1-2. Vbọzẹ ne ima gha na sẹtin gha roro ẹre wẹẹ, e Jehova ma họn erhunmwu ima?

 “GI E Jehova gha ya ruẹ sọyẹnmwẹ; ọ gha ru emwi nọ da ruẹ vbe orhiọn nuẹn.” (Psm 37:4) U miẹn emwi ne Jehova yan rẹn wẹẹ irẹn khian ru ne ima! Sokpan, ọ khẹke ne ima wa ya aro yọ wẹẹ, emwi ke emwi ne ima nọ e Jehova nọ ru ne ima, ẹre ọ khian wa ru vbobọvbobọ ra? Vbọzẹ ne ọta na na ru ekpataki? Gia guan kaẹn igiemwi eso. Ọtẹn nokhuo ọkpa nọ ma he ru orọnmwẹ na erhunmwu ne Jehova ru iyobọ ne irẹn, ne irẹn sẹtin yo Owebe Ọghe Etẹn Ni Kporhu Iyẹn Nọ Maan Ọghe Arriọba. Sokpan, ukpo nibun gberra nẹ, a ma he ye tie ẹre. Ọtẹn nokpia ọkpa nọ ye re igbama keghi na erhunmwu ne Jehova mu irẹn egbe rran, ne irẹn mieke na sẹtin kakabọ rhiegbe ye iwinna vbe uwu iko. Sokpan vbe na gbe aghẹn erriọ aghẹn ye ye, emianmwẹ ma fo, ọ ma vbiẹ. Evbibiẹ emọ ni re Ivbi Otu e Kristi keghi na erhunmwu ne ovbi iran ghẹ kpa hin odẹ ọghe ẹmwata rre. Sokpan, ovbi iran na sẹ e Jehova rae.

² Ọ gha kẹ, ọ mwẹ emwi ne uwẹ vbe nọ e Jehova re, nọ ma he sẹ ruẹ obọ. Rhunmwuda ọni, u sẹtin gha roro ẹre wẹẹ, e Jehova họn erhunmwu emwa ọvbehe, sokpan ẹ i họn ọghuẹ. Ra u sẹtin vbe gha roro ẹre wẹẹ, ọ mwẹ emwi dan ne u ru. Erriọ wa gha ye ne ọtẹn nokhuo ọkpa na tie ẹre Janice. b Irẹn vbe ọdafẹn ọnrẹn kegha na erhunmwu ne Jehova ru iyobọ ne iran, ne iran sẹtin ya ga vbe Bẹtẹl. Ọ khare wẹẹ: “I na wa gha roro ẹre wẹẹ, a gha tie ima vbe Bẹtẹl vbobọvbobọ.” Sokpan ukpo nibun gberra, a ma ye tie iran. E Janice khare wẹẹ: “I ma zẹdẹ ghọghọ yọ, I ma vbe rẹn emwi ne I khian ru. I na gha roro ẹre deghẹ ọ mwẹ emwi ne I ru nọ sọnnọ e Jehova. Ẹ i re avbiẹ inugba ẹre I he na erhunmwu ne Jehova ru iyobọ mẹ, ne I sẹtin yo e Bẹtẹl. Vbọzẹ nọ ma na he ye họn erhunmwu mwẹ?”

3. Vbe ima khian zẹ iro yan vbe ako iruẹmwi na?

 ³ Ugbẹnso, ma sẹtin gha gbawawẹ deghẹ e Jehova gele họn erhunmwu ima. Uhiẹn, eguọmwadia e Jehova eso vbe ẹghẹ nẹdẹ vbe gha mwẹ egbe iziro vbenian. (Job 30:20; Psm 22:2; Hab 1:2) De emwi nọ gha ya ruẹ gha mwẹ ilẹkẹtin wẹẹ, e Jehova gha họn erhunmwu ruẹ? (Psm 65:2) Ne ima ya rhie ewanniẹn ye inọta na, ma gha ka guan kaẹn emwi eha na: (1) De emwi ne ima ya aro yi wẹẹ e Jehova gha ru? (2) De emwi ne Jehova hoo ne ima ru? (3) Vbọzẹ nọ na khẹke ne ima fi emwi ne ima nọ vbe erhunmwu werriẹ vbe ugbẹnso?

4. Zẹvbe nọ rre ebe Jerimaia 29:​12, de emwi ne Jehova yan rẹn wẹẹ irẹn khian ru?

⁴ E Jehova yan rẹn wẹẹ irẹn gha họn erhunmwu ima. (Tie Jerimaia 29:12.) Osanobua hoẹmwẹ eguọmwadia ẹre, rhunmwuda ọni, ẹ i mwẹ ọ ma họn erhunmwu iran. (Psm 10:17; 37:28) Sokpan, ọna ma rhie ma wẹẹ, emwi hia ne ima nọ rẹn, ẹre ọ khian ru ne ima. A sẹtin miẹn wẹẹ, agbọn ọgbọn gha rre nẹ, e Jehova ke ru emwi eso ne ima nọ rẹn.

5. De emwi ne Jehova ghee vbe ọ ghaa danmwehọ erhunmwu ima? Rhan otọ re.

⁵ E Jehova ghee vbene erhunmwu ne ima na ya gu iho ọghe irẹn ro hẹ. (Aiz 55:​8, 9) Ọkpa vbe usun emwi ne Jehova gualọ ọre ne uhunmwu otagbọn na vuọn ne ikpia vbe ikhuo ni rre ototọ ọdakha ọghẹe, ni ya ọyẹnmwẹ gae vbe uwu akugbe. Sokpan, e Setan khare wẹẹ, emwa nagbọn ghaa kha yan egbe iran ẹre agbọn khian na maan iran sẹ. (Gẹn 3:​1-5) Ne agbọn vbe ẹrinmwi mieke na rẹn wẹẹ, ohoghe ẹre Esu ta, e Jehova keghi kie ẹkpotọ yọ ne emwa nagbọn gha kha yan egbe iran. Sokpan, rhunmwuda ne emwa nagbọn na khaevbisẹ, ẹre ọ si ẹre ne ima na werriẹ aro daa ọlọghọmwa nibun vbe ẹdẹnẹrẹ. (Asan 8:9) Ma rẹnrẹn wẹẹ, e Jehova i khian sọfurre ye avbe ọlọghọmwa na hia vbe ẹghẹ na. E Jehova gha ru vberriọ, emwa eso sẹtin do gha kha wẹẹ, arriọba emwa nagbọn ẹre ọ gele maan sẹ, rhunmwuda ọ sọfurre ye ọlọghọmwa ne emwa nagbọn werriẹ aro daa.

6. Vbọzẹ ne ima gha na sẹtin gha mwẹ ilẹkẹtin wẹẹ, e Jehova i ru emwi nọ ma gba?

⁶ Emwa ughughan gha nọ emwi ọkpa vbe obọ e Jehova, e Jehova sẹtin họn erhunmwu iran vbe odẹ ughughan. Vbe igiemwi, vbe ẹghẹ ne Ọba Hẹzẹkaia ya gha khuọnmwi emianmwẹ nọ wegbe, ọ keghi na erhunmwu gie Jehova nọ mu irẹn egbe rran. E Jehova na gele mu ẹre egbe rran. (2 Ọba 20:​1-6) Sokpan vbe ukọ e Pọl rinmwian e Jehova nọ rhie “igban” nọ rre uwu egbe irẹn hin, ọ gha kẹ, emianmwẹ ẹre Pọl ghaa guan kaẹn, e Jehova ma sọfurre ye ọlọghọmwa nii. (2 Kọr 12:​7-9) Gi ima vbe guan kaẹn ukọ e Jems kevbe Pita. Ọba e Hẹrọd kegha hoo nọ gbele iran eva rua. Etẹn vbe uwu iko keghi mu ẹmwẹ e Pita ye erhunmwu, ọ gha kẹ, erriọ iran vbe mu ẹmwẹ e Jems ye erhunmwu. Sokpan, a keghi gbe Jems rua, vbene Jehova na miẹn e Pita fan vbe odẹ ọghe ọyunnuan. (Iwinna 12:​1-11) Ma sẹtin gha nọ wẹẹ, ‘Vbọzẹ ne Jehova na miẹn Pita fan, ọ na sẹ e Jems rae?’ E Baibol ma khama ima. c Sokpan, emwi ọkpa ne ima rẹnrẹn ọre wẹẹ, ọmwa nọ ru “emwi nọ kere” ẹre Jehova khin. (Diut 32:4) Ma vbe rẹn wẹẹ, e Jehova hoẹmwẹ iran eva. (Arhie 21:14) Ugbẹnso, e Jehova sẹtin họn erhunmwu ima vbe odẹ ne ima ma te ya aro yi. Sokpan, rhunmwuda ne ima na rẹn wẹẹ, odẹ nọ ghi maan sẹ ẹre Jehova ya họn erhunmwu ima, ma i gui ẹzọ uwu unu vbe Jehova gha họn erhunmwu ima vbe odẹ ne ima ma te ya aro yi.—Job 33:13.

7. De emwi nọ ma khẹke ne ima gha ru, vbọzẹ?

⁷ Ọ ma khẹke ne ima gha ya ọlọghọmwa ne  ima ye gie ọghe emwa ọvbehe. Vbe igiemwi, ma sẹtin sunu ye emwi ne ima hoo ne Jehova ru ne ima, sokpan emwi nii ma sẹ ima obọ. Ma na do miẹn wẹẹ ọmwa ọvbehe vbe nọ egbe emwi vberriọ vbe obọ e Jehova, ọ na wa khọ wẹẹ, e Jehova ru ẹre nẹẹn. Egbe emwi vbenian wa sunu daa ọtẹn nokhuo ọkpa na tie ẹre Anna. Ọ keghi na erhunmwu ne ọdafẹn ọnrẹn na tie ẹre Matthew miẹn uhunmwu vbe cancer nọ ghaa khuọnmwi. Vbe uwu ẹghẹ na, etẹn nikhuo eva ni khian eniwanrẹn nẹ vbe gha khuọnmwi cancer. Anna keghi kakabọ rhiegba ye erhunmwu na na, ne Jehova ru iyobọ ne Matthew kevbe etẹn nikhuo eva na. Egbe keghi rran etẹn nikhuo eva na, sokpan e Matthew na wu. Vbe okaro, Anna na gha roro ẹre wẹẹ, adeghẹ e Jehova ẹre ọ mu etẹn nikhuo eva na egbe rran, vbọzẹ nọ ma na mu ọdafẹn irẹn egbe rran? Ẹmwata nọ rrọọ ọre wẹẹ, ma ma rẹn emwi nọ si ẹre ne egbe na rran etẹn nikhuo eva nii. Sokpan, emwi ne ima rẹnrẹn ọre wẹẹ, vbe nẹi khian ghi kpẹẹ gbe, e Jehova gha sọfurre ye ọlọghọmwa hia fẹẹrẹ ne ima werriẹ aro daa, ọ wa vbe ya aro ye ẹghẹ nọ khian ya huẹn avbe ọsiọre hia ni wulo kpaegbe.—Job 14:15.

8. (a) Zẹvbe nọ rre ebe Aizaia 43:​2, de vbene Jehova ya ru iyobọ ne ima hẹ? (b) De vbene erhunmwu ya ru iyobọ ne ima vbe ima ghaa rre uwu ọlọghọmwa? (Ya ghee vidio nọ khare wẹẹ, Erhunmwu Keghi Ru Iyobọ Ne Ima Vbe Ẹghẹ Ibavbaro.)

⁸ Ẹghẹ ọkpa i rrọọ ne Jehova khian ya sẹ ima rae. Zẹvbe erha nọ mwẹ ahoẹmwọmwa, ọ wa da e Jehova vbe ọ gha bẹghe ẹre we ima susẹ. (Aiz 63:9) Ọrheyerriọ, e Jehova i khian ru ẹre ne ima ghẹ zẹdẹ werriẹ aro daa ọlọghọmwa rhọkpa. A gha sẹtin ya ọlọghọmwa ne ima werriẹ aro daa gie ẹzẹ kevbe erhẹn. (Tie Aizaia 43:2.) Vbọrhirhighayehẹ, e Jehova yan rẹn wẹẹ irẹn “gha mudia” ke ima. Ẹ i khian kue ne ọlọghọmwa ne ima ye si ima hin odẹ ẹmwata rre. E Jehova vbe loo orhiọn nọhuanrẹn ọghẹe ya ru iyobọ ne ima, ne ima mieke na sẹtin zin egbe. (Luk 11:13; Fil 4:13) Nọnaghiyerriọ, ma rẹnrẹn wẹẹ, emwi ke emwi nọ gha ru iyobọ ne ima ya sẹtin zin egbe kevbe nọ gha ru iyobọ ne ima ya ga e Jehova sẹ ufomwẹ, e Jehova gha ru ẹre ne ima. d

9. Zẹvbe nọ rre ebe Jems 1:​6, 7, vbọzẹ nọ na khẹke ne ima gha mwẹ ilẹkẹtin wẹẹ, e Jehova gha ru iyobọ ne ima?

⁹ E Jehova hoo ne ima mu ẹtin yan irẹn. (Hib 11:6) Ugbẹnso, ma sẹtin gha roro ẹre wẹẹ, ọlọghọmwa ne ima ye sẹ ima. Ma sẹtin kue gha gbawawẹ deghẹ e Jehova gha ru iyobọ ne ima. Sokpan e Baibol gi ima rẹn wẹẹ, vbe ẹtin e Jehova ma gha sẹtin “san egbekẹn.” (Psm 18:29) Ne ima gha te ya gha gbawawẹ, ọ khẹke ne ima ya ekhọe hia na erhunmwu gie Jehova, ma ghi vbe gha mwẹ ilẹkẹtin wẹẹ, ọ gha họn erhunmwu ima.—Tie Jems 1:​6, 7.

10. Ru igiemwi eso ọghe emwi ne ima gha sẹtin ru vbe ima gha na erhunmwu ne Jehova ru iyobọ ne ima.

¹⁰ E Jehova hoo ne ima zẹ emwi ru vbe ima gha na erhunmwu nẹ. Vbe igiemwi, ọtẹn nokpia sẹtin na erhunmwu ne Jehova ru iyobọ ne irẹn, na rhie ẹghẹ ne irẹn vbe isiwinna, ne irẹn mieke na sẹtin yo asikoko nọkhua. De vbene Jehova gha ya sẹtin họn erhunmwu na hẹ? Ọ sẹtin rhie udinmwẹ ne ọtẹn nokpia na, nọ mieke na sẹtin gu enọwanrẹn isiwinna ọghẹe guan. Sokpan, ọ khẹke ne ọtẹn nokpia na zẹ emwi ru, ọ ghi bu enọwanrẹn isiwinna ọghẹe ya tama rẹn. Ọ sẹtin nọ inugba nọ khin. Ọ sẹtin vbe hia nọ gualọ ọmwa ọvbehe nọ gha mudia ne irẹn vbe ẹghẹ ne irẹn khian ya gha rrie asikoko. Vbe deba ọni, deghẹ esa na gha rrọọ, ọ sẹtin kue kha wẹẹ, na rhie igho eso hin igho na khian hae irẹn re rre, rhunmwuda ẹghẹ nọ khian rhie na.

11. Vbọzẹ nọ na khẹke ne ima gha nọ emwi ne ima hoo ne Jehova ru ne ima yan egbe yan egbe?

 ¹¹ E Jehova hoo ne ima gha nọ emwi ne ima gualọ vbe ẹghẹ hia. (1 Tẹs 5:17) E Jesu gi ima rẹn wẹẹ, ẹ i re emwi hia ne ima nọ rẹn, ẹre ọ khian sẹ ima obọ vbobọvbobọ. (Luk 11:9) Rhunmwuda ọni, ghẹ gi egbe wọọ ruẹ! Rhiegba ye erhunmwu na na, u vbe gha nọ emwi ne u gualọ yan egbe yan egbe. (Luk 18:​1-7) Ma ghaa nọ emwi ne ima gualọ vbe obọ e Jehova yan egbe yan egbe, te ima rhie ẹre ma we emwi ne ima gualọ wa ru ekpataki. Te ima vbe rhie ẹre ma wẹẹ, ma mwẹ amuẹtinyan nọ wegbe wẹẹ, ọ gha sẹtin ru iyobọ ne ima.

12. (a) De inọta nọ khẹke ne ima nọ egbe ima re vbekpa emwi ne ima nọ vbe erhunmwu, vbọzẹ? (b) De emwi eso ne ima gha ru nọ gha rhie ẹre ma wẹẹ, ma rhie ọghọ ne Jehova vbe ima ghaa na erhunmwu? (Ya ghee ẹkpẹti nọ khare wẹẹ, “ Erhunmwu Mwẹ Rhie Ẹre Ma Wẹẹ, I Rhie Ọghọ Ne Jehova Ra?”)

¹² Adeghẹ emwi ne ima gualọ ma sẹ ima obọ, ma sẹtin nọ egbe ima ọta eha na. Nokaro, ọre wẹẹ, ‘Emwi nọ khẹke ẹre imẹ na erhunmwu yi ra?’ Ma mobọ roro ẹre wẹẹ, ma rẹn emwi nọ maan ne ima sẹ. Sokpan, a sẹtin miẹn wẹẹ emwi ne ima nọ rẹn i khian maan ima egbe vbe odaro. Adeghẹ ọ mwẹ ọlọghọmwa ne ima hoo ne Jehova sọfurre yi, a sẹtin miẹn wẹẹ, ọ mwẹ odẹ ọvbehe nọ maan sẹ odẹ ne ima te hoo ne Jehova ya sọfurre yọ. A sẹtin vbe miẹn wẹẹ emwi eso ne ima nọ, ma gua iho ọghe Osanobua ro. (1 Jọn 5:14) Gia zẹ iro yan igiemwi ọghe evbibiẹ emọ na ka guan kaẹn sin. Iran na erhunmwu ne Jehova ru iyobọ ne ovbi iran, nẹ ghẹ kpa hin odẹ ọghe ẹmwata rre. Ọ khọ wẹẹ, emwi nọ maan iran te nọ. Ọrheyerriọ, e Jehova i khian kpikpi ọmwa rhọkpa nọ do ga irẹn. Ọ hoo ne dọmwadẹ ọghẹe zẹ ne egbe ẹre wẹẹ irẹn ẹre ima khian ga, uhiẹn ya sẹ egbe ivbi ima. (Diut 10:​12, 13; 30:​19, 20) Nọnaghiyerriọ, evbibiẹ emọ  sẹtin nọ e Jehova nọ ru iyobọ ne iran, ne iran sẹtin sẹ ekhọe ọghe ovbi iran, nọ mieke na do hoẹmwẹ e Jehova kevbe nọ vbe do gha re ọsiọre.—Itan 22:6; Ẹfis 6:4.

13. Zẹvbe nọ rre ebe Hibru 4:​16, de ẹghẹ ne Jehova gha ya ru iyobọ ne ima? Rhan otọ re.

¹³ Inọta nogieva ne ima gha sẹtin nọ egbe ima ọre wẹẹ, ‘Ọ sẹ ẹghẹ ne Jehova hoo nọ ya họn erhunmwu mwẹ nẹ ra?’ Ma sẹtin gha hoo ne Jehova wa họn erhunmwu ima vbobọvbobọ. Vbọrhirhighayehẹ, e Jehova ẹre ọ rẹn ẹghẹ nọ maan sẹ. (Tie Hibru 4:16.) Adeghẹ emwi ne ima gualọ ma sẹ ima obọ vbobọvbobọ, ma sẹtin do gha roro ẹre wẹẹ, e Jehova ma họn erhunmwu ima. Sokpan, a sẹtin miẹn wẹẹ emwi ne Jehova khare ọre wẹẹ, ‘Ẹghẹ ma he sẹ.’ U ye yerre, igiemwi ọghe ọmokpia ọkpa ne ima ka guan kaẹn sin, ne egbe ma rran, nọ na erhunmwu ne Osanobua mu irẹn egbe rran ra? Akpawẹ e Jehova mu ẹre egbe rran vbe odẹ ọghe ọyunnuan, Esu gha te sẹtin kha wẹẹ, rhunmwuda nọ na mu ẹre egbe rran, ẹre ọ si ẹre nọ na ye gha ga e Jehova. (Job 1:​9-11; 2:4) Vbe deba ọni, e Jehova mwamwa ẹghẹ yọ nẹ nọ khian ya mu emwa hia egbe rran. (Aiz 33:24; Arhie 21:​3, 4) Sokpan, vbe nọ te sẹ ẹghẹ nii, ọ ma khẹke ne ima ya aro yọ wẹẹ, a gha mu ima egbe rran vbe odẹ ọghe ọyunnuan. Nọnaghiyerriọ, ọtẹn nii gha sẹtin nọ e Jehova nọ rhie ẹtin ne irẹn kevbe nọ mu irẹn orhiọn sotọ, ne irẹn mieke na sẹtin zin egbe kevbe ne irẹn ye gha ya ekhọe hia ga e Jehova.—Psm 29:11.

14. Vbua miẹn ruẹ vbe igiemwi ọghe Janice?

¹⁴ U ye yerre igiemwi ọghe ọtẹn nokhuo Janice, nọ ghaa na erhunmwu ne Jehova ru iyobọ ne irẹn, ne irẹn mieke na ya ga vbe Bẹtẹl ra? Ọ gberra ukpo isẹn, ọ ke do rẹn vbene Jehova ya họn erhunmwu ẹnrẹn hẹ. Ọ khare wẹẹ: “E Jehova keghi loo ẹghẹ na ya ma mwẹ emwi, ọ na vbe ru iyobọ mẹ ya gha re ọmwa esi. I na do bẹghe ẹre wẹẹ, ọ te khẹke ne I mu ẹtin yan rẹn sayọ. Ọ  khẹke ne I gha mwẹ alaghodaro vbe odẹ ne I ya ruẹ e Baibol ne egbe mwẹ, kevbe wẹẹ, I gha sẹtin gha mwẹ ọyẹnmwẹ nọ sẹ otọ ẹko vbe ehe ke ehe ne I na ga e Jehova.” Ọ ghi sẹ ẹghẹ, otu keghi kpasẹ yọ ne Janice vbe arowa ẹre gha ga zẹvbe ọgbaroghe ọghe otako. E Janice khare wẹẹ: “E Jehova wa gele họn erhunmwu mwẹ vbe odẹ ne I ma te ya aro yi. Ọ rhie ẹghẹ I ke do bẹghe odẹ ne Jehova ya họn erhunmwu mwẹ, sokpan, iyobọ nọkhua ne Jehova ru mẹ kevbe ahoẹmwọmwa nọ mwẹ da mwẹ wa ya mwẹ sọyẹnmwẹ.”

15. Vbọzẹ nọ ma na khẹke ne ima wa sunu yi emwi ọkpa taara, vbe ima ghaa na erhunmwu? (Vbe ya ghee efoto.)

¹⁵ Inọta nogieha ne ima gha sẹtin nọ egbe ima ọre wẹẹ, ‘Ọ khẹke ne I fi emwi ne I nọ vbe erhunmwu werriẹ ra?’ Agharhemiẹn wẹẹ, te ọ khẹke ne ima wa sunu ye emwi ne ima hoo ne Jehova ru ne ima, sokpan ugbẹnso deghẹ ima hoo ne ima rẹn emwi ne Jehova gele gualọ, ọ gha maan sẹ, deghẹ ima ma wa sunu ye emwi ọkpa. Gia vbe guan kaẹn igiemwi ọghe ọtẹn nokhuo nii nọ ma he ru orọnmwẹ ne ima ka guan kaẹn sin, nọ ghaa na erhunmwu ne Jehova ru iyobọ ne irẹn, ne irẹn sẹtin yo Owebe Ọghe Etẹn Ni Kporhu Iyẹn Nọ Maan Ọghe Arriọba. Ọ hoo nọ yo owebe na, nọ mieke na sẹtin yo ehe na na gualọ iyobọ etẹn. Zẹvbe ne ọtẹn na ya na erhunmwu ne irẹn sẹtin yo owebe na, ọ sẹtin vbe na erhunmwu ne Jehova ru iyobọ ne irẹn ya rẹn odẹ ọvbehe ne irẹn gha ya sẹtin ru sayọ vbe ugamwẹ ọghẹe. (Iwinna 16:​9, 10) Iyeke ọni, ọ ghi zẹ emwi ru, ọ ghi ya nọ ọgbaroghe ọghe otako ọghẹe deghẹ iko rhọkpa rrọọ nọ gualọ iyobọ ọghe avbe arọndẹ, ra ọ sẹtin gbẹn ebe gie abotu, ọ ghi nọ iran deghẹ ọ mwẹ eke na na gualọ iyobọ etẹn. e

16. De ilẹkẹtin ne ima mwẹ?

¹⁶ Zẹvbe ne ima he ruẹ ọre sin, ma gha sẹtin gha mwẹ ilẹkẹtin wẹẹ, e Jehova gha họn erhunmwu ima vbe odẹ nọ ghi maan sẹ. (Psm 4:3; Aiz 30:18) Ugbẹnso, a sẹtin miẹn wẹẹ, e Jehova i khian họn erhunmwu ima vbe odẹ ne ima te ya aro yi. Sokpan ma mwẹ ilẹkẹtin wẹẹ, ẹ i mwẹ e Jehova ma họn erhunmwu ima. Ọ hoẹmwẹ ima ẹ i re ne kherhe. Ẹ i khian sẹ ima rae ẹdẹ. (Psm 9:10) Nọnaghiyerriọ, “mu ẹtin yan Osanobua vbe ẹghẹ hia,” ne u fannọ otọ ẹko ruẹ hia ma rẹn vbe erhunmwu.—Psm 62:8.