Long 11 Novemba 1918, Wol Wo Wan i finis. Ol man oli glad tumas, ale oli no wok long dei ya mo oli danis long bigrod. Be oli glad blong smoltaem nomo. Wan narafala trabol i kamaot we i nogud moa i bitim faet ya.

Long Jun 1918, wan bigfala sik we nem blong hem flu blong Spen, i kasem ol soldia we oli stap faet long Franis. I no longtaem afta, sik ya kilim plante man i ded. Long sam manis nomo, namba blong ol soldia blong Amerika we oli ded from sik ya, i bitim namba blong ol soldia we oli ded long faet. Mo taem ol soldia oli gobak long ples blong olgeta afta long faet, oli karem sik ya i go wetem olgeta. Ale, kwiktaem nomo sik ya i kasem ol man long ol narafala ples.

Afta long bigfala faet, kakae i sot mo i gat problem blong mane. Long 1918, kakae i sot long plante kantri long Yurop. Long 1923, mane blong Jemani i lusum paoa. Sikis yia biaen, mane long fulwol i lusum paoa blong hem. Long 1939, Wol Wo Tu i stat. I olsem se Wol Wo Wan i stap gohed yet. ?Wanem stamba blong ol trabol ya?

Ol profet tok blong Baebol oli givhan long yumi blong yumi luksave from wanem ol faet oli stap kamaot. Jisas Kraes i talem se “ol kantri bambae oli mekem faet long ol narafala kantri,” mo olbaot long wol, ol man bambae oli gat hadtaem  blong kasem kakae, mo bambae ol strong sik oli kam spolem olgeta. (Matiu 24:3, 7; Luk 21:10, 11) Hem i talem se ol trabol ya, oli saen blong ol las dei. Buk blong Revelesen i soemaot se ol trabol ya oli joen wetem wan bigfala faet long heven.—Yu luk bokis ya  “Faet Long Heven Mo Faet Long Wol.”

Revelesen i tokbaot fo man we oli ron long hos. Tri long olgeta ya, oli pija blong ol trabol we Jisas i tokbaot finis, hemia faet, kakae i sot, mo ol sik. (Yu luk bokis ya  “?Ol Fo Hos Oli Stap Ron Finis?”) I klia se Wol Wo Wan i statem wan taem blong trabol we i stap gohed yet. Mo Baebol i soemaot se Setan nao i statem olgeta trabol ya. (1 Jon 5:19) ?Olsem wanem? ?Wan samting i save blokem Setan blong i no moa mekem trabol?

Revelesen i talem se Setan i “gat smol taem nomo blong hem i stap yet.” (Revelesen 12:12) Taswe hem i kros tumas, mo hem i statem plante bigbigfala trabol long wol. Mo ol trabol ya oli pruvum tu se smol taem ya i stap kam sot moa.

Wol Wo Wan i jenisim plante samting long laef blong ol man. Hem i mekem se ol man oli faet, oli agensem gavman, mo oli no moa trastem ol lida blong olgeta. Mo faet ya i soemaot klia se Jisas i sakemaot Setan finis long heven. (Revelesen 12:9) Setan i olsem wan rabis king we i kros tumas, from we hem i save se klosap nao bambae i no moa rul. Taem ya blong trabol bambae i finis taem Setan i no moa rul long wol.

Taem yu kasem save long ol profet tok blong Baebol, yu save trastem se i no longtaem, King Jisas Kraes bambae i “brekemdaon ol wok we Setan i mekem.” (1 Jon 3:8) Plante milian man tede oli prea blong Kingdom blong God i kam. ?Yu tu yu stap mekem olsem? Kingdom ya nao bambae i mekem ol samting we God i wantem, i kamtru long wol. (Matiu 6:9, 10) !Taem Kingdom ya i rul, bambae i no moa gat faet! (Ol Sam 46:9) I gud yu save moa long Kingdom ya, olsemia yu save laef long taem ya we pis bambae i stap long evri ples long wol.—Aesea 9:6, 7.