1. Vbọ mobọ ta vbene uyinmwẹ ima ye hẹ?

 Ọ GHA khọnrẹn wẹẹ te ima da dinmwiamẹ, ra ọ kpẹẹ re ne ima ghi dinmwiamẹ, ma hia wa hoo ne ima gha mwẹ uyinmwẹ ni yẹẹ e Jehova. Emwi nọ gha ru iyobọ ne ima, ọre ne ima gha dia iziro ọghe ima. Vbe ima gu kha vberriọ? Rhunmwuda emwi ne ima mu roro ẹre ọ mobọ ta vbene uyinmwẹ ima ye hẹ. Deghẹ emwi dan ẹre ima mu roro vbe ẹghẹ hia, ẹmwẹ dan ẹre ọ khian vbe gha ke ima unu ladian, erriọ ima khian vbe ya gha ru emwi dan. (Ẹfis 4:​17-19) Sokpan, deghẹ emwi esi ẹre ima mu roro vbe ẹghẹ hia, ma ghi sẹtin gha ta ẹmwẹ ni yẹẹ e Jehova, ma ghi vbe sẹtin gha ru emwi ni ya ẹko rhiẹnrhiẹn ọnrẹn.​—Gal 5:16.

2. De avbe ọta ne ima khian rhie ewanniẹn yi vbe ako iruẹmwi na?

² Zẹvbe ne ima ruẹ ọre vbe ako iruẹmwi nọ lae, ma i khian sẹtin ru ẹre ne iziro dan ghẹ zẹdẹ la ima ekhọe. Sokpan deghẹ ima gha gi iziro dan gbọzinian vbe ekhọe ima, obọ ima ẹre ọ ye. Vbene ọmwa te dinmwiamẹ, ọ ma khẹke nọ ye gha ta ẹmwẹ ni sọnnọ e Jehova, ọ ma vbe khẹke nọ ye gha ru emwi nẹi ya ẹko rhiẹnrhiẹn ọnrẹn. Ọna ọre owẹ nokaro ne ọmwa gha zẹ, deghẹ ọ hoo nọ ban egbe nẹdẹ mu fua. Vbọrhirhighayehẹ, ne ima mieke na gele sẹtin ya ẹko rhiẹnrhiẹn e Jehova, te ọ khẹke ne ima gha lele iyi na, nọ khare wẹẹ: ‘Wa mu egbe ọghe ọgbọn yọ.’ (Kọl 3:10) Vbe ako iruẹmwi na, ma gha rhie ewanniẹn ye avbe ọta na: Vbọ re ‘egbe ọghe ọgbọn’? Vbe ima khian ya sẹtin gha mu egbe ọghe ọgbọn yọ vbe ẹghẹ hia?

3. Zẹvbe nọ rre Galatia 5:​22, 23, vbọ re ‘egbe ọghe ọgbọn’ kevbe wẹẹ, de vbene ọmwa ya mu egbe ọghe ọgbọn yọ hẹ?

³ Evba yae kha na mu ‘egbe ọghe ọgbọn’ yọ, ọre ne iziro ọghe ima kevbe uyinmwẹ ima gha rhie ẹre ma wẹẹ, ma ya egbe taa e  Jehova. Ọmwa nọ mu ‘egbe ọghe ọgbọn’ yọ, ọre ọmwa nọ mwẹ avbe uyinmwẹ esi ne orhiọn nọhuanrẹn ọghe Osanobua ya ọmwa mwẹ, ọni nọ wẹẹ, ọ ghi gi orhiọn nọhuanrẹn gha dia iziro ọghẹe kevbe emwi nọ ru. (Tie Galatia 5:​22, 23.) Vbe igiemwi, ọ ghi hoẹmwẹ e Jehova kevbe emwa rẹn. (Mat 22:​36-39) Ọ ghi ye gha sẹ ọyẹnmwẹ, uhiẹn vbọ ghaa rre uwu ọlọghọmwa. (Jems 1:​2-4) Ọ ghi vbe gha re ọmwa nọ gualọ ọfunmwegbe. (Mat 5:9) Ọ ghi gha mwẹ izinegbe vbe egbe emwa ọvbehe, ọ ghi vbe gha ya obọ esi mu emwa. (Kọl 3:13) Emwi esi na ru ghi vbe gha yẹẹ ọre. (Luk 6:35) Emwi nọ ru ghi gha rhie ẹre ma wẹẹ, ọ gele mu ẹtin yan e Jehova. (Jems 2:18) Ọmwa gha ru emwi nọ sọnnọ rẹn, ọ ghi gbe ibiẹ rrie, ọ ghi vbe sẹtin dia egbe ẹre, vbọ gha miẹn edanmwẹ.​—1 Kọr 9:​25, 27; Taitọs 3:2.

4. Ne ima mieke na sẹtin mu egbe ọghe ọgbọn yọ, vbọzẹ nọ na khẹke ne ima gha mwẹ avbe uyinmwẹ hia na ya unu kaẹn vbe Galatia 5:​22, 23?

⁴ Ne ima mieke na sẹtin mu egbe ọghe ọgbọn yọ, ọ khẹke ne ima hia ne ima gha mwẹ avbe uyinmwẹ hia na ya unu kaẹn vbe ebe Galatia 5:​22, 23, kevbe avbe ako ọvbehe vbe Baibol. * Vbọzẹ? Rhunmwuda te ọ khẹke ne ọmwa nọ mwẹ ọkpa vbe avbe uyinmwẹ na, vbe gha mwẹ nikẹre. Vbene ọta ye, u gha gele hoẹmwẹ ogieva ruẹ, u ghi gha mwẹ izinegbe vbe egbe ẹre, u ghi vbe gha ya obọ esi muẹn. Deba ọni, ọmwa esi ẹre ọ sẹtin gbe ibiẹ rrie, ẹre ọ vbe sẹtin dia egbe ẹre.

5. Vba yae kha na gha mwẹ “ekhọe Kristi”? Vbọzẹ nọ na khẹke ne ima gha tie okha ọghe Jesu? (1 Kọrinti 2:16)

⁵ Tie 1 Kọrinti 2:16. Deghẹ ima hoo ne ima gha mu egbe ọghe ọgbọn yọ, ọ khẹke ne ima gha mwẹ “ekhọe Kristi.” Ọni nọ wẹẹ, ọ khẹke ne ima rẹn vbene Jesu ya roro emwi hẹ, ma ghi vbe gha ya egbe taa ẹre. E Jesu wa mwẹ avbe uyinmwẹ hia ne orhiọn nọhuanrẹn ya ọmwa mwẹ. Te ọ wa ru emwi vbene Jehova ru zẹẹ. (Hib 1:3) Ma ghaa hia ne ima gha roro emwi vbene Jesu ye, ma ghi sẹtin gha ya egbe taa ẹre.​—Fil 2:5.

6. De emwi nọ khẹke ne ima kọ ye orhiọn, zẹvbe ne ima ya hia, ne ima mu egbe ọghe ọgbọn yọ?

⁶ Ma gha gele sẹtin ya egbe taa e Jesu ra? Ma sẹtin gha roro ẹre wẹẹ: ‘Ọmwa nọ gbae Jesu khin, rhunmwuda ọni, I i khian sẹtin wa gha yevbe ọre!’ Ọ ghaa yerriọ, ọ khẹke ne ima kọ emwi eha na ye orhiọn. Okaro, te a yi ima, ne ima gha yevbe Jehova vbe Jesu. Nọnaghiyerriọ, ma gha sẹtin ya egbe taa iran vbene ẹtin ima sẹ, deghẹ ima hoo ne ima ru vberriọ. (Gẹn 1:26) Nogieva, orhiọn nọhuanrẹn ọghe Osanobua, nọ re  ẹtin nọ sẹ re vbe agbọn vbe ẹrinmwi, gha ru iyobọ ne ima ya ru emwi ne ima i khian sẹtin tobọ ima ru. Nogieha, e Jehova ma ya aro yọ wẹẹ, ma gha sẹtin gha rhie ẹre ma, avbe uyinmwẹ ne orhiọn nọhuanrẹn ya ọmwa mwẹ, vbe odẹ nọ gbae. Uhiẹn, vbene Jehova ghi hoẹmwẹ ima sẹ, ukpo 1,000 ẹre ọ rhie yọ, na khian ya ru iyobọ ne emwa ni khian yin uhunmwu otagbọn na vbe etẹbitẹ, ya do khian emwa ni gbae. (Arhie 20:​1-3) Emwi ne Jehova hoo ne ima ru nia, ọre ne ima hia vbene ẹtin ima sẹ, ma ghi vbe mu ẹtin yan rẹn nọ ru iyobọ ne ima.

7. De emwi ne ima khian ghi ziro yan nia?

⁷ De odẹ eso ne ima gha ya sẹtin ya egbe taa e Jesu? Nia, ma gha guan kaẹn uyinmwẹ enẹ, ne orhiọn nọhuanrẹn ọghe Osanobua ya ọmwa mwẹ. Ma ghi vbe guan kaẹn emwi ne ima gha miẹn ruẹ, vbe odẹ ne Jesu ya rhie avbe uyinmwẹ na ma hẹ. Iyeke ọni, ma ghi ziro yan inọta eso, nọ gha ya ima gha mwẹ alaghodaro vbe odẹ ne ima ya yin.

8. De vbene Jesu ya rhie ẹre ma wẹẹ irẹn mwẹ ahoẹmwọmwa?

⁸ Rhunmwuda ne Jesu na ya ekhọe hia hoẹmwẹ e Jehova, ẹre ọ si ẹre nọ na gha mu ọghe Jehova kevbe ọghe emwa ọvbehe ye okaro. (Jọn 14:31; 15:13) Vbene Jesu ya gha yin vbe ọ rre agbọn, keghi rhie ẹre ma wẹẹ, ọ gele ya ekhọe hia hoẹmwẹ emwa nagbọn. Ẹdẹgbegbe ẹre Jesu ya gha rhie ẹre ma wẹẹ, irẹn mwẹ ahoẹmwọmwa kevbe ẹnina daa emwa, agharhemiẹn wẹẹ emwa eso ghaa zẹ ọre kpokpo. Odẹ ọkpa ne kpataki ne Jesu ya rhie ẹre ma wẹẹ irẹn hoẹmwẹ emwa, ọre nọ na gha maa iran emwi vbekpa Arriọba Osanobua. (Luk 4:​43, 44) Odẹ ọvbehe ne Jesu ya rhie ẹre ma wẹẹ, irẹn ya ekhọe hia hoẹmwẹ Osanobua kevbe emwa nagbọn, ọre nọ na ya ekhọe obọ re kue yọ, ne emwa orukhọ rri ẹre oya ne udẹn, oya ne ẹvbi; iyeke ọni, iran na vbe gbe ẹre rua. Ọna ẹre ọ ghi zẹe ighẹ, arrọọ etẹbitẹ gha sẹ ima obọ.

9. Vbe ima khian ya rhie ẹre ma wẹẹ, ma mwẹ ahoẹmwọmwa zẹvbe ne Jesu ru ẹre?

⁹ Ahoẹmwọmwa ne ima mwẹ ne Jehova, ẹre ọ ya ima ya egbe fi ohan nẹẹn, ma na vbe dinmwiamẹ. Vbe na ghee Jesu, ọ khẹke ne obọ ne ima ya mu emwa ọvbehe, gha rhie ẹre ma wẹẹ, ma hoẹmwẹ e Jehova. Ukọ e Jọn khare wẹẹ: “Adeghẹ ọmwa ma hoẹmwẹ ọtiọnrẹn nọ dẹghe, ẹi ra sẹtin hoẹmwẹ Osanobua ne irẹn i dẹghe.” (1 Jọn 4:20) Ma sẹtin nọ egbe ima wẹẹ: ‘Mẹ ya ekhọe hia hoẹmwẹ emwa ọvbehe ra? Mẹ mwẹ ẹnina daa emwa ọvbehe ra, uhiẹn deghẹ iran na ru mwẹ khọọ ra? Ahoẹmwọmwa ẹre ọ ya mwẹ loo ẹghẹ mwẹ, kevbe emwi ne I mwẹ ya ru iyobọ ne emwa ọvbehe, ya do rẹn vbekpa e Jehova ra? Mẹ gha ye gha kporhu ma emwa ọvbehe ra, deghẹ iran nibun ma gbọyẹmwẹ yọ, ra deghẹ iran na gha gbe mwẹ odan ra? I gha hia ne I rhie ẹghẹ ba ẹghẹ ne I ya kporhu ra?’​—Ẹfis 5:​15, 16.

10. De vbene Jesu ya rhie ẹre ma wẹẹ, ọmwa nọ gualọ ọfunmwegbe irẹn khin?

¹⁰ Ọmwa ọfunmwegbe ẹre Jesu wa gha khin. Vbe ẹghẹ ne emwa na gha ya obọ dan muẹn, ọ ma ya orukhọ ha osa orukhọ. Sokpan ẹre ọni ọkpa, e Jesu keghi zẹ owẹ nokaro, ya ru iyobọ ne emwa ọvbehe, ya gha rrọọ vbe ọfunmwegbe. Ọ na vbe rhie igiọdu ne iran, ne iran gha ru adọlọ. Vbe igiemwi, ọ keghi gi iran rẹn wẹẹ, deghẹ iran hoo ne Osanobua miẹn ugamwẹ iran yi, te ọ khẹke ne iran ka gu ọtiẹn iran ru adọlọ nẹ. (Mat 5:​9, 23, 24) Vbe deba ọni, ke ugba ke ẹghẹ, ẹre ọ ya gha ru iyobọ ne avbe ukọ ọghẹe, ni ghaa muan ẹmwẹ ba ẹmwẹ ọmwa nọ kpọlọ sẹ vbe uwu iran.​—Luk 9:​46-48; 22:​24-27.

11. Vbe ima khian ya rhie ẹre ma hẹ wẹẹ, ọmwa nọ gualọ ọfunmwegbe ma khin?

¹¹ Ne ima mieke na gha re emwa ni gualọ ọfunmwegbe, te ọ khẹke ne ima gha re emwa nẹi fu ọmwa tọlọ ọmwa. Sokpan ọ ma fo ye evba, ọ khẹke ne ima zẹ owẹ nokaro, ne ima ya gu emwa ọvbehe gha rrọọ vbe ọfunmwegbe. Ma ghi vbe gha rhie igiọdu ne etẹn, ne iran gha gu emwa  ọvbehe ru adọlọ. (Fil 4:​2, 3; Jems 3:​17, 18) Ma sẹtin nọ egbe ima wẹẹ: ‘Mẹ mu egbe ne I ya ru emwi ke emwi, ne I mieke na gu emwa ọvbehe gha rrọọ vbe ọfunmwegbe ra? Deghẹ ọtẹn na ru emwi nọ da mwẹ sẹ ugboloko, mẹ rhie emwi nọ ru mwẹ re ye ẹko ra? Mẹ vbe ọmwa gha gba gui, mẹ dia khẹ ọre, nọ ka do rinmwian mwẹ nẹ ra, ra mẹ ẹre ọ zẹ owẹ nokaro, uhiẹn deghẹ ọmwa nii ẹre ọ te rri abe? Deghẹ ẹkpotọ na kie mẹ, I rhie igiọdu ne emwa ọvbehe ni mwẹ egbe ẹzọ, ne iran mu ẹzọ fua ra?’

12. De vbene Jesu ya rhie ẹre ma wẹẹ irẹn ya obọ esi mu emwa ọvbehe?

¹² Te Jesu wa gha ya obọ esi mu emwa ọvbehe. (Mat 11:​28-30) Odẹ nọ ya ru ọna, ọre nọ na gha re ọmwa nọ fu. Ọ na vbe gha mwẹ amuroro daa emwa ọvbehe, uhiẹn vbe ẹghẹ nọ ma ya khuẹrhẹ nọ ru vberriọ. Vbe igiemwi, vbe okhuo Fonisian ọkpa do rinmwiaẹn nọ mu ovbi irẹn egbe rran, e Jesu ma wa ru emwi ne okhuo nii nọ rẹn vbobọvbobọ. Sokpan ọ ghi bẹghe ẹre wẹẹ, okhuo nii mwẹ amuẹtinyan nọ wegbe, ọ keghi tohan rẹn, ọ na ghi mu ovbi ẹre egbe rran. (Mat 15:​22-28) Agharhemiẹn wẹẹ Jesu ghaa ya obọ esi mu emwa, ọni ma wẹẹ, nẹ ghẹ dia emwa ye odẹ. Ọ mwẹ ẹghẹ eso, ne Jesu ya gu emwa nọ hoẹmwẹ ọnrẹn gui, nọ ya gi iran rẹn wẹẹ, irẹn hoẹmwẹ iran. Vbe igiemwi, vbe ẹghẹ ne Pita na gha hoo, ne Jesu bizugbe ahoo ọghe Osanobua, e Jesu keghi gu ẹre gui, sirra emwa nikẹre. (Mak 8:​32, 33) Ẹi re te Jesu ru ọna, nọ ya mu e Pita gbe otọ, sokpan te ọ yae maa erhuanegbe ẹre emwi, ne iran ghẹ gha fian karo. Ẹi mwẹ ekhue ma mu e Pita vbe ẹdẹrriọ, sokpan ẹi emwi kherhe ẹre ọ ruẹ re, vbe emwi ne Jesu ru na.

13. Vbe ima khian ya rhie ẹre ma wẹẹ, ma gele ya obọ esi mu emwa ọvbehe?

¹³ Deghẹ u gele hoo ne u rhie ẹre ma wẹẹ, u ya obọ esi mu emwa ne u hoẹmwẹ ọnrẹn, ọ ma khẹke ne u gha mu iyeke ẹmwẹ ma iran. U ghaa dia iran ye odẹ, u ghi ya egbe taa e Jesu; u ghi ya Ẹmwẹ Osanobua ru iyobọ ne iran. Ghẹ gha ghee iran emwa dan. Vbe gha mwẹ ọnrẹn vbe orhiọn wẹẹ, emwa ni gele hoẹmwẹ e Jehova, kevbe ni hoẹmwẹ ruẹ, gha lele ibude ne u rhirhi rhie ne iran. Nọ egbuẹ wẹẹ: ‘Ohan gu mwẹ guan ra, vbe ọmwa ne I hoẹmwẹ ọnrẹn ghaa ru emwi dan ra? Deghẹ I na gha bu ọmwa ude, mẹ fẹko gu ẹre guan ra, ra te I fi ọkpanike muẹn? De emwi nọ ya mwẹ bu emwa ude? Rhunmwuda ne emwi ne ọmwa nii ru na sọnnọ mwẹ nọ ra, ra rhunmwuda ne I na hoo ne I ru iyobọ nẹẹn nọ?’

14. De vbene Jesu ya rhie ẹre ma wẹẹ, ọmwa esi irẹn khin?

¹⁴ E Jesu rẹn emwi esi nọ khẹke ne irẹn ru, erriọ vbe ya gha ru ẹre. Ẹi re te Jesu wa ba gha ru emwi esi, rhunmwuda nọ na hoẹmwẹ Erhae, ẹre ọ yae gha ru vberriọ. Ọmwa esi keghi re ọmwa ne obọ ẹse tọlọ, nọ vbe gualọ odẹ ughughan, nọ khian ya ru iyobọ ne emwa ọvbehe. Ma sẹtin rẹn emwi nọ khẹke ya ru, sokpan ọ khẹke ne ima ya ekhọe hia ru ẹre, ẹi re rhunmwuda ere ne ima khian miẹn vbọ. Ọmwa sẹtin gha nọ wẹẹ, ‘A vbe ya ekhọe a ba ruẹ, ru emwi esi ra?’ Ẹsẹsẹmwẹse. Vbe igiemwi, e Jesu guan kaẹn emwa ni ghaa ru ẹse ne ivbiogue, ne agbọn vbe ẹrinmwi mieke na ba bẹghe iran. Agharhemiẹn wẹẹ emwi esi ẹre iran ru, ọ ma ya ẹko rhiẹnrhiẹn e Jehova.​—Mat 6:​1-4.

15. Vbe ima khian ya rhie ẹre ma wẹẹ, ọmwa esi ne ọmwa esi ẹre ima khin?

¹⁵ Deghẹ ima i ru ẹse ne emwa ọvbehe, rhunmwuda ere ne ima khian miẹn vbọ, ọni rhie ma wẹẹ, ọmwa esi ne ọmwa ẹsi ẹre ima khin. U sẹtin nọ egbuẹ wẹẹ, ‘Deghẹ I na gele rẹn emwi nọ khẹke ne I ru, mẹ gele ru ẹre ra? Vbọ mobọ ya mwẹ ru ẹse ne emwa ọvbehe?’

16. Vbọ khẹke ne ima gha ru vbe ẹdẹgbegbe? Vbọzẹ?

¹⁶ Ọ ma khẹke ne ima gha roro ẹre wẹẹ, ma gha wa dinmwiamẹ nẹ, ọni ọre ọ fo. Te egbe  ọgbọn ne ima mu yọ nẹ, yevbe ukpọn ọgbọn; ma ghaa mwẹ ukpọn ọgbọn, ma i gi ẹre gbiruẹn, amaiwẹ te ima khian gi ẹre yanghan. Emwi ọkpa nọ gha ru iyobọ ne ima, ne ima ghẹ mu egbe ọgbọn na fua, ọre ne ima gha gualọ odẹ ughughan, ne ima khian ya gha rhie ẹre ma ẹdẹgbegbe, avbe uyinmwẹ ne orhiọn nọhuanrẹn ya ọmwa mwẹ. Vbọ ya ima kha vberriọ? Rhunmwuda orhiọn nọhuanrẹn ọre ẹtin ne Osanobua ya ru emwi. (Gẹn 1:2) Nọnaghiyerriọ, avbe uyinmwẹ ne orhiọn nọhuanrẹn ya ọmwa mwẹ, gha wa sẹtin ya ima zẹ emwi ru. Vbe igiemwi, ukọ ighẹ Jems keghi kha wẹẹ: “Iyayi ra amuẹtinyan ne ẹi mwẹ iwinna, orinmwi nọ.” (Jems 2:26) Erriọ avbe uyinmwẹ nikẹre ne orhiọn nọhuanrẹn ya ọmwa mwẹ vbe ye. Ẹghẹ ke ẹghẹ ne ima ya rhie ẹre ma, ọ ghi wa vẹẹ na rẹn wẹẹ, orhiọn nọhuanrẹn ọghe Osanobua ẹre ọ loo ima.

17. Vbọ khẹke ne ima ru, adeghẹ a na miẹn wẹẹ ima ma sẹtin rhie ẹre ma, avbe uyinmwẹ ne orhiọn nọhuanrẹn ya ọmwa mwẹ?

¹⁷ Ugbẹnso, ọ keghi lọghọ eguọmwadia e Jehova, ni dinmwiamẹ nẹ ọ kpẹẹ re, ne iran sẹtin rhie ẹre ma, avbe uyinmwẹ hia ne orhiọn nọhuanrẹn ya ọmwa mwẹ. Sokpan vbe nọ rhirhi gha ye hẹ, ọ ma khẹke ne ima gi egbe wọọ ima. Gia kha wẹẹ, ukpọn ne u ya miẹn ọba aro sọ re, u gha wa fi ẹre fua vbobọvbobọ ra? Ẹn o. Ẹi mwẹ u ma hia ne u dọlegbe se ẹre. U gha ghi se ẹre nẹ, te u khian ghi gha muẹn tetete, nẹ ghẹ ya dọlegbe sọ. Erriọ vbe ye, adeghẹ a na miẹn wẹẹ, u ma sẹtin tohan ọmwa, u ma sẹtin mwẹ izinegbe vbe egbe ẹre, ra u ma vbe sẹtin rhie ẹre ma wẹẹ u hoẹmwẹ ọnrẹn, ghẹ gi egbe wọọ ruẹ. Ya ekhọe hia rinmwian ọmwa nii, nẹ ghẹ gui, ne uwa mieke na dọlegbe khian ọse. U ghi vbe hia vbene ẹtin ruẹ sẹ, ne emwi vberriọ ghẹ mieke na sunu vbe ẹdẹ ọvbehe.

18. Vbọ khẹke ne ima kọ ye orhiọn?

¹⁸ Ma ghọghọ wẹẹ, e Jesu wa rhie igiemwi esi ye otọ ne ima. Zẹvbe ne ima ya hia, ne ima gha ru emwi vbe na ghee Jesu, ma ghi do gha mwẹ avbe uyinmwẹ ni khẹke Ivbiotu e Kristi. Uyinmwẹ enẹ ne orhiọn nọhuanrẹn ọghe Osanobua ya ọmwa mwẹ, ẹre ima ziro yan vbe ako iruẹmwi na. Hia ne u gualọ ẹghẹ ya ruẹ vbekpa avbe uyinmwẹ nikẹre ne orhiọn nọhuanrẹn ọghe Osanobua ya ọmwa mwẹ, kevbe vbene u khian ya gha rhie ẹre ma hẹ. U gha wa miẹn uhunmwuta ughughan, ni guan kaẹn avbe uyinmwẹ ne orhiọn nọhuanrẹn ya ọmwa mwẹ vbe Research Guide for Jehovah’s Witnesses, vbe ototọ uhunmwuta nọ khare wẹẹ “Christian Life” u ghi ke evba la “Fruitage of the Spirit.” Gha mwẹ ọnrẹn vbe orhiọn wẹẹ, u gha hia vbene ẹtin ruẹ sẹ, ne u gha mu egbe ọgbọn yọ, e Jehova gha ru iyobọ nọ khẹke nuẹn, ne u ghẹ mieke na muẹn fua.