?Man We i Smok, i Mekem Sin?

PLEI

Ansa we Baebol i givim

Baebol i no tokbaot fasin blong smok a mo ol narafala rod blong yusum tabak. Be hem i givim ol rul we oli soem se God i no glad long ol fasin we i spolem helt mo mekem man i doti, long rod ya, hem i soemaot se fasin blong smok i wan sin.

Respektem laef. “God . . . i givim laef long olgeta man, mo i givim win we oli pulum.” (Ol Wok 17:24, 25) Laef i wan presen we God i givim, taswe yumi no mas mekem eni samting, olsem smok, blong mekem laef blong yumi i kam sot. Smok i wan long ol stamba samting we i stap mekem ol man oli ded long fulwol, nating se i gat rod blong stopem blong man i no ded from smok tabak.
Lavem ol neba. “Yu mas lavem ol man raonabaot long yu olsem we yu stap mekem long yu wan.” (Matiu 22:39) Man we i smok taem i gat narafala man raon long hem, hem i no soemaot lav. Man we oltaem i stap pulum smok ya we narafala i mekem, hemia sekenhan smok, i isi nomo blong hem i kasem sam long ol sik we man we i stap smok i kasem.
Yu mas stap tabu. “Yufala i givim bodi blong yufala i go long God olsem wan sakrefaes we i laef mo i tabu, mo we God i glad long hem.” (Rom 12:1) “Taswe yumi mas wasemaot ol samting we oli mekem bodi mo tingting blong yumi i kam doti, blong yumi save kam klin, nao yumi kam tabu moa taem yumi stap ona long God.” (2 Korin 7:1) Fasin ya blong smok i nogud long bodi mo i no mekem man i tabu, yes i no mekem man i klin mo tabu, from we man we i yusum tabak, hem i minim blong kakae wan posen we i spolem gud bodi blong hem.

?Baebol i talem eni samting long fasin blong yusum mariuana o ol narafala drag bakegen blong stap haremgud long hem?

Baebol i no tokbaot mariuana (nara nem blong hem wid o pot) mo ol narafala drag. Be hem i gat ol rul we oli soemaot klia se fasin blong yusum ol drag olsem blong stap haremgud long hem, hem i no stret. Antap long ol advaes we yumi tokbaot finis, hemia sam moa advaes:

Yumi mas yusumgud tingting blong yumi. “Yu mas lavem God blong yu Jehova . . . long olgeta tingting blong yu.” (Matiu 22:37, 38) “Tingting blong yufala i mas klia gud oltaem.” (1 Pita 1:13) Man i no save yusumgud tingting blong hem taem hem i tekem drag, mo plante man we oli tekem drag, oli no moa save stop. Oli tingbaot oltaem blong kasem drag mo blong yusum, i bitim we oli yusum tingting blong olgeta blong tingbaot ol gudfala samting.—Filipae 4:8.
Obei long ol loa blong gavman. “Obei long ol gavman mo ol haeman.” (Taetas 3:1) Long plante kantri, gavman i putum ol loa we i kontrolem fasin blong yusum sam drag. Sipos yumi wantem mekem God i glad, yumi mas obei long ol haeman.—Rom 13:1.

Tabak Mo Helt Blong Yu

Wol Helt Ogenaesesen i talem se evri yia, samwe 6 milian man oli ded from ol sik we oli kamaot from smok tabak. Be bitim 600,000 man insaed long namba ya oli no stap smok, be oli kasem ol sik ya from sekenhan smok. Traem luk samting we tabak i save mekem long helt blong man we i stap yusum mo helt blong ol man we oli stap raonabaot long hem.

Kansa. Smok blong tabak i gat bitim 50 kasinojinik kemikol (carcinogenic chemicals). Buk ya Encyclopædia Britannica i tokbaot smok blong tabak se “ol man we oli kasem lang kansa, 90 pesen long olgeta oli kasem from smok blong tabak.” Smok blong tabak i save mekem man i kasem kansa long ol narafala haf blong bodi, olsem maot, win paep, paep blong kakae, trot, ples we voes i kamaot, leva, konkon leva [pancreas], mo basket blong pispis.

Sik blong pulum win. Smok blong tabak i save statem ol kaen sik we i mekem se man i no save pulum gud win, olsem sik long lang (pneumonia) mo flu. Ol pikinini we oltaem oli stap pulum smok blong tabak we narafala i smokem, oli save kasem sotwin, rabis kof, mo i mekem lang blong olgeta i no gru gud mo i no wok gud.

Sik blong hat. Ol man we oli smok oli save kasem strok o kasem sik long hat. Posen gas ya Carbon monoxide i stap insaed long smok blong tabak. I isi blong i aot long lang i go long blad, nao i tekemaot oxygen. Nao taem i no gat i naf oxygen long blad, hat i mas traehad bigwan blong givim oxygen i go long bodi.

Tabak mo woman we i gat bel. Woman we i smok taem i gat bel, i save mekem se bebi blong hem i bon bifo stret taem blong hem, kilo blong bebi i smol, o bebi i bon be i gat sam problem long bodi, olsem lips blong hem i brok. Mo tu, ol bebi olsem oli save gat problem blong pulum gud win o oli save ded kwiktaem olsem nomo.

a Fasin blong smok we haf ya i tokbaot i minim smok blong tabak we man i pulum long ol sigaret, ol siga, ol paep, no ol wota paep. Be ol rul long haf ya, oli stret tu long fasin blong kakae tabak, pulum paoda blong drag long nus, ol elektrik sigaret we i gat nikotin, mo ol narafala prodak olsem.