Yes, i gat plante pruf long Baebol we oli soemaot se i gat wan God i laef i stap. Ol pruf ya oli givhan blong mekem bilif blong yumi long God i strong, nao bae yumi no hariap blong bilif long enikaen samting we ol skul i tijim. Taswe, yumi mas “yusum gud” mo “openem tingting” blong yumi moa. (Rom 12:1; 1Jon 5:20, futnot) Tingbaot sam long ol pruf we Baebol i tokbaot:

•   Sipos i gat wan yunivas we i gat oda mo laef long hem, hemia i soemaot se i mas gat wan Man we i wokem olgeta samting ya. Baebol i talem se: “Yes i tru, evri haos i gat man we i wokem, be God i wokem olgeta samting we i stap.” (Hibrus 3:4) Nating se save ya i klia nomo, be plante man we oli skul gud oli ting se save ya i gat bigfala paoa. a

•   Yumi, ol man, yumi wantem tumas blong kasemsave mining blong laef mo se from wanem yumi laef. Hemia i wan filing we i stap long yumi, nating se yumi kasem ol samting we yumi nidim long laef. Taswe, Baebol i talem se yumi “nidim God long laef,” we i min se yumi wantem tumas blong kasemsave long God mo wosipim hem. (Matiu 5:3; Revelesen 4:11) Ol samting ya oli soemaot klia se i gat wan God i laef i stap. Mo tu, se hem i wan God we i lavem man tumas mo i wantem se yumi luksave se yumi nidim hem long laef.—Matiu 4:4.

•   Ol profet tok blong Baebol we oli raetem sam handred yia bifo, oli kamtru olsem we Baebol i talem. Ol samting we oli hapen mo biaen oli kamtru, oli soemaot se i gat wan man we i gat bigfala paoa mo i strong moa long ol man.—2Pita 1:21.

•   Ol man we oli raetem Baebol bifo, oli gat save olsem ol saentis, i bitim ol man we oli laef long taem ya. Eksampol, bifo ol man oli bilif se wol i stap antap long wan anamol olsem wan elefen, wan pig o wan buluk. Be Baebol i talem se God “i putum wol ya i hang long open ples nomo.” (Job 26:7) Mo tu, Baebol i se wol i raon gud olsem wan sekol. (Aesea 40:22, futnot, Douay Version) Taswe, plante man oli ting se ol save we ol man blong raetem Baebol oli kasem, i kam long God.

•   Baebol i ansa long plante kwestin we man i no kasemsave ansa blong olgeta. Taswe, sipos man i no moa faenem ansa blong ol impoten kwestin ya, sloslo bae hem i no moa bilif se God i laef i stap. Traem tingbaot: Sipos God i gat lav mo olgeta paoa, ?From wanem man i safa mo wol i fulap long rabis fasin? ?From wanem ol skul oli pulum tingting blong ol man blong mekem rabis fasin be i no ol gudfala fasin?—Taetas 1:16.