Baebol i givim ol gudfala advaes long yumi blong mekem ol desisen. Hem i save halpem yumi blong yumi kam “waes” mo yumi naf blong “kasemsave samting.” (Ol Proveb 4:5) Samtaem, Baebol i talem stret beswan desisen blong mekem. Be samtaem, hem i givim advaes we i save lidim yumi blong mekem wan waes desisen.

Long atikol ya bambae yumi tokbaot

•  Ol rod we i save halpem yu blong mekem wan gudfala desisen

•  ?Mi save jenisim wan desisen we mi mekem finis?

•  ?Olsem wanem sipos mi mekem wan nogud desisen we mi no save jenisim?

•   Yu no mas kwik blong mekem wan desisen. Baebol i talem se: “Man we i tingting gud, hem i skelem gud wanwan step blong hem.” (Ol Proveb 14:15) Sipos yu kwik blong mekem wan desisen, maet yu save mestem sam impoten infomesen. Taswe, i gud yu tekem taem blong tingting gud long desisen blong yu.—1 Tesalonaeka 5:21.

•   Yu no mas mekem ol desisen folem tingting o filing blong yu nomo. Baebol i wonem yumi se yumi no save trastem hat blong yumi oltaem. (Ol Proveb 28:26; Jeremaea 17:9) Eksampol, maet yumi no save mekem wan gudfala desisen taem yumi kros, wari, harem nogud, no gat longfala tingting, o yumi taet tumas.—Ol Proveb 24:10; 29:22.

•   Prea from waes. (Jemes 1:5) God i glad blong ansa long ol prea olsem. Hem i wan Papa we i kea mo i no wantem se ol pikinini blong hem oli kasem ol bigfala trabol. “Jehova nomo i save givim waes. Save mo fasin blong luksave, tufala i stap kamaot long maot blong hem nomo.” a (Ol Proveb 2:6) Beswan rod blong hem i givim waes long yumi, hemia tru long Tok blong hem Baebol.—2 Timoti 3:16, 17.

•   Mekem risej. Blong mekem wan gudfala desisen, yu nidim ol infomesen we yu save trastem. Olsem we Baebol i talem, “man we i waes, hem i lesin gud mo i kasem moa tijing.” (Ol Proveb 1:5) ?Weples yu save faenem ol infomesen we oli tru mo yu save trastem?

   Fastaem, luk samting we Baebol i talem long saed blong samting we yu stap tingbaot. From we Krieta blong yumi i save wanem we i gud long yumi, Tok blong hem Baebol i gat plante advaes we yumi save trastem. (Ol Sam 25:12) Long sam desisen, Baebol i givim ol loa we i talem klia samting we yumi mas mekem. (Aesea 48:17, 18) Long plante narafala samting, Baebol i no talem stret samting we yumi mas mekem. Be hem i givim ol stamba trutok we i save lidim yumi blong mekem wan gudfala desisen, nating se i defren long desisen blong narafala. Blong faenem ol stret save blong Baebol, mekem risej long ol atikol o buk, olsem olgeta ya we yu save faenem long websaet ya, b we oli fri nomo.

   Sam narafala desisen, maet yu nid blong jekem ol narafala infomesen we yu save trastem. Eksampol, sipos yu wantem pem wan samting we maet i sas, i moa waes blong mekem risej fastaem long prodak ya mo kampani we i wokem, mo faenemaot tu se sipos prodak ya i nogud o yu wantem go putumbak, bambae oli akseptem o nogat. Mo antap long hemia, yu mas meksua se prodak ya nao we yu nidim.

   Baebol i talem se: “Taem ol man oli no toktok gud tugeta fastaem, ol plan blong olgeta bambae i foldaon.” (Ol Proveb 15:22) So bifo we yu mekem wan desisen, i gud yu toktok long wan man we yu trastem hem. Eksampol, sipos yu mas mekem desisen long saed blong helt, i moa waes blong toktok long wan dokta. (Matiu 9:12) Long sam situesen, yu save toktok long ol man we oli bin fesem sem situesen olsem yu. Be tingbaot se yu nao bambae yu mekem desisen mo kasem frut blong desisen ya, i no ol man we yu askem advaes long olgeta.—Galesia 6:4, 5.

•   Skelem gud evri samting. Afta we yu kasem ol infomesen, maet yu save mekem wan lis blong ol samting we yu wantem mekem, inkludum gud saed mo nogud saed blong ol samting ya wanwan. Mo makem klia samting we i save kamaot from desisen blong yu. (Dutronome 32:29) Eksampol, ?olsem wanem desisen blong yu bambae i afektem yu, famle blong yu o ol narafala? (Ol Proveb 22:3; Rom 14:19) Sipos yu ansa long ol kwestin ya mo tingbaot ol rul blong Baebol, bambae yu mekem wan desisen we i waes mo i soemaot se yu gat lav.

•   Mekem desisen. Samtaem, maet yumi no mekem wan desisen from we yumi no save wanem blong mekem. Be sipos yumi slo blong mekem desisen maet yumi mestem wan janis o long en yumi stap long wan situesen we yumi no laekem nating. Narafala rod blong talem hemia se, sipos yu no mekem wan desisen hemia i sem mak olsem we yu mekem wan rabis desisen. Baebol i komperem situesen ya wetem fasin ya blong wokem garen, i se: “Sipos yu stap luk long win blong makem stret taem blong planem garen blong yu, neva bambae yu save planem, mo sipos yu stap luk long klaod blong makem stret taem blong tekemaot kakae blong hem, neva bambae yu save tekem kakae i kam.”—Prija 11:4, Baebol Long Bislama.

 Tingbaot tu se nomata we man i mekem beswan desisen, be maet i no stret gud olgeta. Taem yumi jusum blong mekem wan samting, yumi mas lego sam samting. (Prija 9:11) So yusum ol infomesen we yu gat, mo jusum ol samting we yu wantem mekem we yu ting se bambae i wok gud.

 Taem yu mekem wan desisen, hemia i no min se yu no moa save jenisim. Maet ol situesen long laef i jenis, o yu faenemaot se faswan desisen blong yu i gat nogud frut i kamaot from. Taswe, maet i waes blong lukluk bakegen long desisen blong yu mo jusum wan narafala rod we i save gat gudfala frut i kamaot from.

 Be sam desisen yumi no moa save jenisim. (Ol Sam 15:4) Eksampol, God i wantem se ol mared kapol oli holemtaet promes we oli mekem taem oli mared. c (Malakae 2:16; Matiu 19:6) Taem i gat ol problem long mared, tufala i mas traehad blong stretem, be i no blong ronwe long trabol.

 Sam samtaem, yumi evriwan i mekem sam desisen we i nogud o i no waes. (Jemes 3:2, futnot) Long taem olsem maet yumi rigret o gilti, be hemia i nomol. (Ol Sam 69:5) !Sipos yumi gat nogud filing olsem, hemia i gud, from i save stopem yumi blong no mekem sem mastik olsem bakegen! (Ol Proveb 14:9) Be Baebol i wonem yumi se yumi no mas gilti bitim mak, from hemia i save spolem tingting o filing blong yumi. (2 Korin 2:7) d Baebol i talem se: “Jehova i gat sore mo i kaen.” (Ol Sam 103:8-13) So traem lanem lesen long nogud desisen we yu no save jenisim, mo traem bes blong yu blong mekem se situesen ya i kam gud moa.