Vbene ẹghẹ ya gha khian, e Bẹlsiaza na do gha kha yan e Babilọn. Vbe asọn ọkpa, ọ na gie na tie arriaisẹn emwa ni hiunsi vbe otọ nii, ne iran do deba irẹn rri evbare ọbọbọtizọ. Ọ na wẹẹ ne eguọmwadia ọghẹe viọ re ladian ighẹ ukpu igoru ne Nebukiadnẹza viọ ke ọgua Osa rre. Ukpu igoru nii ẹre Bẹlsiaza vbe emwa ne ọ gie na tie, ya gha wọn ayọn. Vbe udemwurri, obọ ọkpa keghi ladian, ọ na gha vinnọ emwi na ma rẹn otọre ye egbe ekẹn.

Orrirri na gbe kue Bẹlsiaza. Ọ na gie na tie avbe ọbo edunna ọghẹe hia, ọ na yan ma iran wẹẹ: ‘Ọmwaikọmwa nọ sẹtin rhan otọ ẹmwẹ na, I gha muẹn ye ukpo ọghe azukpogieha vbe Babilọn.’ Vbene iran hia sẹ, a ma miẹn ọmwa nọ sẹtin rhan otọ ẹmwẹ nii. Ẹre iye ọba na do tama ọba wẹẹ: ‘Ọ mwẹ okpia ọkpa na tie ẹre Daniẹl nọ ghaa rhan otọ egbe emwi vbenia ma Ọba e Nebukiadnẹza vbe ẹghẹ nii. Ọ gha vbe sẹtin rhan otọre ma ruẹ.’

Vbe Daniẹl ghi sẹ eke ne ọba ye, ọba na tama rẹn wẹẹ: ‘Adeghẹ u na sẹtin tie ẹmwẹ na, u na vbe rhan otọre ma mwẹ, I gha mu emwi urhu ọghe igoru yọ ruẹ urhu, u ghi gha re azukpogieha vbe otọ arriọba mwẹ.’ E Daniẹl keghi tama rẹn wẹẹ: ‘I gha rhan otọre ma ruẹ, ọ gha khọnrẹn wẹẹ u ma san mwẹ ẹse. Ọmwa itengbemu ẹre erhaa e Nebukiadnẹza ghaa khin, sokpan e Jehova na gbe ẹre kotọ. Uwẹ tobọ ruẹ rẹn emwi nọ sunu daa erhaa, u na ye he ẹmwẹ ye Jehova obọ, u na gha ya ukpu ọghe igoru na viọ ke ọgua ọghẹe rre wọn ayọn. Ọni ẹre ọ si ẹre ne Osanobua na gbẹn ẹmwẹ na, nọ khare wẹẹ: Mẹnẹ, Mẹnẹ, Tẹkẹl, kevbe Parsin. Ẹmwẹ na rhiema wẹẹ Ivbi e Medis kevbe Pẹsia gha khọnmiotọ yan e Babilọn, iran ghi miẹn ruẹ ukpo ọba.’

Vbe ẹghẹ na kha na, ọ na yevbe na miẹn wẹẹ, ai khian sẹtin khọnmiotọ yan e Babilọn. Te ogba ekẹn lẹga ẹvbo nii, erriọ amẹ vbe ya gbodin lẹga re. Asọn nii ẹre Ivbi e Medis kevbe Pẹsia la e Babilọn. E Sairọs ne ọba ọghe  Pẹsia keghi loo ivbi iyokuo ọghẹe ya si amẹ nọ gbodin lẹga e Babilọn, nọ gha lẹẹ ye ehe ọvbehe, ne iran mieke na sẹtin ya owẹ fian ẹzẹ nii rra. Vbe iran ghi sẹ onurho ẹvbo e Babilọn, ọ na kie yotọ! Iran keghi bi laọ, iran na khọn ẹvbo nii mu tan, iran na vbe gbe ọba ọghe iran rua. E Sairọs na do gha re ọba ọghe Babilọn.

Vbe ọ ma he sẹ ukpo ọkpa, e Sairọs keghi yae wewe wẹẹ: ‘E Jehova tama mwẹ ne I ya werriegbe bọ ọgua Osa nọ rre Jerusalẹm. Ọmwaikọmwa nọ hoo ne irẹn ya ru iyobọ, sẹtin werriegbe gha rrie Jerusalẹm.’ Ivbi e Ju nibun keghi werriegbe gha rrie ẹvbo iran, vbe ọ ghi gba vbe ukpo 70 na guọghọ e Jerusalẹm; ọna keghi guaero ẹmwẹ akhasẹ ne Jehova tae yotọ. E Sairọs na werriegbe viọ re gha rrie ọgua Osa vbe Jerusalẹm ighẹ ukpu ọghe igoru kevbe esiliva ne Nebukiadnẹza te viọ. U ma bẹghe vbene Jehova ya loo e Sairọs ya ru iyobọ ne emwa rẹn hẹ?