Ukpo 1983 ẹre a biẹ mwẹ. Emwi hia wa gha maan mẹ vbe I waan dee. Sokpan vbe I ghi rre ukpo igbe, egbe mwẹ hia na suẹn gha khia mwẹ. Vbe I ghi rhiọrre vbe owiẹ vbe ẹdẹ ọkpa, I ma sẹtin tọn owẹ mu. Ẹghẹ na kha na, odẹ ukpo iweva ẹre I ghaa ye. Owẹ mwẹ ma ghi gha guọ otọ. Erriọ ẹre I ghi ya khian uke. Rhunmwuda emianmwẹ nii, I ma ghi waan gberra vbene I waan sẹ vbe ẹghẹ nii, ọni ẹre ọ si ẹre ne I na ye tẹkpu vbe ẹdẹnẹrẹ.

Ke ẹghẹ nii kpa, I ma ghi sẹtin gha kpa hin owa rre. Vbọ ghi rre uki eso vba, ikhuo eva ni re Osẹe Jehova na kporhu sẹ owa ima. Erhunmwuyẹn gha te rrie owa ima vbenian, I ghi ya lẹre. Sokpan ẹdẹ ne iran kporhu sẹ owa ima, I na danmwehọ iran. Vbe iran ghi tama mwẹ vbekpae Paradais, I na ya yerre, emwi eso ne I họn vbe ẹghẹ ne I na gha rre odẹ ukpo isẹn. Vbe ẹghẹ nii, ọ ghaa mwẹ arọndẹ ọkpa na gie yo isi, na tie ẹre Jethro nọ ghaa ga vbe Suriname. Uhukpa vbe uki ẹre ọ ya gha sẹ igue ọghe ima, ọ gha rre, ọ ghi vbe gu erha mwẹ ruẹ e Baibol. Ọ wa gha ya obọ esi mu mwẹ, erriọ I vbe ya hoẹmwẹ ọnrẹn. Erha mwẹ nọkhua kevbe iye mwẹ nọkhua ghaa yo iko ne Avbe Osẹe Jehova ghaa do vbe igue ọghe ima vbe ẹghẹ nii. Ugbẹnso, iran ghaa khian, iran ghi rhie mwẹ lele egbe. Ena hia ẹre ọ si ẹre ne I na wa kue yọ, vbe ẹghẹ ne ọkpa vbe ikhuo nii nọ do kporhu ma mwẹ, na tie ẹre Florence ya nọ mwẹ, deghẹ I gha hoo ne iran do gha gu mwẹ ruẹ e Baibol.

Vbọ ma he kpẹẹ vba, e Florence na rhie ọdafẹn ọnrẹn ighẹ Justus lele egbe gha dee, ne iran do suẹn gha gu mwẹ ruẹ e Baibol. Vbe iran ghi bẹghe ẹre wẹẹ, I i gua tie ebe, iran na suẹn gha maa mwẹ re. Vbene ẹghẹ ya khian, I na do sẹtin gha tie ebe ẹse. Vbọ ghi rre ẹdẹ ọkpa, iran keghi tama mwẹ wẹẹ, e Suriname ẹre iran khian ghi na gha ga. Ọ na wa gha da mwẹ, rhunmwuda, Osẹe Jehova rhọkpa ma gha rre Orealla, nọ khian ghi gha gu mwẹ ruẹ e Baibol. Sokpan, I ghọghọ wẹẹ, e Jehova ma mianmian mwẹ.

Vbọ ma he kpẹẹ vba, ọtẹn nokpia ọkpa na tie ẹre Floyd nọ re arọndẹ, keghi sẹ igue ọghe ima. Vbe ọ ghi kporhu sẹ owa ima vbe ẹdẹ ọkpa, ọ na nọ mwẹ deghẹ I gha hoo ne I gha ruẹ e Baibol. Ẹre I na gha muẹnmuẹn ogiẹ. Ọ na ghi nọ mwẹ wẹẹ: “Vbọzẹe ne u na muẹnmuẹn ogiẹ?” I na ghi tama rẹn wẹẹ, I ruẹ ebe ẹmu na tie ẹre De Emwi ne Osanobua Hoo Vbe Obọ Mwa? fo nẹ, I te vbe suẹn gha ruẹ Knowledge That Leads to Everlasting Life nẹ, * sokpan rhunmwuda ne ọtẹn nọ gu mwẹ ruẹ emwi na kpa, ẹre ọ si ẹre ne I na ghi dobọ yi. E Floyd ẹre ọ ghi gu mwẹ ruẹ ebe na fo. Vbọ ma he vbe kpẹẹ vba, e Floyd na vbe kpa, ọ na ya gha ga vbe ẹvbo ọvbehe. Ke ẹghẹ nii kpa, I ma ghi vbe miẹn ọmwa nọ khian gha gu mwẹ ruẹ e Baibol.

 Sokpan vbọ ghi rre 2004, etẹn nikpia eva na tie ẹre Granville kevbe Joshua ni re arọndẹ ne kpataki keghi do ga vbe Orealla. Iran ghi vbe kporhu sẹ owa ima, iran na vbe nọ mwẹ deghẹ I gha hoo ne I gha ruẹ e Baibol. I na vbe gha muẹnmuẹn ogiẹ. I na ghi tama iran ne iran werriegbe gu mwẹ ruẹ Knowledge book ke omuhẹn ya sẹ ufomwẹ. Te I ghaa hoo ne I rẹn deghẹ emwi ne etẹn nikẹre ka maa mwẹ re, ẹre iran khian vbe maa mwẹ re. E Granville keghi tama mwẹ wẹẹ, iran do iko vbe igue ọghe ima. Vbe ẹghẹ na kha na, te ọ khian ghi gba vbe ukpo igbe ne I ma he ya kpa hin owa rre. Ọrheyerriọ, I na gha hoo ne I yo. Ẹre Granville na do ya e wheelchair mu mwẹ gha rrie Ọgua Arriọba.

Vbene ẹghẹ ya khian, e Granville na wẹẹ ne I rhiegbe ladian, ne I gha mwẹ obọ vbe Owebe Ukhamwẹ Osa. Ọ na wẹẹ: “Ẹmwata nọ wẹẹ, u i sẹtin khian, sokpan u sẹtin guan. I rẹnrẹn wẹẹ vbe ẹdẹ ọkpa, u gha hin uhunmwu ogiukpo, u ghi gha ya ọta azagba guan. I mwẹ ilẹkẹtin wẹẹ, ọ gha gele sunu vberriọ.” Ẹmwẹ igiọdu nii keghi rhie ẹtin yọ mwẹ iwu.

I na ghi suẹn gha lelẹe yo ikporhu. Sokpan, odẹ nibun vbe igue ọghe ima i maan, rhunmwuda ọni, I ma sẹtin gha ya e wheelchair lae. Ẹre I na ghi tama Ọtẹn Nokpia Granville nọ gha ya e wheelbarrow mu mwẹ yo ikporhu. Ọni ẹre ọ ghi zẹe ighẹ I sẹtin gha ladian vbe ikporhu. Vbọ ghi rre April 2005, I na ghi dinmwiamẹ. Vbọ ma he kpẹẹ vba, etẹn keghi maa mwẹ re, vbene a ya gbaroghe avbe ebe ọghomwa kevbe amigbo vbe Ọgua Arriọba.

Vbe 2007, emwi nọ wegbe keghi sunu. Vbe erha mwẹ ghi rre uwu okọ vbe ẹdẹ ọkpa, ọ na miẹn odekun, nọ ghi do miẹn ọnrẹn uhunmwu. Iro na wa han imẹ vbe ẹgbẹe mwẹ. E Granville keghi ya e Baibol rhie ifuẹko ne ima, ọ na vbe gu ima na erhunmwu. Vbọ ghi vbe rre ukpo eva vba, okọ ne Granville la re na ni vbuwe ẹzẹ; evba nii ẹre ọ la. Te ẹmwẹ uwu ọghe Granville wa da ima hia sẹ ugboloko.

Etẹn hia ni rre uwu iko kegha khiẹ. Ma i ka bun vbe iko ọghe ima, Granville nọ re ọdiọn ọkpa kẹkan ne ima te mwẹ, na vbe wu sẹ ima rae. Ọguọmwadia iwinna ọkpa ẹre ima ghi gha mwẹ. Uwu ọghẹe wa kakabọ da mwẹ, rhunmwuda, ọse mwẹ ne kankankan ghaa nọ. Irẹn ẹre ọ ru iyobọ mẹ ya deziẹn vbe odẹ ọghe orhiọn, irẹn ẹre ọ vbe gha re obọ mwẹ kevbe owẹ mwẹ. Vbe iko nokaro ne ima do vbe Granville ghi wu nẹ, mẹ ẹre ọ ghaa tie ebe Owa Ọkhẹ vbe ẹdẹrriọ. I ghi sẹtin tie okhuẹn nokaro kevbe nogieva nẹ, I ma rẹn ẹghẹ ne ameve ya suẹn gha ladian vbe aro mwẹ, I na gha viẹ. I ma ghi sẹtin tie ebe Owa Ọkhẹ fo vbe ẹdẹrriọ, I na ghi tuorre vbe uhunmwu ogiukpo.

Osa khian ghi ya uki dọlọ asọn, etẹn eso ni ke iko ọvbehe rre na do ru iyobọ ne ima vbe Orealla. Deba ọni, abotu keghi gie ọtẹn nokpia ọkpa na tie ẹre Kojo nọ re arọndẹ ne kpataki gha die ẹvbo ima. Ẹi vbe re ọni ọkpa, iye mwẹ kevbe ọtẹn mwẹ nokpia ọkpa ne kherhe na suẹn gha ruẹ e Baibol. Vbọ ma he kpẹẹ vba, iran na dinmwiamẹ. Vbọ ghi rre March 2015, I na suẹn gha ga zẹvbe ọguọmwadia iwinna. Vbọ ma he vbe kpẹẹ vba, I na ya ọta azagba guan. I na ya yerre emwi ne Granville tama mwẹ vbe ukpo eso nọ gberra, nọ na wẹẹ: “I rẹnrẹn wẹẹ vbe ẹdẹ ọkpa, u gha hin uhunmwu ogiukpo, u ghi gha ya ọta azagba guan. I mwẹ ilẹkẹtin wẹẹ, ọ gha gele sunu vberriọ.” I ghi ye ẹmwẹ na rre, ameve na rrọọ kua vbe aro mwẹ.

I ghaa ghee JW Broadcasting^®, I keghi miẹn etẹn nikpia kevbe etẹn nikhuo ni werriẹ aro daa egbe isievẹn ne imẹ vbe werriẹ aro daa. Agharhemiẹn wẹẹ, egbe ma gba ne iran, iran ye ya oghọghọ ga e Jehova. Mẹ gha vbe sẹtin gha yerriọ. I hoo ne I hia vbene ẹtin mwẹ sẹ vbe ugamwẹ e Jehova, ọni ẹre ọ si ẹre ne I na rhiegbe ye iwinna arọndẹ ọghe ẹghẹ hia. Vbọ ghi rre September 2019, ukpamuyọmọ ne I ma te zẹdẹ yaro yi keghi sẹ mwẹ obọ. I na suẹn gha ga zẹvbe ọdiọn vbuwe iko. Odẹ orhunmwu 40 ẹre ọ ya iyẹn wewe vbe iko ọghe ima.

I wa gbọyẹmwẹ ye ẹrhiọn ne etẹn loo ro ya gu mwẹ ruẹ e Baibol, kevbe odẹ ne iran ya ru iyobọ mẹ ya deziẹn vbe odẹ ọghe orhiọn. Sẹ ehia, I kpọnmwẹ e Jehova nọ ma na mianmian mwẹ.