Ẹvbo na tie ẹre Tampere vbe Finland ẹre I na wan. Ẹgbẹe mwẹ ma mobọ gha mwẹ obọ vbe ugamwẹ, sokpan iran ghee ẹre wẹẹ, emwi nọ ru ekpataki nọ na yo owebe, iran vbe maa ima re, ne ima gha mwẹ uyinmwẹ esi. Ovbi Germany ẹre iye mwẹ khin, odẹ ekẹn ọghe Germany ẹre evbibiẹ mwẹ nọkhua ye, I yerrẹ wẹẹ, I zẹdia ya tuọ iran.

 Ke egbe ọvbokhan gha dee, ẹre iku isasegbe ke yẹẹ mwẹ. Vbe I wan dee, I wa gha mwẹ obo vbe iku isasagbe ughughan, sokpan I ghi rre ukpo 14, I na ghi rhiegba ye tẹnisi na gbe. Vbe I ghi sẹ ukpo 16, igba eva ra eha vbe ẹdẹ, ẹre a ya gha maa mwẹ vbene a ya gbe tẹnisi hẹ, ọ ghaa rre ẹghẹ ota, mẹ tobọ mwẹ ghi gha ruẹ vbene a ya gbe hẹ. Odẹ ughughan na ya gbe tẹnisi na wa gha yẹẹ mwẹ; zẹ vbene I ya rhiegba ye tẹnisi na gbe, ọ na ghi do gha ya mwẹ wegbe, egbe i vbe rherhe wọọ mwẹ. Mẹ vbe avbe ọse mwẹ zẹdia ya sọyẹnmwẹ egbe, ma ghi vbe daa beer, sokpan I i daa re gberra egbe, I i vbe loo ikpẹ ukhunmwu ni wegbe. Emwi ọkpa ne I wa rẹn na ru ọre tẹnisi na gbe. Emwi ne I mu ye okaro vbe arrọọ mwẹ wa gha nọ.

 Otu ọkpa na tie ẹre ATP keghi ru emwamwa ọghe tẹnisi, ne emwa ughughan vbe otagbọn ni gua gbe tẹnisi, khian na gha mwẹ obọ, ukpo 17 ẹre I ye, vbe I deba otu na. * Ẹ i re avbiẹ inugba I mu okaro, erriọ I vbe ya mu ive nibun, ọna ẹre ọ ghi do ya emwa nibun rẹn mwẹ. Vbe I ghi rre ukpo 22, I na do gha re ọkpa vbe orhunmwu 50 ni gbe tẹnisi sẹ.

 Ukpo nibun ẹre I ya gha yo ẹvbo ughughan ya gbe tẹnisi. I wa miẹn ehe ughughan ni mose, erriọ I vbe miẹn vbene emwa rhioya hẹ, vbene emwa ya de uza hẹ, vbene emwa vbe ya loo ikpẹ ukhunmwu ni wegbe, kevbe vbene emwa he ya mu agbọn na rhia hẹ, vbe na ghee amẹ kevbe ẹhoho. Vbe igiemwi, vbe I yo United States, iran na tama ima wẹẹ, ne ima ghẹ yo ehe eso vbe ẹvbo nii, rhunmwuda emwi dan ni sunu vba. Ena hia ma zẹdẹ gha ya ẹko rhiẹnrhiẹn mwẹ. Agharhemiẹn wẹẹ I ghaa ru iwinna nọ yẹẹ mwẹ, ọ ma gha ya mwẹ ghọghọ.

 Avbe Osẹe Jehova na do suẹn gha gu igbakhian mwẹ ighẹ Sanna ruẹ emwi. Ọ na wa gha rhie mwẹ ogiẹ vbe miẹn wẹẹ ẹmwẹ ugamwẹ yẹẹ ọre, sokpan I ma gbikhan yọ iruẹmwi nii. Ukpo 1990 ẹre ima ru orọnmwẹ, ọ na ghi dinmwiamẹ zẹvbe ọkpa vbe Osẹe Jehova vbe ukpo nọ lelẹe. Nọ ne imẹ, I i mwẹ ugamwẹ ne I ye, agharhemiẹn wẹẹ I rẹn wẹẹ Osanobua rrọọ. I yerre wẹẹ, ẹghẹ hia ẹre iye mwẹ nọkhua ya gha tie Baibol, irẹn ẹre ọ kue maa mwẹ vbene a ya na erhunmwu hẹ.

 Ẹdẹ ọkpa mẹ vbe ọvbokhan mwẹ na ya tuọ ọdọ vbe amwẹ ọkpa, Osẹe Jehova iran khin, eni ọdafọn ne okhuo ọre Kari, ọ na ma mwẹ ẹmwi ne Baibol tae yotọ vbekpae “ẹdẹ okiekie.” (2 Timoti 3:​1-5) Emwi nọ ma mwẹ re na wa mu mwẹ orhiọn, ọ na do ya mwẹ rẹn evbọ si ẹre ne emwi dan na gba ehe hia. Ima ma mobọ guan kaan ẹmwẹ ugamwẹ vbe ẹdẹrriọ. Ke ẹdẹrriọ kpa, ẹre Kari ghi ya suẹn gha ya e Baibol maa mwẹ emwi, I na do gha bẹghe ẹre wẹẹ, ẹmwata ẹre ọ maa mwẹ re. Rhunmwuda vbene iwinna mwẹ khare, I ma miẹn ẹghẹ ya gha ruẹ e Baibol, sokpan e Kari ma gi egbe wọọ re. E lẹta ẹre ọ ya gha rhie ewanniẹn ye inọta ni nọ rẹn vbe ẹghẹ iruẹmwi. Erriọ vbe gha ya e Baibol rhie ewanniẹn ye avbe inọta ni wegbe ne I nọ, kherhe kherhe, I na do bẹghe ẹre wẹe, Arriọba Osanobua ọkpa ẹre ọ khian sẹtin sọfurre ye ọlọghọmwa hia ni rre agbọn na. Ẹko wa sẹ mwẹ ọyẹnmwẹ ne I na do rẹn eni Osanobua, nọ re Jehova, I i khian sẹtin miamia emwi hia nọ re ru ne ima. (Psalm 83:18) Emwi ọkpa nọ wa mu mwẹ ekhoẹ sẹ, ọre nọ na ya ovbi ẹre zọese ne ima, emwi ne Osanobua ru na, ẹ i re ọghe abawẹ, sokpan te irẹn ya rhie ẹre ma wẹẹ, irẹn gele hoẹmwẹ ima. (Jọn 3:​16) I na vbe ruẹ ọre wẹẹ, I gha sẹtin gha r e ọse Osanobua, I ghi vbe gha rrọọ vbe etẹbitẹ. (Jems 4:8) I na ghi nọ egbe mwẹ wẹẹ, “De vbene I khian ya rhie ẹre ma wẹẹ, I gbọyẹmwẹ ye emwi hia ne Osanobua he ru mẹ?”

 Ẹre I na ghi gha mu enegbe mwẹ roro. Emwi ne I ghaa ruẹ vbe Baibol gu mwẹ rẹn wẹẹ, na gha rhie ne emwa ọvbehe ẹre oghọghọ ye sẹ, ọni ẹre ọ si ẹre, ne I na gha hoo ne I tama emwa ọvbehe emwi ne I yayi. (Iwinna 20:35) Zẹvbe ọmwa nọ wa guẹ tẹnisi na gbe, ikpẹdẹ 200 ẹre I gbe vbe ukpokpo vbe I gha ya gbe tẹnisi vbe ẹvbo ọvbehe. E tẹnisi na gbe, ọre emwi nọ ghi ru ekpataki sẹ vbe arrọọ mwẹ, rhunmwuda ẹre igho ne kherhe ẹgbẹe mwẹ loo ro, ne I mieke na do gha re okpe ọmwa. I keghi do bẹghe ẹre wẹẹ, ọ khẹke ne I fi werriẹ.

 Igho wa rre iwinna na, emwa gha họn wẹẹ I i ghi gbe tẹnisi, ọ gha wa kpa iran odin, iran i khian rẹn emwi nọ si ẹre ne I na zẹ owẹ vberriọ. Ẹkpotọ nọ kie mẹ ne I ya rẹn e Jehova kevbe ne I ya gha rrọọ vbe etẹbitẹ, ru ekpataki sẹ ive ke ive na gha sẹtin mu mẹ, rhunmwuda ọni, I ma zẹdẹ ghee iyeke hiehie. I na tama egbe mwẹ wẹẹ, I i khian zẹdẹ rhie ehọ ye ẹmwẹ ne emwa ta. Ako ọghe Baibol nọ ru iyobọ mẹ, ọre ebe Psalm 118:​6, ọ khare wẹẹ: “E Nọyaẹnmwa rrọọ yaba mwẹ, ohan i ghi mu mwẹ, de emwi ne ọmwaikọmwa gha miẹn ru mwẹ re?”

 Vbe uwu asẹ nii ẹre emwa eso ya rre, do tama mwẹ ne I do gha gbe tẹnisi ne iran, wẹẹ iran gha ha mwẹ osugi igho, nọ gha mu mwẹ la ukpo nibun. Vbọrhirhighayehẹ, I ta mu olọ yan rẹn nẹ wẹẹ, e Jehova ẹre I khian ga, rhunmwuda ọni, I ma miẹn ne iwinna yi. Iyeke ọni, I na ghi sẹ iwinna e tẹnisi na gbe rae. Ẹre I na ghi mu aro ye ebe ni ruẹ, ọ ghi rre July 2, 1994, I na dinmwiamẹ zẹvbe ọkpa vbe Osẹe Jehova.

 Nọ ne mẹ, emwi nọ wegbe ma he ka sunu daa mwẹ, nọ ghi ya mwẹ ye Osanobua rre. Amaiwẹ te I ghaa fie gualọ odẹ ẹmwata khian. I kegha roro ẹre wẹẹ, emwi hia wa maan mẹ, I i ghi gualọ emwi ọvbehe. Ọrheyerriọ, ọ na yevbe na miẹn wẹẹ, ọ kpẹẹ re ne ẹmwata na ke khẹ mwẹ, ne I do gualọ irẹn miẹn. I keghi do bẹghe ẹre wẹẹ, ẹ i re erriọ agbọn wa sẹ, eban agbọn ghi maan mwẹ sẹ vbene ọ ka gha ye! Te imẹ vbe ẹgbẹe mwẹ ghi wa sikẹ egbe sayọ. I wa vbe ghọghọ wẹẹ, ivbi mwẹ eha nikpia wa vbe lele ukpowẹ mwẹ, ẹ i re zẹvbe emwa ni ku iku isasegbe, sokpan zẹvbe Ivbiotu e Kristi.

 I wa ye gbe tẹnisi. Ehe ne a na gbe tẹnisi ẹre I na winna, vbe igiemwi, I maa emwa vbene a ya gbe tẹnisi hẹ, I vbe siẹnro iwinna tẹnisi na gbe. Sokpan I ma ghi mu iku isasegbe yan uhunmwu. Vbe ẹghẹ nẹdẹ, ẹghẹ hia ẹre I ya gha ruẹ vbene a ya gbe tẹnisi hẹ, ne mieke na guẹ sayọ, ne I do gha re nọ ghi gbe sẹ. Arọndẹ ọghe ẹghẹ hia ẹre I ghi khin nia, te I ghi vbe ru iyobọ ne emwa ne iran gha ya ilele ni rre Baibol ru emwi vbe arrọọ ọghe iran. Ena wa ya mwẹ sọyẹnmwẹ. Nọ ghi wa ya mwẹ ghọghọ sẹ, ọre ne I na re ọsio Osanobua ne Jehova, kevbe ne I na maa emwa ọvbehe wẹẹ, agbọn nọ maan sẹ ọna dee vbe odaro.​—1 Timoti 6:​19.