AKO IRUẸMWI 10
Ahoẹmwọmwa Ne U Mwẹ Ne Jehova Ẹre Ọ Khian Ya Ruẹ Dinmwiamẹ
“De emwi nọ gha da mwẹ yi ne I ghẹ dinmwiamẹ?”—IWINNA 8:36, NW.
IHUAN 37 Gia Ya Ekhọe Hia Ga E Jehova
OLIKA ẸMWẸ ỌGHE AKO IRUẸMWI NA *
1-2. Zẹvbe nọ rre ebe Iwinna 8:27-31, 35-38, de emwi nọ ya Ovbi Etiopia ọkpa dinmwiamẹ?
UWẸ hoo ne u dinmwiamẹ ne u mieke na khian ọrhuanegbe Jesu ra? Ẹi re avbiẹ emwa ẹre ọ he dinmwiamẹ rhunmwuda wẹẹ, iran hoẹmwẹ e Jehova, kevbe wẹẹ, iran gbọyẹmwẹ ye emwi nọ he ru ne iran. Gia ziro yan igiemwi ọghe okpia ọkpa nọ ghaa winna vbe ẹguae ọghe oloi Etiopia.
2 Vbe Ovbi Etiopia nii ghi bẹghe ẹre vbe Evbagbẹn Nọhuanrẹn wẹẹ, ọ khẹke ne irẹn dinmwiamẹ, ọ na gele ru vberriọ vbobọvbobọ. (Tie Iwinna 8:27-31, 35-38, NW.) Vbọ yae ru vberriọ? Ọ vẹ na rẹn wẹẹ, ọmwa nọ ya aro nọ ghaan ghee Evbagbẹn Nọhuanrẹn ẹre ghaa nọ, rhunmwuda ebe Aizaia ẹre ọ ghaa tie vbe ọ ke Jerusalẹm rrie Etiopia. E Filip ghi rhan otọ Evbagbẹn Nọhuanrẹn ma rẹn nẹ, ọ keghi kakabọ gbọyẹmwẹ ye emwi ne Jesu ru ne irẹn. Sokpan, vbọzẹe ne Ovbi Etiopia na, na gha rrie Jerusalẹm? Rhunmwuda ahoẹmwọmwa nọ mwẹ ne Jehova. De vbene ima ya rẹn hẹ? Te ọ ya ga e Jehova vbe Ọgua Osa nọ ghaa rre Jerusalẹm. Ọ khọ wẹẹ, te okpia na sẹ ugamwẹ nọ te ka gha ye rae, do deba agbẹnvbo nọ ga Osa ọghe ẹmwata. Ahoẹmwọmwa nọ mwẹ ne Jehova ẹre ọ vbe gua ẹre kpa ya dinmwiamẹ, nọ mieke na gha re ọrhuanegbe Kristi.—Mat 28:19.
3. De emwi eso nọ gha sẹtin si ọmwa ghee iyeke nẹi ghẹ dinmwiamẹ? (Ya ghee ẹkpẹti nọ mwẹ uhunmwuta nọ khare wẹẹ, “ De Aro Ẹkokoudu Ne U Mwẹ?”)
3 Ahoẹmwọmwa ne u mwẹ ne Jehova ẹre ọ khian gua ruẹ kpa ya dinmwiamẹ. Sokpan, ahoẹmwọmwa ne u mwẹ ne emwa ọvbehe ra emwi ọvbehe sẹtin vbe si ruẹ ghee iyeke ne u ghẹ dinmwiamẹ. Odẹ vbo? Gia ziro yan igiemwi eso. A sẹtin miẹn wẹẹ u hoẹmwẹ etuẹn ra avbe ọse ruẹ nẹi re Osẹe Jehova sẹrriọ wẹẹ, u i ghi hoo ne u dinmwiamẹ, rhunmwuda, u ma hoo ne iran suẹn gha khẹko ruẹ. (Mat 10:37) A sẹtin vbe miẹn wẹẹ, uyinmwẹ eso ni sọnnọ e Jehova gua ruẹ obọ ro nẹ sẹrriọ wẹẹ, te ọ ghi lọghọ ruẹ na ban. (Psm 97:10) Gia vbe kha wẹẹ, ke otọ gha dee, ẹre u ke gha mwẹ obọ vbe avbe idugie ni ma gua ilele ọghe Baibol ro. Egbọre avbe idugie na wa ya ruẹ sọyẹnmwẹ. Rhunmwuda ọni, te ọ ghi lọghọ ruẹ ne u sẹtin sẹ iran rae. (1 Kọr 10:20, 21) Ọ ghaa yerriọ, ọ khẹke ne u nọ egbuẹ wẹẹ, “De ọmwa ra emwi ne I hoẹmwẹ ọnrẹn sẹ?”
ỌMWA NỌ KHẸKE NE U HOẸMWẸ ỌNRẸN SẸ
4. De emwi nọ mobọ gua ọmwa kpa ya dinmwiamẹ?
4 Egbọre, ọmwa ne Ẹmwẹ Osanobua yẹẹ kevbe nọ hoẹmwẹ Jesu ẹre u wa khin, ke otọ gha dee, uhiẹn vbene Avbe Osẹe Jehova te suẹn gha guẹ ruẹ e Baibol. Avbe Osẹe Jehova ghi suẹn gha maa ruẹ emwi nẹ, ẹmwẹ iran na vbe do gha yẹẹ ruẹ, te u ghi vbe hoo ne u gha gu iran mu obọ. Ena hia sẹtin ya ọmwa gha hoo nọ ga e Jehova. Sokpan emwi nọ mobọ gua ọmwa kpa ya hoo nọ ya egbe fiohan ne Jehova kevbe nọ dinmwiamẹ ọre ahoẹmwọmwa nọ mwẹ ne Jehova tobọre. U gha hoẹmwẹ e Jehova sẹ ọmwaikọmwa ra emwikemwi, u i khian kue ne emwi rhọkpa mu idobo yọ ruẹ egbe ne u ghẹ gae. Ahoẹmwọmwa ne u mwẹ ne Jehova ẹre ọ khian gua ruẹ kpa ya dinmwiamẹ, ẹre ọ khian vbe ru iyobọ nuẹn ya da imudiase ọghuẹ yi vbe u gha dinmwiamẹ nẹ.
5. De inọta ne ima khian ziro yan?
5 Jesu wẹẹ ne ima ya ẹkokoudu ọghe ima hia, orhiọn ọghe ima hia kevbe ekhọe ima hia hoẹmwẹ e Jehova. (Mak 12:30) De emwi nọ khian ya ruẹ hoẹmwẹ e Jehova vbe odẹ vbenian? Ma ghaa muẹn roro vbene Jehova hoẹmwẹ ima hẹ, ma ghi vbe do hoẹmwẹ ọnrẹn. (1 Jọn 4:19) Ọmwa gha ghi hoẹmwẹ e Jehova nẹ, de emwi nọ ghi lelẹe? *
6. Zẹvbe nọ rre ebe Rom 1:20, de emwi ne ima gha ru ne ima mieke na rẹn e Jehova sayọ?
6 Gha gbarokotọ ghee evbayi ne u mieke na rẹn e Jehova sayọ. (Tie Rom 1:20; Arhie 4:11) Muẹn roro vbene avbe aranmwẹ kevbe emwiokọ ne Jehova yi ya rhiẹre ma wẹẹ, Osa nọ mwẹ ẹwaẹn ẹre Jehova khin. Vbe igiemwi, odẹ ọghe ọyunnuan ẹre Jehova ya yi emwa nagbọn. (Psm 139:14) Agharhemiẹn wẹẹ, ọkpa kẹkan vbe oribirri ọghe avbe orhọnmwẹ ne Jehova yi ẹre ovẹn khin, ẹtin nọ mwẹ i re nekherhe. * (Aiz 40:26) Zẹvbe ne u ya mu ena hia roro, u ghi do gha rhie ọghọ ne Jehova sayọ. Ọmwa ghaa hoo nọ gha re ọsie Jehova, kevbe nọ hoẹmwẹ ọnrẹn ẹsẹsẹmwẹse, ọ khẹke nọ rẹn wẹẹ Osa nọ mwẹ ẹwaẹn kevbe ẹtin ẹre Jehova khin, sokpan ọni ọkpa ma sẹ. Ọ khẹke nọ ye rẹn ọnrẹn sayọ.
7. De ilẹkẹtin nọ khẹke ne u gha mwẹ, ne ahoẹmwọmwa ne u mwẹ ne Jehova mieke na gha wegbe sayọ?
7 Ọ khẹke ne u gha mwẹ ilẹkẹtin wẹẹ, e Jehova hoẹmwẹ ruẹ. U sẹtin gha roro ẹre wẹẹ, e Jehova ma rẹn wẹẹ u rrọọ, amaiwẹ te aro ọre khian gha sotọ vbe egbuẹ. Ọ ghaa yerriọ, yerre wẹẹ, “Osanobua ma khian rree ne ọmwa rhọkpa vbuwe ima.” (Iwinna 17:26-28) E Jehova “rẹn iziro ekhọe” ọghe ima, ma gha “bu ẹre gha khian, ọ gha miẹn [ima] yi.” (1 Krọ 28:9) Vbene ẹmwata, e Jehova tobọre ẹre ọ si ruẹ kẹ egbe, ọni ẹre ọ si ẹre nọ na kie ẹkpotọ nuẹn, ne Avbe Osẹe Jehova gha guẹ ruẹ e Baibol. (Jer 31:3) Zẹvbe ne u ya bẹghe ẹre wẹẹ e Jehova gele hoẹmwẹ ruẹ, ahoẹmwọmwa ne u mwẹ nẹẹn ghi do gha wegbe sayọ.
8. De odẹ ọkpa ne ima ya rhiẹre ma wẹẹ, ma hoẹmwẹ e Jehova?
8 Odẹ ne ima ya rhiẹre ma wẹẹ, ma hoẹmwẹ e Jehova ọre ne ima gha na erhunmwu gie ẹre vbe ẹghẹ hia. U ghaa fannọ otọ ẹko ruẹ ma e Jehova vbe erhunmwu, u na vbe gha kpọnmwẹ ọnrẹn ye emwi hia nọ he ru nuẹn, ahoẹmwọmwa ne u mwẹ nẹẹn ghi gha wegbe sayọ. Erriọ vbe ye, u ghaa bẹghe vbene Jehova ya họn erhunmwu ruẹ, asikẹgbe ne u gu ẹre mwẹ ghi gha wegbe sayọ. (Psm 116:1) Ẹghẹ nii, u ghi do gha mwẹ ilẹkẹtin wẹẹ, e Jehova gele rẹn ruẹ. Sokpan, deghẹ u hoo ne u gu e Jehova gha mwẹ asikẹgbe ne khuankhuankhuan, ọ khẹke ne u gha ghee emwi vbene Jehova ghee ẹre. Ọ khẹke ne u vbe rẹn emwi ne Jehova gualọ vbe obọ ruẹ. Emwi nọ khian ru iyobọ nuẹn ya rẹn ena hia ọre, ne u gha tie Baibol, u ghi vbe gha ru erria yan rẹn.
Emwi kpataki nọ gha ya ima sikẹ e Jehova, nọ gha vbe ya ima rẹn emwi nọ gualọ vbe obọ ima ọre ne ima gha tie Baibol ne egbe ima, ma ghi vbe gha ru erria yan rẹn (Ghee okhuẹn 9) *
9. De vbene u khian ya rhiẹre ma wẹẹ, u ya aro nọ ghaan ghee Baibol?
9 Gha ya aro nọ ghaan ghee Evbagbẹn Nọhuanrẹn. E Baibol ọkpa ẹre ọ khian ya ima rẹn ẹmwata vbekpae Jehova kevbe emwamwa nọ mwẹ ne ima. Odẹ ne u khian ya rhiẹre ma wẹẹ, u ya aro nọ ghaan ghee Baibol ọre ne u gha tiẹre vbe ẹdẹgbegbe, u ghi gha muegbe yotọ a te miẹn wẹẹ, ọmwa nọ gu ruẹ tie Baibol rre do guẹ ruẹ emwi, u ghi vbe gha rhie emwi ne u ruẹ ye uyinmwẹ. (Psm 119:97, 99; Jọn 17:17) Uwẹ zẹ ẹghẹ kọ vbe ẹdẹgbegbe, ne u ya gha tie Baibol ra?
10. De emwi ọkpa nọ ya e Baibol lughaẹn ne ebe nikẹre?
10 Ọkpa vbe usun emwi nọ ya e Baibol lughaẹn ne ebe nikẹre ọre wẹẹ, okha ọghe Jesu rre uwu ẹre. Emwa ne aro iran sẹ emwi nibun ne Jesu ru, ẹre ọ ta avbe okha na. E Baibol ọkpa ẹre ọ gele rhan otọ emwi ne Jesu ru ne ima. Zẹvbe ne u ya tie avbe okha ọghe Jesu, u ghi do gha hoo ne u sikẹ ọre sayọ.
11. Vbọ khian ya ruẹ hoẹmwẹ e Jehova?
11 Hoẹmwẹ Jesu, ẹghẹ nii, ahoẹmwọmwa ne u mwẹ ne Jehova ghi gha wegbe sayọ. Vbọ ya ima kha vberriọ? Rhunmwuda, vbene Jehova ya ru emwi, erriọ ẹre Jesu vbe ya ru emwi. (Jọn 14:9) Zẹvbe ne u ya rẹn Jesu sayọ, erriọ ẹre u khian ya gha rẹn aro ọmwa ne Jehova khin, u ghi vbe do hoẹmwẹ ọnrẹn ẹsẹsẹmwẹse. Muẹn roro obọ esi ne Jesu ya gha mu emwa ne emwa ọvbehe ghaa ghee silasila. Te Jesu wa gha tohan avbe ivbiogue, emwa ni khuọnmwi, kevbe emwa nẹi mwẹ iyobọ. Jesu wa vbe rhie ibude nibun ne ima nọ gha ya ima gha mwẹ oghọghọ vbe arrọọ ọghe ima.—Mat 5:1-11; 7:24-27.
12. U ghaa ru erria yan emwi ne Jesu ru nuẹn, de emwi nọ khian gua ruẹ kpa ya ru?
12 U ghaa ru erria yan vbene Jesu ya ya arrọọ ọghẹe dẹ ima werriegbe, ne Jehova mieke na ya orukhọ ọghe ima bọ ima, ahoẹmwọmwa ne u mwẹ ne Jesu ghi gha wegbe yọ. (Mat 20:28) U gha tota roro emwi ne Jesu la gberra rhunmwuda ruẹ, ọ gha gua ruẹ kpa ya roro iro fi uyinmwẹ werriẹ, ne Jehova mieke na yabọ ruẹ. (Iwinna 3:19, 20; 1 Jọn 1:9) Zẹvbe ne ahoẹmwọmwa ne u mwẹ ne Jehova kevbe Jesu ya wegbe yọ, u ghi do gha hoo ne u gha gu emwa ọvbehe ni vbe hoẹmwẹ iran muobọ.
13. De vbene Jehova khian ya ru iyobọ nuẹn?
13 Hoẹmwẹ emwa ni hoẹmwẹ e Jehova. A sẹtin miẹn wẹẹ, emwa vbuwe ẹgbẹe ruẹ nẹi re Osẹe Jehova kevbe avbe ọse ne u ka gu muobọ, ma rẹn evbọzẹe ne u khian na ya egbuẹ fiohan ne Jehova. Rhunmwuda ọni, iran sẹtin gha kpokpo ruẹ. Ọ ghaa yerriọ, e Jehova i khian he ruẹ yọ. Ọ gha loo etẹn ni rre uwu iko ya ru iyobọ nuẹn. Iran ghi do gha re ẹgbẹe ruẹ. U ghaa gu iran muobọ vbe ẹghẹ hia, iran ghi gha ru iyobọ nọ khẹke nuẹn. (Mak 10:29, 30; Hib 10:24, 25) Vbene ẹghẹ ya khian, emwa eso vbuwe ẹgbẹe ruẹ sẹtin do deba ruẹ gha ga e Jehova. Ẹghẹ nii, iran ghi vbe gha ya ilele ọghẹe ru emwi.—1 Pit 2:12.
14. Zẹvbe nọ rre ebe 1 Jọn 5:3, de ere na lae miẹn deghẹ a na gha ya avbe ilele ọghe Jehova ru emwi?
14 Gha ya aro nọ ghaan ghee avbe ilele ọghe Jehova, u ghi vbe gha ya iran ru emwi vbe arrọọ ruẹ. Egbọre vbene u te suẹn gha ruẹ e Baibol, emwi nọ rrọọ ruẹ ekhọe ẹre u ya gha ru emwi, sokpan nia, te u ghi rẹn wẹẹ, na gha ya avbe ilele ọghe Jehova ru emwi, ẹre ọ maan sẹ. (Psm 1:1-3; tie 1 Jọn 5:3.) Ibude nibun wa rre uwu e Baibol ni dekaẹn avbe ọdọ, amwẹ, evbibiẹ emọ kevbe emọ. (Ẹfis 5:22–6:4) Ke obọ ne u ya suẹn gha lele avbe ibude na, ẹi re te ẹgbẹe ruẹ ghi mwẹ oghọghọ sayọ ra? Ẹi re te u ghi vbe mwẹ avbe akpa esiesi rhunmwuda ne u na lele adia ọghe Jehova nọ dekaẹn aro ọse nọ khẹke na gha gu muobọ ra? (Itan 13:20; 1 Kọr 15:33) Vbe nai na gbawawẹ, eban ẹre uwẹ ghi mwẹ oghọghọ sẹ.
15. Vbọ khẹke ne u ru, deghẹ ọ na gha lọghọ ruẹ ne u gha ya avbe ilele ọghe Baibol ru emwi?
15 Ugbẹnso, ọ sẹtin gha lọghọ ruẹ ne u gha ya avbe ilele ọghe Baibol ru emwi. Ọni ẹre ọ si ẹre ne Jehova na loo otu ọghẹe ya kpemehe ebe ughughan ni rhan otọ e Baibol, ni ru iyobọ ne ima ya rẹn alughaẹn nọ rre ẹkpo emwi nọ maan kevbe emwi nẹi maan. (Hib 5:13, 14) U ghaa tie avbe ebe na, u gha do bẹghe ẹre wẹẹ, avbe ilele ni rre Baibol gha sẹtin ru iyobọ ne ima vbe emwi ke emwi ne ima rhirhi gha ru, kevbe wẹẹ, ere rrọọ deghẹ a na gha yae ru emwi vbe arrọọ ọghe ima. Ẹghẹ nii, u ghi gha hoo ne u deba otu e Jehova.
16. De emwa ne Jehova loo ya gbaroghe emwa rẹn?
16 Gha ya aro nọ ghaan ghee otu ọghe Jehova. Iko ughughan ẹre ọ rre otu ọghe Jehova; Jesu ọre uhunmwuta ọghe avbe iko na. (Ẹfis 1:22; 5:23) Jesu keghi zẹ ibozẹghẹ etẹn eso vbuwe ẹbu emwa na hannọ zẹ, ne iran gha siẹnro iwinna nọ khian vbe otu e Jehova vbe ẹdẹnẹrẹ. Iran na ẹre Jesu tiẹre, “ọviẹn nọ gia mu ẹtin yan kevbe nọ fuẹro,” iran i vbe ya iwinna ne Jesu mu ne iran rhẹghẹrẹ, iran keghi ya evbare orhiọn koko avbe ohuan ọghe Jehova, erriọ ẹre iran vbe ya gbogba ga iran. (Mat 24:45-47) Ọviẹn na keghi hia na miẹn wẹẹ, ediọn ni gbegba rre dọmwadẹ iko ni khian gha gbaroghe ima. (Aiz 32:1, 2; Hib 13:17; 1 Pit 5:2, 3) Avbe ediọn ni rre uwu iko muegbe ne iran ya loo ẹghẹ kevbe ẹrhiọn ọghe iran ya ru iyobọ nuẹn, ne u mieke na sẹtin gha gu e Jehova mwẹ asikẹgbe ne khuankhuankhuan. Odẹ ọkpa ne kpataki ne iran khian ya ru iyobọ nuẹn ọre wẹẹ, iran gha maa ruẹ vbene a ya kporhu hẹ.—Ẹfis 4:11-13.
17. Zẹvbe nọ rre ebe Rom 10:10, 13, 14, vbọzẹe nọ na khẹke ne ima gha tama emwa ọvbehe vbekpae Jehova?
17 Ru iyobọ ne emwa ọvbehe ne iran ya hoẹmwẹ e Jehova. Jesu keghi tama erhuanegbe ẹre wẹẹ, ne iran gha maa emwa emwi vbekpae Jehova. (Mat 28:19, 20) Ọmwa sẹtin gha ru iwinna na, rhunmwuda wẹẹ, emwi nẹi mwẹ a ma ru nọ. Sokpan, zẹvbe ne ahoẹmwọmwa nọ mwẹ ne Jehova ya wegbe yọ, ekhọe hia ẹre ọ khian ghi ya gha ru ẹre, vbene ukọ e Pita kevbe Jọn ghaa ye. Iran keghi kha wẹẹ, “ẹi gi ima ru wẹẹ, emwi ne aro ima sẹ nẹ, ehọ mwa vbe họẹn nẹ, ne a ghẹ ghi tae ladian.” (Iwinna 4:20) Ma gha sẹtin ru iyobọ ne ọmwa ya do miẹn odẹ ẹmwata, oghọghọ nọ sẹ ọre i rrọọ. Muẹn roro vbene ọ ghaa ye Filip hẹ, vbe Ovbi Etiopia nii do rẹn ẹmwata nọ rre Evbagbẹn Nọhuanrẹn, ọ na vbe dinmwiamẹ! U ghaa maa emwa emwi vbekpae Jehova vbene Filip ru ẹre, ọni rhiema wẹẹ, u hoo ne u gha re Osẹe Jehova. (Tie Rom 10:10, 13, 14.) Ẹghẹ nii, u ghi vbe gha nọ egbuẹ wẹẹ: “De emwi nọ gha da mwẹ yi ne I ghẹ dinmwiamẹ?”—Iwinna 8:36, NW.
18. De emwi ne ima khian ziro yan vbe ako iruẹmwi nọ ghi lele ọna?
18 Idinmwiamẹ ọre azẹ nọ ghi ru ekpataki sẹ ne ọmwa gha sẹtin ru vbe arrọọ ọghẹe. Idinmwiamẹ i re emwi na ya rhẹghẹrẹ, rhunmwuda ọni, ọ khẹke ne u ka mu ukpa mu uwerhẹn ghee ẹre u ke dinmwiamẹ. De emwi nọ khẹke ne u rẹn vbekpae idinmwiamẹ? De emwi nọ khẹke ne u ru, vbene u te dinmwiamẹ, kevbe vbe u gha dinmwiamẹ nẹ? Ma gha ziro yan avbe inọta na, vbe ako iruẹmwi nọ ghi lele ọna.
IHUAN 2 E Jehova Ọre Eni Ruẹ
^ okhuẹn 5 Emwa eso te hoẹmwẹ e Jehova, sokpan iran ma rẹn deghẹ iran muegbe ne iran khian ya dinmwiamẹ zẹvbe Osẹe Jehova. Adeghẹ isievẹn vbenian ẹre u werriẹ aro daa, ako iruẹmwi na gha ya ruẹ rẹn emwi eso nọ khẹke ne u ru, nọ gha gua ruẹ kpa ya dinmwiamẹ.
^ okhuẹn 5 Emwa hia i re ọkpa, rhunmwuda ọni, ẹi re esalẹbẹ na ya lele avbe azẹvbiro ni rre ako iruẹmwi na ọkade ọkade.
^ okhuẹn 6 Igiemwi nibun ọvbehe rre ebe ẹmu eva na, Was Life Created? kevbe The Origin of Life—Five Questions Worth Asking.
^ okhuẹn 61 EMWI NE EFOTO NA DEMU: Ọtẹn nokhuo ọkpa gha rhie asobọrrie ne okhuo ọkpa nọ miẹn vbe ẹki.
