“Ol brata, hemia las tok blong mi. Yufala i mas gohed blong tingting long olgeta samting we oli tru, olgeta samting we oli impoten, olgeta samting we oli stret, olgeta samting we oli klin, olgeta samting we i mekem man i gat lav, olgeta samting we i stret blong yumi leftemap, olgeta samting we oli gud, mo olgeta samting we God bambae i glad long olgeta.”—Filipae 4:8, Baebol Long Niu Wol Translesen.

 “Ol brata mo sista, las tok blong mi hemia: ol samting we oli tru, ol samting we yu tinghae long olgeta, ol samting we oli stret, ol samting we oli klin, ol samting we oli naes, ol samting we yu respektem, ol samting we i nambawan o i stret blong presem—tingbaot ol samting ya.”—Filipae 4:8, New International Version.

 God i intres long ol samting we yumi tingbaot, speseli from we ol tingting blong yumi oli gat paoa long ol aksen blong yumi. (Ol Sam 19:14; Mak 7:20-23) Taswe olgeta we oli wantem mekem God i glad, oli sakemaot ol tingting we hem i no laekem, mo oli tingbaot ol samting we hem i glad long olgeta.

 Vas ya i tokbaot eit gudfala samting we ol Kristin oli mas “gohed blong tingting long olgeta,” i min se oli mas tingbaot oltaem.

•   “Tru.” Tok ya i minim ol samting we i gud mo yumi save trastem, olsem Tok blong God, Baebol.—1 Timoti 6:20.

•   “Impoten.” Hemia i no ol smosmol samting, be ol samting we oli impoten tumas, mo oli halpem ol Kristin blong oli gat strong tingting blong mekem i stret.—Taetas 2:6-8.

•   “Stret.” Hemia i minim ol plan mo aksen we oli stret long ae blong God, be i no ol samting we i folem waes blong man.—Ol Proveb 3:5, 6; 14:12.

•   “Klin.” Tok ya i min se tingting blong yumi, mo tingting we i pusum yumi, i klin mo i tabu long evri samting, be i no long saed blong seks nomo.—2 Korin 11:3.

•   “I gat lav.” Tok ya i minim ol gudfala samting we i mekem se man i lavem narafala, be i no ol samting we i givim filing blong kros, rao, o agensem narafala.—1 Pita 4:8.

•   “I stret blong yumi leftemap.” Tok ya i minim ol samting we oli halpem ol man blong gat gudfala tingting long narafala, mo ol man blong ona long God oli agri long olgeta.—Ol Proveb 22:1.

•   “Gud.” Tok ya i minim ol gudfala fasin we God i laekem. I no gat wan samting we i nogud long olgeta.—2 Pita 1:5, 9.

•   “Glad long olgeta.” Tok ya i minim ol samting we yumi presem narafala from, speseli samting we God i glad long hem. Mo i minim tu ol wok blong God we ol man oli mas tingting gud long olgeta mo presem hem from.—Ol Sam 78:4.

 Taem aposol Pol i raetem leta long ol Kristin long Filipae, hem i stap kalabus long haos blong hem long Rom mo ol soldia oli gad long hem. Nating se i olsem, ol man blong stadi dip long Baebol, oli tokbaot leta blong hem olsem wan “leta blong glad.” Hemia from we i wan hapi leta, mo i gat plante toktok long hem blong soemaot lav mo kea.—Filipae 1:3, 4, 7, 8, 18; 3:1; 4:1, 4, 10.

 Pol i lavem ol Kristin brata mo sista blong hem long Filipae, mo hem i wantem se oli gat sem glad mo pis we hem i gat. (Filipae 2:17, 18) Taswe long las haf blong leta, hem i pulum olgeta blong oli stap glad, no mekem i strong tumas long narafala, prea oltaem long God blong dipen long hem, mo putum tingting blong olgeta long ol samting we bambae i givim pis long olgeta mo pis wetem God.—Filipae 4:4-9.

 Wajem sot video ya blong luk wanem samting we buk blong Filipae i tokbaot.