“Yu singaot long mi, mo mi bambae mi ansa long yu, mo bambae mi rere nomo blong talemaot long yu ol bigfala samting mo ol samting we i had blong kasem save, we yu no save olgeta nating.”—Jeremaea 33:3, Baebol Long Niu Wol Translesen.

 “Sipos yu singaot i kam long mi, bambae mi harem yu, mo bambae mi talemaot ol gudgudfala samting long yu, we ol man oli no save faenemaot, mo we yu yu no save olgeta nating.”—Jeremaea 33:3, Baebol Long Bislama.

 God i talem ol tok ya blong invaetem ol man blong oli singaot long hem long prea. Olgeta we oli akseptem invetesen ya, God bambae i soemaot long olgeta wanem bambae i hapen long fiuja.

 “Yu singaot long mi, mo mi bambae mi ansa long yu.” Taem God i talem se “yu singaot long mi,” hem i no minim nomo se yumi mas talemaot nem blong hem long bigfala voes. Be hem i wantem se yumi prea blong askem long hem blong i halpem mo lidim yumi.—Ol Sam 4:1; Jeremaea 29:12.

 I luk olsem se invetesen ya i go long nesen blong Isrel bifo. Nesen ya i bin tanem baksaed long God, mo ol ami blong Babilon oli stap atakem hem. (Jeremaea 32:1, 2) Jehova a i invaetem ol man Isrel blong oli kambak long hem, mo blong oli singaot long hem long prea.

 “Bambae mi . . . talemaot long yu ol bigfala samting mo ol samting we i had blong kasem save, we yu no save olgeta.” Ol samting we God i promes blong soemaot oli “had blong kasem save,” from we man nomo i no naf blong faenemaot olgeta. Narafala rod blong tanem ol tok ya “ol samting we i had blong kasem save,” hemia se “ol samting we i haed.”

 ?Wanem “ol samting we i haed” we God bambae i soemaot? Hemia ol samting we bambae oli hapen long fiuja, olsem ol ami bambae oli spolem gud olfala taon blong Jerusalem mo bambae i stap olsem, go kasem taem we ol man bambae oli wokem gud taon ya bakegen. (Jeremaea 30:1-3; 33:4, 7, 8) Mo God i promes tu se ol man long nesen ya we oli wosipim hem, bambae oli no lus.—Jeremaea 32:36-38.

 Profet Jeremaea i kasem mesej ya long Jehova long yia 608 B.K.T., hemia namba ten yia blong rul blong King Jedekia. Jeremaea i talemaot finis se bambae ol ami oli spolem Jerusalem mo tekem Jedekia i go kalabus. Be king i no glad long ol tok ya, ale hem i givim oda blong oli putum Jeremaea long kalabus.—Jeremaea 32:1-5; 33:1; 37:21.

 Ol samting ya i stap hapen taem God i invaetem ol man Isrel blong oli prea long hem, olsem yumi luk long Jeremaea 33:3. Sore tumas, King Jedekia mo bighaf blong nesen ya oli no wantem harem ol gudfala tok ya we God i talem. (Jeremaea 7:26; 25:4) Oli no prea long God blong i lidim olgeta. Wan yia biaen, ol ami oli winim King Jedekia, oli spolem Jerusalem, oli holemtaet bighaf blong ol man we oli no ded long faet ya, mo oli tekem olgeta oli gobak long Babilon.—Jeremaea 39:1-7.

 Tede, ol tok blong Jeremaea 33:3 i pulum yumi blong tingbaot se God i save givim ‘stret save long samting we hem i wantem,’ mo soemaot ol samting “we man i no save faenemaot,” long olgeta we oli prea long hem mo stadi long Tok blong hem Baebol. (Kolosi 1:9; 1 Korin 2:10) Ol samting we man i no save faenemaot, i minim tu ol promes blong God long saed blong samting we bambae hem i mekem i no longtaem.—Revelesen 21:3, 4.

 Wajem sot video ya blong luk wanem samting we buk blong Jeremaea i tokbaot.