“Taem mi statem dei blong mi, mi onem miusik. Taem mi ron long trak, mi onem miusik. Taem mi spel, o mi klinim haos, o mi rid, mi onem miusik. Oltaem mi stap lesin long miusik.”—Carla.

 ?Yu tu yu laekem miusik olsem Carla? Sipos yes, atikol ya bambae i halpem yu blong kasem ol gudfala samting long miusik, mo blong no foldaon long ol trap, mo blong jusum gud miusik we yu lesin long hem.

•  Ol gudfala samting

•  Ol trap

•  Sam yangfala oli talem wanem

 Taem yu lesin long miusik, i lelebet olsem we yu kakae. Long saed blong tufala samting ya, sipos yu jusum gud mo yu no bitim mak, hemia bambae i mekem i gud long yu. Traem tingbaot:

•   Miusik i save mekem yu yu glad.

   “Sipos i gat wan dei we mi harem nogud, mi onem miusik we mi laekem, nao wantaem nomo mi harem gud.”—Mark.

•   Miusik i save mekem se yu tingbaot bifo.

   “Samtaem wan singsing bambae i mekem mi mi tingting bak long wan gudfala samting we i hapen, ale mi harem gud blong lesin long hem.”—Sheila.

•   Miusik i save mekem yumi joen gud.

   “Taem ol visita oli singim laswan singsing long wan intenasnal asembli blong ol Witnes blong Jehova, wota blong ae blong mi i ron. Mifala i toktok defdefren lanwis, be miusik i joenem mifala.”—Tammy.

•   Miusik i save halpem yu blong wokem ol gudfala fasin.

   “Taem yu lanem blong plei wan instramen, hemia i halpem yu blong stretem yu wan mo blong gat longfala tingting. Yu no save lanem kwik, be yu mas praktis plante blong plei gud.”—Anna.

 ?Yu yu save? Buk blong Ol Sam we i bigwan moa i bitim ol narafala buk long Baebol, i gat 150 singsing long hem.

 Sam miusik i nogud, i olsem kakae we i gat posen long hem. Tingbaot from wanem i olsem.

•   Plante singsing oli tokbaot seks.

   “I luk olsem se klosap olgeta singsing we oli popiula, oli tokbaot seks. Oli no moa traem haedem.”—Hannah.

   Baebol i talem se: “Yufala i no mas tokbaot nating enikaen doti fasin blong seks, mo enikaen doti samting, mo toktok blong yufala i no mas soemaot se yufala i griri.” (Efesas 5:3) Askem long yu wan se: ‘?Kaen miusik we mi lesin long hem i soemaot se mi folem advaes ya?’

•   Sam miusik i save mekem yu yu sad.

   “Samtaem mi stap let long naet blong lesin long miusik we i mekem mi mi tingbaot ol samting we i sad, mo tingting blong mi i fasfas. Miusik olsem i save mekem ol nogud samting oli kam long tingting blong mi.”—Tammy.

   Baebol i talem se: “Yu mas lukaot gud moa long hat blong yu i bitim eni narafala samting.” (Ol Proveb 4:23) Askem long yu wan se: ‘?Miusik we mi lesin long hem i mekem mi mi tingbaot ol nogud samting?’

•   Sam miusik i save mekem yu yu kros.

   “Miusik we i soemaot se man i kros, i no laekem hem wan, o i agensem narafala, i wan denja long mi. Afta we mi lesin long kaen miusik ya, mi luk se fasin blong mi i jenis. Famle blong mi tu i luksave samting ya.”—John.

   Baebol i talem se: “Yufala i mas tekemaot olgeta samting ya oli gowe long yufala: Kros, boel long kros, ol rabis fasin, ol rabis tok, mo ol tok we oli doti oli no mas kamaot long maot blong yufala.” (Kolosi 3:8) Askem long yu wan se: ‘?Miusik we mi lesin long hem i mekem mi mi kros, o mi no kea long filing blong narafala?’

 ?Bigfala poen hem i wanem? Yu mas jusum gud miusik we yu lesin long hem. Wan tineja we nem blong hem Julie, i traehad blong mekem olsem. Hem i talem se: “Mi stap jekem miusik blong mi oltaem mo dilitim eni samting we mi luk se i no stret. I no isi, be mi save se i stret blong mekem olsem.”

 Wan gel we nem blong hem Tara, i stap lanem blong mekem sem mak. Hem i talem se: “Samtaem wan singsing we i gat gudfala bit i kamaot long radio, be taem mi harem ol tok blong hem, mi luksave se mi mas jenisim radio stesen. !I had blong mekem samting ya! !I olsem we mi mas sakemaot wan naesfala kek we mi testem finis! Be sipos mi strong inaf blong sakemaot wan singsing long saed blong seks, ating bambae mi strong inaf blong no mekem enikaen fasin blong seks bifo long mared. Mi no wantem ting nating long paoa we miusik i save gat long mi.”