Steven i talem se: “Taem mi mo gelfren blong mi i no moa fren, tingting blong mi i foldaon olgeta. Mi harem nogud moa i bitim ol narafala taem long laef blong mi.”

 ?Olsem wanem? ?Yu tu yu pastru long wan taem olsem? Sipos yes, ol save we i kam biaen i save givhan long yu.

•  ?Yu harem olsem wanem?

•  ?Yu save mekem wanem?

 Taem boe mo gel i no moa fren, tufala tugeta i harem nogud tumas.

•  Sipos yu nao yu stopem fasin fren ya, maet yu kasem save long filing blong Jasmine, we i talem se: “Taem mi mekem narafala we mi kea long hem i harem nogud, hemia i olsem wan bigfala hevi samting long tingting blong mi, we mi neva wantem bakegen.”

•  Sipos i no yu we i stopem fasin fren ya, ating yu kasem save from wanem samfala oli talem se oli harem nogud tumas, sem mak olsem we wan man we oli lavem hem i ded. Wan yangfala woman we nem blong hem Janet, i talem se: “Filing blong mi i sem mak olsem we mi krae from wan man we i ded. Mi no wantem bilivim, mi kros, mi wantem jenisim tingting blong boe ya, tingting blong mi i foldaon olgeta, mo i tekem wan ful yia blong mi kasem save fulwan se i finis ya nao.”

 Stamba poen: Taem yu no moa frenem wan boe o gel, tingting blong yu i save foldaon mo yu harem nogud tumas. Wan man blong raetem Baebol i talem se: “Tingting we i foldaon, i mekem se man i no moa gat paoa.”—Ol Proveb 17:22.

•  Toktok wetem wan man we yu trastem. Baebol i talem se: “Wan tru fren i soemaot lav oltaem, mo hem i wan brata we i kamtru long yu long taem blong trabol.” (Ol Proveb 17:17) Sipos yu talemaot filing blong yu long papa o mama o wan fren we i bigman long tingting blong hem, hemia i save halpem yu blong gat stret tingting bakegen.

   “Mi stap mi wan blong plante manis, mi no wantem tokbaot filing blong mi long eni man. Be ol fren oli save givhan long yumi blong kam gud bakegen. Taem mi talemaot filing blong mi long olgeta, mi stat blong harem gud bakegen.”—Janet.

•  Lanem samting from. Wan narafala proveb long Baebol i talem se: “Yu mas kasem waes mo yu mas kasemsave samting.” (Ol Proveb 4:5) Taem yu pastru long wan nogud samting olsem, yu lanem plante samting long saed blong yu wan, mo samting we yu save mekem blong winim tingting we i foldaon.

   “Taem mitufala i mekem desisen blong no moa fren, wan fren i askem long mi se: ‘?Yu lanem wanem taem yu stap frenem gel ya, mo olsem wanem samting ya we yu lanem i save givhan long yu taem yu frenem wan narafala gel long fiuja?’”—Steven.

•  Prea. Baebol i talem se: “Yu sakem ol hevi baden blong yu long Jehova, mo hem bambae i sapotem yu.” (Ol Sam 55:22) Prea i save givhan long yu blong winim ol nogud filing mo blong gat wan tingting we i moagud long samting we i hapen long yutufala.

   “Prea oltaem long Jehova. Hem i kasem save long ol nogud filing blong yu, mo hem i save gud bitim yu, ol samting we i mekem yu harem nogud.”—Marcia.

•  Givhan long ol narafala. Baebol i talem se: “Yufala i no mas tingbaot yufala nomo, be yufala i mas tingbaot ol narafala man tu.” (Filipae 2:4) Sipos yu spenem plante taem blong halpem ol narafala, bambae yu kwik moa blong gat stret tingting long saed blong samting we i hapen long laef blong yu.

   “Taem boe mo gel i no moa fren, tufala i harem olsem se hemia en blong wol, tufala i harem moa nogud i bitim we tufala i karekil long bodi. Be mi faenemaot se bambae mi save kamgud. Mi mas letem taem i pas blong bambae mi save harem gud bakegen.”—Evelyn.