Vbe ebe ne ukọ ighẹ e Pọl gbẹn gie etẹn ni rre Tẹsalonaika, ọ keghi kha wẹẹ: “Adeghẹ ọmwa rhọkpa rrọọ nọ ma lele ẹmwẹ ne ima tae vbe ebe ne ima gbẹn gie uwa na, wa yi ọmwa vberriọ ẹro.” (2 Tẹs 3:14) Vbe ẹghẹ nọ gberra, ma te gha roro ẹre wẹẹ, ediọn ọkpa ẹre Pọl ghaa gu guan vbe ako na. Ediọn sẹtin ya ọta guan vbe uwu iko, ne etẹn mieke na rẹn wẹẹ, ọ mwẹ ọmwa nẹi ya Ẹmwẹ Osanobua ru emwi vbe uwu iko. Kẹ ẹghẹ nii kpa, etẹn i khian ghi gha gu ọmwa nii, na yi ẹre ẹro mu obọ, vbọ gberra vbe ọ gha rrie iko ra ọ gha ladian vbe ikporhu.

Sokpan, ma do bẹghe ẹre wẹẹ, te ọ khẹke na ru afiwerriẹ ye vbene ima te ka ya rẹn otọ ako na. Odẹ ne ima ghi ya rẹn otọ ọre nian ọre wẹẹ, emwi ne Pọl ghaa guan kaẹn, ọre emwi nọ khẹke ne dọmwadẹ Ovbi Otu e Kristi ru deghẹ emwi eso na de rre. Rhunmwuda ọni, esa i khian ghi gha rrọọ ne ediọn khian ya ya ọta guan, ne etẹn mieke na rẹn wẹẹ, ọ mwẹ ọmwa nẹi ya Ẹmwẹ Osanobua ru emwi vbe uwu iko. Vbe ima gu ru afiwerriẹ na? Gi ima zẹ iro yan emwi ne Pọl ghaa guan kaẹn vbe ako na.

Aro e Pọl dae wẹẹ, etẹn eso vbe uwu iko ghaa “yin pirhipirhi.” Iran ma gha lele adia ne Osanobua loo e Pọl ya rhie ne iran. Vbe ukọ ighẹ e Pọl ka mu otuẹ gie iran, ọ na tama iran wẹẹ: “Ọmwaikọmwa nọ ma hoo nọ winna, we nẹ ghẹ rri evbare.” Ọrheyerriọ, eso ma kue winna ne iran mieke na miẹn emwi ya gha gaga egbe, agharhemiẹn wẹẹ, iran gha te sẹtin ru vberriọ. Vbe deba ọni, iran vbe gha fi ukpẹ ye ẹmwẹ nọ ma kaan iran. De obọ nọ khẹke ne etẹn ya gha mu emwa vbenian?​—2 Tẹs 3:​6, 10-12.

E Pọl keghi kha wẹẹ, “Wa yi ọmwa vberriọ ẹro.” Emwi ne ẹmwẹ e Grik na ke zedu ẹmwẹ na demu, ọre na gele yi ọmwa ẹro kevbe na gha begbe vbe egbe ẹre. Iko hia ẹre Pọl gbẹn ẹmwẹ na gie, ẹ i re ediọn ọkpa. (2 Tẹs 1:1; 3:6) Rhunmwuda ọni, Ovbi Otu e Kristi gha bẹghe ọtẹn nọ rhie owẹ gberra ilele ni rre Baibol, ọ ma zẹdẹ khẹke nọ ye gha “gu ẹre mu obọ.”

Te ọna ghi rhie ma wẹẹ, obọ na ya mu ọmwa na rhie hin uwu iko rre ẹre a khian ya gha mu ọmwa na ra? Ẹo, rhunmwuda e Pọl khare wẹẹ: “Wa ye gha bu ẹre ude zẹvbe ọtẹn.” Nọnaghiyerriọ, dọmwadẹ Ovbi Otu e Kristi sẹtin ye gha gu ẹre mu obọ vbe iko kevbe ikporhu, sokpan iran i khian gha gu ẹre mu obọ vbe eke na na sọyẹnmwẹ egbe. Vbọzẹ? E Pọl khare wẹẹ, “Ne ekhue egbe ẹre mieke na gha muẹn.” Ne emwa hia na ghi yi ẹre ẹro, ekhue egbe ẹre sẹtin do gha muẹn, ọ ghi do fi werriẹ.​—2 Tẹs 3:​14, 15.

De vbene Ivbi Otu e Kristi ni rrọọ vbe ẹdẹnẹrẹ khian ya gha lele ibude na hẹ? Vbe okaro, te ọ khẹke na gele rẹn deghẹ ọmwa nii gele “yin pirhipirhi,” zẹvbe ne Pọl khare. Ẹ i re emwa ni ru emwi ne ekhọe ima ma kue yi kevbe nẹi ru emwi vbene ima gualọe yi ẹre Pọl ghaa guan kaẹn vbe ako na. Ẹ i vbe re emwa ni ru emwi nọ da ima sẹ ugboloko. Nọghayayerriọ, emwa ni wa mema bizugbe ilele ni rre Baibol ẹre Pọl ghaa guan kaẹn.

Vbe ẹdẹnẹrẹ, ma gha bẹghe Ovbi Otu e Kristi nẹi ya ilele ọghe Jehova ru emwi, a obọ ima ẹre ọ ye deghẹ ma gha ye gha gu ẹre mu obọ ra ma i khian ru vberriọ. Na na miẹn wẹẹ, azẹ ne ima khian tobọ ima ru na khin, emwa ima vbe uwu ẹgbẹe ọkpa ẹre ọ khẹke ne ima tama. Sokpan, ma ghi ye gu ẹre gha mu obọ vbe iko kevbe ikporhu. Ọ gha ghi fi werriẹ nẹ, ma i khian ghi gha gban egbe nẹẹn.