AGBỌN nọ vuọn ne ọlọghọmwa ẹre ima sẹ fi, rhunmwuda ọni, ọ keghi lọghọ ne ima sẹtin gha mwẹ ọfunmwegbe. Ma zẹdia vbe mwẹ ọfunmwegbe, sokpan ẹi tọ. De emwi ne Ẹmwẹ Osanobua khare wẹẹ ọ gha ru iyobọ ne ima ya gha mwẹ ọfunmwegbe ọghe ẹmwata? De iyobọ ne ima gha ru ne emwa ọvbehe ne iran vbe gha mwẹ ọfunmwegbe vbenian?

Ma ghaa mwẹ agbẹkunsotọ ẹre ima khian na gele gha mwẹ ọfunmwegbe. Emwi ọvbehe nọ gha vbe ru iyobọ ne ima ọre deghẹ ima gu emwa esi mu obọ. Ọse ne a gba ẹko ẹre keghi ya orhiọn ọmwa sotọ. Sẹ ehia, te ọ khẹke ne ima gu e Jehova gha mu obọ. Sokpan vbe ima khian ya gha re ọsie Jehova hẹ?

Ma ghaa lele iyi kevbe ilele ọghe Jehova, ọni rhiema wẹẹ, ma mwẹ amuẹtinyan daa re, kevbe wẹẹ, ma hoo ne ima gha gu ẹre ru ọse. (Jer 17:7, 8; Jems 2:22, 23) Irẹn tobọ irẹn ghi vbe rhan obọ miẹn ima yi, ọ ghi ye ọfunmwegbe wee ima. (Jer 17:7, 8; Jems 2:22, 23) Ebe Aizaia 32:17 khare wẹẹ: ‘Ọfunmwegbe kevbe agbẹkunsotọ ghi gha rrọọ vbe ẹghẹ hia, vbe emwa hia ghaa ru emwi nọ gbae.’ Ma gha gele gha họn ẹmwẹ ne Jehova ẹre ima khian na gha mwẹ ọfunmwegbe ọghe ẹmwata.—Aiz 48:18, 19.

Ẹse ọhẹ nọ hiokhuan nọ ke obọ Osanobua rre nọ ya ima mwẹ ọfunmwegbe ne gelegele, ọre orhiọn nọhuanrẹn.—Iwinna 9:31.

Ọfunmwegbe ọre akpa nukpogieha ne Pọl ya unu kaẹn vbe ọ guan kaẹn ọmọ erhan ọghe orhiọn nọhuanrẹn. (Gal 5:22, 23) Ne a na ghi miẹn nia wẹẹ, orhiọn nọhuanrẹn ẹre ọ ya ima mwẹ ọfunmwegbe ọghe ẹmwata, te ọ khẹke ne ima gi orhiọn nọhuanrẹn gha dia ima vbe ẹghẹ hia. Gi ima ziro yan odẹ eva ne orhiọn nọhuanrẹn ya ya ima mwẹ ọfunmwegbe.

 Okaro, te ọ khẹke ne ima gha tie Ẹmwẹ ọghe Osanobua vbe ẹghẹ hia. (Psm 1:2, 3) Zẹ vbene ima ya ru erria yan adia ni rre Baibol, orhiọn nọhuanrẹn ghi gha ru iyobọ ne ima ya rẹn aro ne Jehova ya ghee emwi. Vbe igiemwi, ma ghi do bẹghe ẹre wẹẹ, Osa nọ fu ẹre Jehova khin, ma ghi vbe do rẹn evbọzẹe ne ọ na ya aro nọ ghan ghee ọfunmwegbe. Ma ghaa ya egbe tae Jehova zẹ vbene ima ruẹ ọre vbe Baibol, ma ghi do gha mwẹ ọfunmwegbe vbe arrọọ ọghomwa.—Itan 3:1, 2.

Nogieva, te ọ khẹke ne ima gha nọ e Jehova vbe erhunmwu nọ gha ya orhiọn nọhuanrẹn ru iyobọ ne ima. (Luk 11:13) E Jehova yan rẹn wẹẹ, irẹn gha họn erhunmwu ima deghẹ ima nọ iyobọ vbe obọ irẹn. Ọ keghi kha wẹẹ: “Te ọfunmwegbe Osanobua, ne ọ gberra ne ọmwa ne agbọn gha sẹtin rẹn otọ ẹre gha rhie ekhọe kevbe orhiọn uwa mwẹ, vbe ne a i na mwẹ ẹbe vbe uwu Kristi Jesu.” (Fil 4:6, 7) Ma ghaa nọ e Jehova vbe ẹghẹ hia nọ ya orhiọn nọhuanrẹn ru iyobọ ne ima, e Jehova ghi ya ọfunmwegbe wee ima. Emwa ni gele sikẹ e Jehova ẹre ọ mwẹ ọfunmwegbe vbenian.—Rom 15:13.

Gi ima guan kaẹn emwa eso ni ru afiwerriẹ nọ khẹke vbe arrọọ ọghe iran vbe iran lele adia ni rre Baibol. Vbọ ghi kẹrikian? Iran tobọ iran na do gha mwẹ ọfunmwegbe, te iran ghi gu emwa ọvbehe rrọọ vbuwe ọfunmwegbe, sẹ ehia, iran mwẹ ọyẹnmwẹ nọ sẹ otọ ẹko rhunmwuda ne Jehova na rhan obọ miẹn iran yi.

Ọ mwẹ etẹn eso ni ka wa gha re “emwa ne egbe balọ.” Sokpan iran i ghi yerriọ nia, te iran ghi mwẹ itohan, amuroro, izinegbe kevbe wẹẹ, obọ esi ẹre iran ghi ya mu emwa ọvbehe. * (Itan 29:22) Ma gha guan kaẹn etẹn eva nia, ni ka gha re emwa ni balọ egbe sokpan emwa ni fu ẹre iran ghi khin nia.

E David kegha re ọmwa nọ taa ẹmwẹ ekpọ. Vbene ọ te dinmwiamẹ, ẹi vbe taa ẹmwẹ nọ maan vbekpae ọmwa rhọkpa, ya sẹ egbe evbibiẹ ọre kevbe etiọnrẹn vbuwe ẹgbẹe. Ọ ghi sẹ ẹghẹ, ọ na ghi bẹghe ẹre wẹẹ te ọ khẹke ne irẹn fiwerriẹ. Vbe ọ ghi ru? Ọ keghi kha wẹẹ: “I na do gha ya emwi ne I tie vbe Baibol ru emwi vbe arrọọ mwẹ. Ọna ẹre ọ ghi zẹe ne imẹ vbe etẹn mwẹ kevbe evbibiẹ mwẹ na rrọọ vbuwe ọfunmwegbe.”

Ẹgbẹe ne Rachel na waan ẹre ọ yae khian ọmwa ne ohu rherhe mu. Ọ keghi kha wẹẹ: “Do fi ebanban,  te ọ ye lọghọ ne I sẹtin dia egbe mwẹ rhunmwuda ohu ohu ẹre a mu vbe ẹgbẹe ne I na waan.” Vbọ ghi ru iyobọ nẹẹn? Ọ na ghi kha wẹẹ: “Te I wa gha na erhunmwu gie Jehova nọ ru iyobọ mẹ.”

Igiemwi ọghe David kevbe Rachel keghi rhiẹre ma wẹẹ, emwi esi ẹre ọ kẹrikian vbe ima ghaa lele ilele ni rre Baibol kevbe ima ghaa nọ Osanobua ne ọ ya orhiọn nọhuanrẹn ru iyobọ ne ima. Agharhemiẹn wẹẹ agbọn ne aro emwa na kpannọ ugiọnmwẹ erhẹn ẹre ima ye, ma gha sẹtin gha mwẹ ọfunmwegbe nọ gha ya ima gha mwẹ akugbe vbuwe ẹgbẹe kevbe vbuwe ẹbu etẹn ne ima gba ga. E Jehova gele hoo ne ima ‘hia vbe odẹkodẹ ne ima vbe emwa hia gba gha ma ẹko egbe.’ (Rom 12:18) Emwi vbenian gha sẹtin sunu ra? De afiangbe ne ima gha miẹn deghẹ ima na hia, ne ima gu emwa hia gha rrọọ vbuwe ọfunmwegbe?

Ikporhu iyẹn nọ maan ọghe Arriọba keghi re iyẹn ọfunmwegbe. Ọ keghi re odẹ ọkpa ne ima ya ru iyobọ ne emwa ne iran vbe do gha mwẹ ọfunmwegbe. (Aiz 9:6, 7; Mat 24:14) Te nibun ghi gele mwẹ agbẹkunsotọ nia rhunmwuda iran miẹn odẹ ọghe ẹmwata yi. Iran i ghi si osi ra ne ohu gha mu iran rhunmwuda emwi dan nọ sunu vbe ehe ne iran ye. Emwa ni gualọ ọfunmwegbe ẹre iran ghi khin rhunmwuda iran mwẹ ayayẹro wẹẹ emwi hia gha dunna vbe odaro.—Psm 34:14.

Vbọrhirhighayehẹ, ẹi re emwa hia ọ rhie ehọ ne ima taa yi. Eso ni ma ka danmwehọ vbe ẹghẹ okaro sẹtin ye danmwehọ vbene ẹghẹ ya khian. (Jọn 3:19) Orhiọn nọhuanrẹn ẹre ọ ru iyobọ ne ima ya kporhu ma emwa vberriọ vbe odẹ ọghe ọghọ vbe ute. Ma gha dekun emwa ne ẹi mwẹ ẹkorhiẹnrhiẹnmwẹ, ibude ọghe Jesu nọ rre ebe Matiu 10:11-13 gha ru iyobọ ne ima. Ọ wẹẹ: “Wa gha la uwu owa, wa ghi kha wẹẹ, ‘Ọfunmwegbe gu uwa rrọọ.’ Deghẹ emwa ni rre owa nii rhie ehọ ne uwa taa yi, wa ghi sẹ otuẹ ọfunmwegbe ne uwa rhie ne iran rae ne iran, sokpan a deghẹ iran ma rhie ehọ ne uwa taa yi, wa kie ọre werriegbe.” Ma gha lele adia na, ọfunmwegbe ẹre ima khian ya kpa hin owa vberriọ rre, ẹghẹ nii, ẹkpotọ ghi vbe kie ne ima ya werriegbe mu otuẹ gha rrie evba.

Ma ghaa rhie ọghọ ne avbe ukọ arriọba kevbe emwa ni gbodan ye iwinna ima, te ima rhiẹre ma wẹẹ emwa ọfunmwegbe ma khin. Vbe igiemwi, arriọba ọghe otọ ẹvbo ọkpa vbe otọ Africa ma kpasẹ yọ ne ima gha mwẹ asẹ ne a ya bọlọ Ọgua Arriọba. Ne a mieke na zuze ye ẹmwẹ na vbe odẹ ọghe ọfunmwegbe, otu keghi gie ọtẹn nokpia ọkpa nọ ka ga zẹvbe arọndẹ ne a gie yo isi vbe otọ Africa nii, bu ukọ arriọba (High Commissioner) ọghe ẹvbo nii nọ rre London. Te otu wẹẹ ne ọtẹn nokpia na ya gi ukọ arriọba na rẹn vbekpae iwinna esi ne Avbe Osẹe Jehova ru vbe otọ ẹvbo ẹre. Vbe a ghi lae miẹn?

Ọtẹn nokpia na keghi kha wẹẹ: “I ghi sẹ ọfisi ọghe okhuo nọ gbọbokhian ne orhunmwuyẹn, I na wa rẹn ovbi ẹvbo ne okhuo nii khin rhunmwuda vbene ọ ya mu egbe. I ka ruẹ vbe na ya zẹ urhuẹvbo iran, rhunmwuda ọni, I na ya urhuẹvbo ọre tuẹ ọre. Ọ na wa kpa re odin. Ọ na ghi nọ mwẹ wẹẹ, ‘Vbua do ru mwa.’ I na tama rẹn wẹẹ I hoo ne I miẹn enọwanrẹn ọghe iran (High Commissioner). Ọ na ye tẹlifoni tie ẹre. Ọ ghi rre, urhuẹvbo ọghe iran ẹre ọ ya tuọ mwẹ. Vbe iyeke ọni, I na gi ẹre rẹn aro emwa ne Avbe Osẹe Jehova khin kevbe iwinna esi ne iran ru. Ọ gele wa gbehọ kotọ danmwehọ mwẹ.”

Odẹ ọghe ọghọ vbe ute ne ọtẹn nọkpia nii ya gu ukọ arriọba nii guan keghi biẹ ọmọ esi. Ọ na do gha ya aro nọ maan ghee Avbe Osẹe Jehova. Ọ ghi sẹ ẹghẹ, arriọba ọghe otọ ẹvbo Africa na, na ghi kpasẹ yọ ne Avbe Osẹe Jehova gha bọlọ Ọgua Arriọba ọghe iran. Etẹn ni rre ẹvbo nii ma sẹtin ghọghọ! Vbene ẹmwata, obọ esi ne a ya mu emwa ọvbehe keghi ya emwa mwẹ ọfunmwegbe. Ọ wa vbe biẹ ọmọ esi vbe odẹ nibun.

Vbe ẹdẹnẹrẹ, eguọmwadia e Jehova wa sọyẹnmwẹ ọfunmwegbe vbuwe ẹbu etẹn ne iran gba ga. Te ọfunmwegbe na khian gha muan sayọ zẹ vbene ima ya hia ne ima gha re emwa ọfunmwegbe. Nọ ghi sẹ ehia ọre wẹẹ, ma ghi do gha mwẹ akueyi ọghe Jehova nọ khian ya ima gha mwẹ afiangbe ne ẹi gia gie vbe agbọn ọgbọn nọ dee.—2 Pita 3:13, 14.