Nogat. Baebol i no talem se mane i nogud, o i tokbaot mane olsem stamba blong olgeta nogud fasin. Tok ya se “mane i stamba blong olgeta fasin nogud” i wan tok long Baebol we i no fulwan mo i mekem man i gat rong tingting long mane. Stret samting we Baebol i talem, hemia se “fasin blong laekem mane tumas, hem i stamba blong olgeta fasin nogud.”—1 Timoti 6:10, King James Version.

•  ?Baebol i talem wanem long saed blong mane?

•  ?From wanem Baebol i givim woning se yumi no mas laekem mane tumas?

•  ?Olsem wanem ol advaes blong Baebol long saed blong mane oli save givhan long yumi?

•  Ol vas blong Baebol we oli tokbaot mane

 Baebol i talem se, taem man i yusum mane long waes fasin, hemia i save givhan long hem mo i save “protektem” hem tu. (Prija 7:12, New World Translation) Mo tu, Baebol i talem ol gudfala toktok long ol man we oli glad blong givim mane long narafala olsem wan presen.—Ol Proveb 11:25.

 Be long semtaem, Baebol i givim woning se yumi no mas mekem mane i kam mein samting long laef blong yumi. Hem i talem se: “I nogud yufala i gat fasin ya blong laekem mane tumas. Sipos yufala i gat wanem samting, be yufala i mas harem gud long hem.” (Hibrus 13:5) Lesen we yumi lanem se, yumi mas yusum gud mane, mo no traem blong kam rijman. Be yumi mas glad long ol samting we yumi rili nidim, olsem kakae, klos mo haos.—1 Timoti 6:8.

 Ol man we oli wantem plante samting oli no save kasem laef we i no save finis. (Efesas 5:5) Wan risen hemia se, fasin blong wantem plante samting i olsem we man i wosipim aedol. (Kolosi 3:5) Wan narafala risen hemia se, taem man we i wantem plante samting i traehad blong kasem ol samting we hem i wantem, plante taem hem i no mekem ol gudfala fasin. Ol Proveb 28:20 i talem se, “man we i stap hareap tumas blong kam rijman, hem bambae i kasem panis from.” Maet oli mekem ol nogud fasin olsem fosem man blong i givim mane long olgeta olsem bambae oli no talemaot nogud samting we man ya i mekem, trikim o fosem narafala blong stilim mane blong hem, holemtaet wan man gogo hem o famle blong hem i givim bigfala mane, o kilim narafala i ded from mane.

 Nating sipos man we i laekem mane tumas i no mekem ol nogud fasin olsem, be ol narafala nogud samting oli save kamaot. Baebol i talem se, “olgeta we oli stap traehad blong kam rijman, oli foldaon long ol samting we i stap traem ol man. Mo oli foldaon long trap, mo long ol krangke samting we oli wantem tumas we i save spolem olgeta.”—1 Timoti 6:9.

 Sipos yumi wantem se ol narafala bambae oli respektem yumi mo God bambae i glad long yumi mo i sapotem yumi, yumi no mas letem mane i pulum yumi blong mekem ol fasin we i no stret mo samting we God i no glad long olgeta. God i promes long olgeta we oli traehad blong mekem hem i glad, i se: “Bambae mi mi neva lego yu, mo bambae mi neva livim yu yu stap yu wan.” (Hibrus 13:5, 6) Hem i talem tu se, “olgeta we oli holemstrong bambae oli kasem plante blesing.”—Ol Proveb 28:20, NW.