Baebol, we hem i wan Tabu Buk, i fulap long plante waes advaes. Be, yu traem luk samting we Baebol i talem: “Olgeta tok blong Baebol oli kamaot long God fastaem.” (2 Timoti 3:16) I gat plante pruf we oli soemaot se tok ya blong Baebol i tru. Hemia sam long olgeta:

•   Oltaem samting we Baebol i tokbaot long saed blong histri, oli tru. I no gat man i save talem se tok blong hem i giaman.

•   Ol man we oli raetem Baebol oli no haedem ol samting mo oli raetem ol samting we oli tru. Hemia i mekem se ol tok blong olgeta i tru mo man i save trastem.

•   Stamba tingting we Baebol i tokbaot hemia se, Jehova God i gat olgeta raet blong rulum ol man, mo bambae hem i yusum Kingdom blong hem long heven blong mekem stamba tingting blong hem i kamtru.

•   Nating se man i raetem Baebol plante taosen yia bifo, be save we hem i givim long saed blong saens i stret gud long taem bifo mo tede tu.

•   Ol profet tok we oli stap long Baebol oli kamtru, mo ol samting we oli hapen long histri blong man oli pruvum se ol tok blong Baebol i tru.