Long ‘buk blong laef,’ we Baebol i kolem tu se ‘skrol blong laef,’ o ‘buk blong rimemba,’ i gat nem blong ol man we bambae oli kasem presen ya, laef we i no save finis. (Revelesen 3:5; 20:12; Malakae 3:16) Taem wan man i obei gud long God, God i raetemdaon nem blong hem long buk ya.—Jon 3:16; 1 Jon 5:3.

 Stat long taem blong Ebel, God i rimembagud evri gudfala man blong hem, i olsem se hem i raetemdaon nem blong olgeta long wan buk. (Revelesen 17:8) I luk olsem se gudfala man ya Ebel i faswan man we nem blong hem i stap long buk blong laef. (Hibrus 11:4) Be buk ya i no jes wan lis blong ol nem nomo. Buk ya i soemaot long yumi se Jehova i wan God we i gat lav, mo hem i “save ol man blong hem.”—2 Timoti 2:19; 1 Jon 4:8.

?God i save tekemaot ol nem ya long ‘buk blong laef’?

 Yes. God i tokbaot ol man Isrel we oli no obei long hem, se: ‘Olgeta ya we oli mekem sin, bambae mi tekemaot nem blong olgeta long buk ya.’ (Eksodas 32:33) Be sipos yumi holemstrong long hem, nem blong yumi bambae i stap long “skrol blong laef.”—Revelesen 20:12.