“Taem we mi stap gruap, samting we i strong moa long mi hemia filing ya se mi laekem ol narafala boe. Fastaem mi ting se filing ya bambae i finis, be hem i stap yet.”—Deved we i gat 23 yia.

 Deved i wan Kristin we i wantem mekem God i glad. Nating se hem i gat filing ya, ?hem i save mekem God i glad? ?Wanem tingting blong God long fasin ya blong homoseksuol?

•  ?Baebol i talem wanem?

•  ?Hemia i min se . . . ?

•  ?Olsem wanem sipos . . . ?

 I gat plante defdefren tingting long saed blong fasin blong homoseksuol, i dipen long kalja mo jeneresen we yumi stap long hem. Be ol Kristin oli no folem wan tingting from we plante man oli stap folem, mo oli no “olsem wan bot we solwota mo win i stap saksakem hem i go olbaot.” (Efesas 4:14) Be tingting blong olgeta long saed blong fasin blong homoseksuol (mo ol narafala fasin tu), i stanap long Baebol nomo.

 Rul blong Baebol i klia long saed blong fasin blong homoseksuol, hem i talem se:

•  “Yufala i no mas slip wetem wan man olsem we yufala i slip wetem wan woman.”—Levitikas 18:22.

•  “From we oli wantem gohed blong mekem samting we hat blong olgeta i wantem, God i lego olgeta finis, . . . i letem olgeta oli mekem ol rabis fasin blong seks we oli wantem tumas. Ol woman blong olgeta oli tanem stret fasin blong man wetem woman, nao oli stap mekem i krangke long olgeta bakegen.”—Rom 1:24, 26.

•  “Yufala i no mastik long samting ya. Olgeta we oli stap mekem enikaen doti fasin blong seks, mo olgeta we oli wosipim aedol, mo olgeta we oli mekem adaltri, mo ol man we oli glad nomo blong ol man bakegen oli mekem seks long olgeta, mo ol man we oli stap mekem seks wetem man bakegen, mo ol stilman, mo ol man we oli griri, mo ol man blong drong, mo ol man we oli stap tok nogud blong spolem nem blong narafala man, mo ol man we oli trikim narafala blong stilim olting blong hem, bambae oli no kasem Kingdom blong God.”—1 Korin 6:9, 10.

 Blong talem stret, ol rul blong God oli stret long olgeta man, nating se oli man we oli wantem man, o man we oli wantem woman. Bigfala poen se, yumi evriwan i mas bos long ol filing blong yumi, blong yumi no mekem ol fasin we God i no glad long olgeta.—Kolosi 3:5.

 ?Baebol i pulum yumi blong no laekem nating ol man we oli homoseksuol?

 Nogat. Blong talem stret, Baebol i no pulum yumi blong agensem eni man, man we i mekem seks wetem man o man we i mekem seks wetem woman. Baebol i talem se yumi “mas traehad blong gat pis wetem olgeta man,” nomata wanem fasin blong laef oli folem. (Hibru 12:14) Taswe i rong blong yumi mekem enikaen fasin blong spolem, agensem, o mekem nogud long ol homoseksuol.

 ?Ol Kristin oli mas agensem ol loa we oli letem man i mared long man mo woman i mared long woman?

 Long Baebol, rul blong God long saed blong mared, hemia se wan man i mas mared long wan woman. (Matiu 19:4-6) Be ol loa blong man se man i save mared long man o woman i save mared long woman, hem i wan bisnes blong politik nomo. Mo Baebol i talem se ol Kristin oli no mas joen nating long politik. (Jon 18:36) Taswe oli no sapotem mo oli no agensem ol loa blong gavman se man i save mared long man o woman i save mared long woman.

 ?Be olsem wanem sipos wan man i homoseksuol? ?Hem i save jenis?

 Yes. !Long taem blong ol fas Kristin, sam man oli mekem olsem! Afta we Baebol i talem se ol man we oli homoseksuol bambae oli no go long Kingdom blong God, hem i talem se: “Bifo sam long yufala oli olsem nao.”—1 Korin 6:11.

 ?Hemia i min se olgeta we oli lego fasin ya blong homoseksuol, oli no moa gat wan filing nating we i pulum olgeta blong wantem mekem fasin ya? Si, oli save gat ol filing ya. Baebol i talem se: “Yufala i mas werem niufala fasin we God i givim long yumi . . . Taswe taem yufala i gat stret save long God, yufala i stap mekem fasin blong yufala i kam niuwan.” (Kolosi 3:10) I tekem taem blong jenisim fasin blong yumi.

 ?Be olsem wanem sipos wan man we i wantem folem ol rul blong God i gat filing ya yet blong wantem mekem seks wetem man?

 Long saed blong enikaen filing, wan man i save jus blong folem o no folem. ?Olsem wanem hem i save blokem ol nogud fasin? Baebol i talem se: “Yufala i mas gohed blong wokbaot folem tabu spirit, nao bambae yufala i no mekem nating ol nogud samting we yufala nomo i wantem.”—Galesia 5:16.

 Vas ya i no talem se man bambae i no wantem ol nogud samting. Be sipos hem i folem wan gudfala program blong stadi long Baebol mo prea, hem i save kasem paoa blong faet agensem ol nogud filing ya.

 Deved, we yumi tokbaot long stat, i luksave se samting ya i tru, speseli afta we hem i talemaot long Kristin papa mo mama blong hem se hem i stap fesem problem ya. Hem i talem se: “I olsem se mi tekemaot wan bigfala hevi samting we i stap long solda blong mi. Sipos mi bin talemaot samting ya longtaem finis long tufala, ating bambae mi harem gud moa long yangtaem blong mi.”

 Blong ademap evri samting, yumi hapi moa taem yumi folem ol rul blong Jehova. Man we i mekem olsem i bilif fulwan se ol rul ya oli “stret, oli mekem hat i glad,” mo “taem man i obei long olgeta, i gat wan bigfala pei i stap.”—Ol Sam 19:8, 11.