Rijman mo Lasaros tufala i no man we i laef samtaem, be tufala i stap long wan stori we Jisas i talem. (Luk 16:19-31) Tufala i minim tu grup blong man: (1) ol flas lida blong skul blong ol man Jiu long taem blong Jisas, mo (2) ol man nating we hat blong olgeta i stret mo oli lesin long Jisas.

Long atikol ya

•  ?Wanem stori blong Jisas long saed blong rijman mo Lasaros?

•  ?Ol samting long stori ya oli rili hapen?

•  ?Stori ya i soemaot se tijing blong helfaea i tru?

•  ?Wanem mining blong stori blong rijman mo Lasaros?

 Long Luk japta 16, Jisas i tokbaot tu man we laef blong tufala i jenis bigwan.

 Stori blong Jisas i olsem: Wan rijman i stap werem ol flas klos mo i harem gud long ol sas samting blong hem. Wan puaman, nem blong hem Lasaros, i stap sidaon long get blong rijman, i stap asaskem kakae. Hem i hop se bambae oli givim ol haf kakae long hem we i foldaon long tebol blong rijman. Taem i pas, nao Lasaros i ded, mo ol enjel oli karem hem i go klosap long Ebraham. Rijman tu i ded mo oli berem hem. Long stori ya, tufala man ya i save samting afta we tufala i ded. Rijman we i ded i harem nogud long wan bigfala faea. Hem i askem long Ebraham blong i sanem Lasaros i go pusum fingga blong hem long wota, mo i kam putum long tang blong hem blong mekem i kolkol. Ebraham i no mekem olsem rijman i askem. Hem i talem se laef blong tufala i jenis bigwan, mo se i gat wan bigfala hol i stap seraotem rijman long tufala, we i no gat man i save krosem.

 Nogat. Hemia wan parabol we Jisas i talem blong tijim wan lesen. Plante man blong stadi dip, oli agri se i wan parabol. Eksampol: Wan smol stamba tok long Baebol blong Luther long 1912, i talem se hemia wan parabol. Mo tu, long Katolik Jerusalem Bible, wan futnot i talem se “hemia wan parabol we i olsem wan stori mo tufala man long hem i no bin laef samtaem.”

 ?Olsem wanem? ?Jisas i stap tijim ol man se bambae oli laef afta we oli ded? ?Hem i stap talem se samfala bambae oli safa long helfaea afta long ded, mo se Ebraham mo Lasaros i stap long heven? I gat sam samting we oli soemaot klia se i no olsem.

 Traem tingbaot:

•   Sipos rijman i stap long wan faea, ?yu no ting se faea ya bambae i kakae smol wota long en blong fingga blong Lasaros?

•   Nating se wota i no lus, ?be yu ting se wan drop wota i naf blong mekem rijman we i stap bon long faea, i harem gud?

•   ?Olsem wanem Ebraham i save stap long heven? Jisas i talem klia se kam kasem taem ya we hem i talem parabol ya, i no gat wan man i go long heven.—Jon 3:13.

 Nogat. Nating se ol man long stori ya oli no bin laef samtaem, be samfala oli talem yet se hem i wan pijatok we i soemaot se ol gudfala man oli go long heven be ol man nogud oli safa long helfaea. a

 ?Tingting ya i stret? Nogat.

 Tijing blong helfaea i no laenap wetem samting we Baebol i talem long saed blong ol dedman. Baebol i no talem se ol gudfala man oli harem gud long heven afta we oli ded, mo ol man nogud oli safa long helfaea. Be Baebol i talem klia se: “Ol man we oli laef yet oli save se bambae oli ded, be ol dedman oli no moa save wan samting nating.”—Prija 9:5.

 Stori ya i soemaot se i gat tu grup blong man we laef blong tufala i jenis bigwan.

 Rijman i pija blong ol lida blong skul blong ol man Jiu, we “oli laekem mane tumas.” (Luk 16:14) Oli lesin long Jisas, be oli agensem ol samting we hem i talem. Ol lida ya oli ting rabis long ol narafala man.—Jon 7:49.

 Lasaros i pija blong ol man nating we oli bilif long ol tok blong Jisas, mo ol lida blong skul oli ting rabis long olgeta.

 Ol samting long laef blong tufala grup ya i jenis bigwan.

•   Ol lida blong skul oli ting se God i glad long olgeta. Be taem oli no bilif long Jisas, God i sakemaot olgeta mo wosip blong olgeta, taswe i olsem we oli ded long ae blong God. Mo tu, ol tok we Jisas mo ol man blong hem oli talemaot, i mekem ol lida ya oli harem nogud tumas.—Matiu 23:29, 30; Wok 5:29-33.

•   Ol man nating we ol lida blong skul oli no givhan long olgeta, oli harem gud taem oli bilif long tok blong Jisas we i givhan long olgeta. Naoia oli gat janis blong kasem blesing blong God blong olwe.—Jon 17:3.