Tu taem long wan wik, ol Witnes blong Jehova oli gat ol miting blong olgeta long ples blong wosip blong olgeta, we nem blong hem Haos Kingdom. ?Wanem i hapen long ples ya? Mo sipos yu go, ?wanem gudfala samting we yu save kasem?

•  ?Wanem i hapen long Haos Kingdom?

•  ?From wanem i gud blong go?

•  Samting we ol narafala yangfala oli talem

 Haos Kingdom hem i stamba ples blong lanem ol gudfala advaes blong Baebol. Ol miting we oli holem long ples ya i save halpem yu blong:

•   yu lanem trutok long saed blong God.

•   yu kasemsave long ol mining blong ol samting we oli stap hapen tede.

•   yu gat ol gudfala fasin.

•    yu faenem ol gudfala fren.

 ?Yu yu save? Oli singaot ples blong miting blong ol Witnes blong Jehova se Haos Kingdom, from we plante taem oli tokbaot Kingdom blong God long ples ya.—Matiu 6:9, 10; 24:14; Luk 4:43.

 Save we oli tokbaot long ples ya bambae i halpem yu. Ol advaes blong Baebol we oli tokbaot long ol miting blong ol Witnes blong Jehova bambae oli halpem yu blong yu ‘kasemsave ol waestok.’ (Ol Proveb 4:5) Hemia i min se Baebol i save halpem yu blong mekem ol gudfala desisen long laef blong yu. Mo tu, i save halpem yu blong ansa long ol bigfala kwestin long laef, olsem:

•   ?Wanem mining blong laef?

•   ?God nao i stamba blong ol trabol we yumi kasem?

•   ?Wanem bambae i hapen long yumi taem yumi ded?

 Long ol miting blong mifala long wiken, i gat ol tok we ol brata oli stap givim. Hemia taetel blong sam long olgeta:

•   ?From Wanem Yu Nidim Baebol Blong i Lidim Yu?

•   ?Long Taem Blong Trabol, Weples Yu Save Kasem Help?

•   Samting We Kingdom Blong God i Stap Mekem Long Yumi Naoia.

 “Wan boe long skul i kam long wan long ol miting. Hem i sidaon wetem famle blong mi, mo mifala i serem buk blong mifala wetem hem. Biaen, hem i talem long mi se hem i glad tumas long ansa we ol man oli givim long ol haf blong miting ya we ol man oli save ansa. Mo tu, hem i talem se long jos blong hem i no gat ol buk blong stadi long hem olsem we yumi gat.”—Brenda

 ?Yu yu save? Man i no pem blong kam sidaon long ol jea long Haos Kingdom. Mo oli neva mekem kleksin.

 Fasin blong olgeta blong joen gud, bambae i leftemap tingting blong yu. Wan risen we Baebol i talem se ol Kristin oli mas kam wanples i blong talem ol gudfala ‘toktok blong leftemap tingting blong olgeta.’ (Hibrus 10:24, 25) Plante man long wol ya oli tingbaot olgeta nomo, taswe taem yumi stap wetem ol man we oli tingbaot God mo oli kea long ol narafala man, gudfala kampani olsem i mekem yumi harem gud tumas.

 “Afta long wan longfala dei, mi harem nogud mo mi taed, be taem mi go long Haos Kingdom, oltaem, olgeta we oli stap oli mekem mi mi harem gud bakegen. Afta long miting, taem mi stap gobak long haos, mi glad mo mi rere blong fesem wan narafala dei bakegen.”—Elisa

 ?Yu yu save? I gat bitim 120,000 kongregesen blong ol Witnes blong Jehova long fulwol, we oli stap mit wanples long bitim 60,000 defren ples. Evri yia, i gat klosap 1,500 Haos Kingdom we oli bildim. Hemia from we namba blong ol man we i stap kam long miting i stap go antap. a