gbe iran nẹ. Gi iran kpa, ne iran ya gualọ evbare re.’
Jesu keghi wanniẹn iran wẹẹ: ‘Wa ghẹ gi iran kpa. Wa gualọ evbare ne iran.’ Iran na ghi nọ Jesu wẹẹ: ‘Te uwẹ ghi wẹẹ, ne ima ya dẹ ebrẹdi ne iran ra?’ E Filip keghi kha wẹẹ: ‘Ma na dobọ gha mwẹ igho, ma i sẹtin dẹ evbare nọ gha vuọn iran na ẹko.’
Ẹre Jesu na nọ iran wẹẹ: ‘De evbare ne ima mwẹ?’ Andru keghi wanniẹn wẹẹ: ‘Ma mwẹ ebrẹdi isẹn kevbe ehẹn ne giẹrẹ eva. Ọni i mwẹ eke nọ khian sẹ.’ Ẹre Jesu na wẹẹ: ‘Wa viọ re rre.’ Jesu keghi tama ọkhọngborrie emwa nii, ne iran tota lele irunmwu. Ọ na ghae iran ye ẹbu ughughan. Ẹbu eso kegha re 50, vbene eso na gha re 100. Jesu keghi viọ ebrẹdi vbe ehẹn nii vbe obọ ukọ ọghẹe. Ọ keghi tọn aro mu ghee odukhunmwu, gha na erhunmwu gie Osanobua. Ọ na mu nene evbare ne avbe ukọ ọghẹe, ne iran ghae re ne ọkhọngborrie emwa nii. Ikpia 5,000, deba ikhuo nibun kevbe ivbi iran ẹre ọ rri nene evbare. Te ẹko wa vuọn iran hia. Vbe iyeke ọni, avbe ukọ ọghẹe keghi si evbare nọ kẹre koko. Ehia keghi vuọn okhuae 12! Ẹi re emwi ọyunnuan ni khin?
Ọkhọngborrie emwa nii kegha hoo ne iran ma Jesu ọba rhunmwuda emwi ọyunnuan nọ ru. Sokpan Jesu rẹnrẹn wẹẹ, ọ ma he sẹ ẹghẹ ne Jehova khare. Rhunmwuda ọni, ọ na wẹẹ ne iran gha rrie owa. Ọ na tama ukọ ọghẹe wẹẹ, ne iran fian Okun e Galili rra gha rrie obọ nọkpa. Ukọ ọghe Jesu na la okọ kpa, vbene Jesu na gha rrie uhunmwu oke. De emwi nọ si ẹre ne ọ ma na lele iran? Te Jesu ghaa gualọ eke nọ furre, nọ khian na na erhunmwu. Agharhemiẹn wẹẹ emwi bun ne Jesu ghaa ru, te ọ ye gha zẹ ẹghẹ kọ ya na erhunmwu.
“Wa ghẹ miẹn ẹsọn ye evbare ne ọ sẹtin rhia, sokpan emwi ne ọ kere ne uwa miẹn ẹsọn yi ọre evbare ne ọ sẹtin gha rrọọ ya sẹ agbọn etẹbitẹ. Ovbi ọmwa gha rhie evbare na ne uwa.”—Jọn 6:27
