?Yu yu tingbaot yet dei we pikinini blong yu i bon? Ating yu yu glad tumas blong karem hem. Kalo mo Maena, tufala i glad tu. Be taem tufala i kasem nius se pikinini blong tufala i handikap, tufala i wari.

?Olsem wanem? ?Yu yu gat wan pikinini we i handikap? Sipos yes, maet plante taem yu wari se bambae yu no yu naf blong gohed blong lukaot long hem. Be yu no mas harem nogud tumas. Plante papa mo mama oli kasem trabol ya be oli gohed blong stanap strong. I gud yu tingbaot tri problem we yu save fesem, mo yu traem luk olsem wanem waes we i stap long Baebol i save givhan long yu.

Plante papa mo mama oli harem nogud bitim mak taem oli faenemaot se pikinini blong olgeta i handikap. Wan mama long Meksiko, nem blong hem Julia, i talem se: “Taem dokta i talem long mitufala se smol boe blong mitufala i handikap, mi mi no wantem bilivim. Mi harem se wan bigfala hevi samting i foldaon long hed blong mi.” Sam narafala oli olsem wan mama long Itali, nem blong hem Vanesa. Hem i talem se: “Nating se mi mi olfala, mi mi wantem tumas wan pikinini. Be naoia, taem mi luk boe blong mi we i handikap, mi harem se i fol blong mi nomo.”

Sipos yu harem nogud tumas no yu harem se trabol ya i fol blong yu, be yu yu sem mak nomo long olgeta man mo woman we oli gat wan pikinini we i handikap. Sik i no stap long plan blong God fastaem. (Jenesis 1:27, 28) God i mekem yumi blong yumi harem gud long laef. Taswe, taem yu kasem wan trabol olsem, i stret nomo we yu harem nogud. I olsem we yu lusum wan bigfala samting, hemia gudfala bodi blong pikinini blong yu. Be yu mas letem taem i pas. Sloslo, bambae yu winim ol tingting ya, mo bambae yu lan long trabol ya we yu fesem evri dei.

?Olsem wanem sipos yu harem se i fol blong yu we pikinini i handikap? Yu mas tingbaot samting ya: I no gat wan man we i kasem save gud long ol samting we oli save gat paoa long bodi blong pikinini, taem hem i stap long bel blong mama blong hem. I gat ol samting we papa mo mama tufala i pasem i go long pikinini, mo ol samting we oli gat paoa long mama taem hem i gat bel. Sam man oli blemen woman blong olgeta, mo sam woman oli blemem man blong olgeta. Be yu no mas mekem olsem. I moa gud yutufala i givgivhan long yutufala blong lukaot gud long pikinini ya.—Prija 4:9, 10.

 ADVAES: Yu mas traehad blong kasem save gud long sik blong pikinini blong yu. Baebol i talem se: “Prapa fandesen blong man i wokem haos blong hem long hem, waes mo save.”—Ol Proveb 24:3.

I gud yu askem plante kwestin long dokta, mo yu ridim ol buk we oli tokbaot sik ya. Taem yu stap mekem ol samting ya blong yu kasem save moa long sik ya, i olsem we yu stap lanem wan narafala lanwis. Fastaem, bambae i had, be sloslo bambae yu kasem save.

Kalo mo Maena we yumi tokbaot finis, tufala i toktok long dokta mo long ol man we oli wok blong wan grup we i givhan long ol handikap. Tufala i talem se: “Mitufala i kasem save long ol problem we oli kamaot from sik blong pikinini blong mitufala. Mo mitufala i kasem save tu long ol samting we hem i naf blong mekem. Ale mitufala i luksave se boe blong mitufala i save mekem plante samting we ol narafala pikinini tu oli save mekem. Hemia i mekem mitufala i harem gud.”

Ating yu harem se wok blong lukaot long pikinini we i handikap i tekemaot paoa blong yu. Wan mama long Niusilan we nem blong hem Jenny, i talem se: “Long ol yia jes afta we mi faenemaot se boe blong mi i handikap, mi mi taed tumas. Sipos mi traem mekem sam moa wok long haos antap long wok we mi stap mekem evri dei, mi kam taed bitim mak mo mi krae nomo.”

Narafala samting we i had, se yu harem se yu stap yu wan nomo. Boe blong Ben i handikap. Ben i talem se: “Ol man we pikinini blong olgeta i strong, oli no kasem save long laef blong ol papa mo mama we pikinini blong olgeta i handikap. Plante taem, mi wantem tumas blong talemaot evri samting long narafala. Be ol fren blong mi oli no gat pikinini we i handikap. Ale mi no tokbaot trabol blong mi long olgeta, from we mi harem se oli no kasem save.”

ADVAES: Yu no fraet blong askem long narafala blong i givhan long yu. Mo taem narafala i wantem givhan long yu, yu mas glad. Julia we yumi tokbaot finis, i talem se: “Samtaem mi mo man blong mi, mitufala i sem blong askem long narafala blong i givhan long mitufala.” Hem i gohed, i se: “Be naoia mitufala i luksave se mitufala i no naf. Ale, taem ol narafala oli givhan long mitufala, mitufala i no moa harem se mitufala i stap mitufala nomo.” Sipos wan fren no wan famle i talem se bambae hem i sidaon wetem pikinini blong yu long miting no long wan narafala taem we plante man oli joen wanples, i gud yu letem hem. Baebol i talem waes tok ya se: “Fren blong yu, oltaem hem i stap soemaot we hem i lavem yu, mo ol brata blong yumi oli stap, blong yumi save givgivhan long yumi long taem blong trabol.”—Ol Proveb 17:17.

Yu mas stap strong long bodi blong yu tu. Yu traem tingbaot: Sipos ambulans i wantem gohed blong karem ol sikman oli go long hospital, oli mas fulumap bensin long hem. Long sem fasin, sipos yu wantem gohed blong lukaot gud long pikinini blong yu, yu mas karem paoa bakegen. Taswe, yu mas kakae gud mo spel gud, mo yu mas mekem smol eksasaes. Savier i gat wan pikinini we i handikap, mo hem i talem se: “Pikinini blong mi i no save wokbaot. Mi mas muvum hem i go long evri ples. I olsem we leg blong mi i tekem ples blong leg blong hem. Taswe, mi mas kakae gud blong stap strong long bodi blong mi.”

Taem yu yu bisi wetem wan pikinini we i handikap, ?olsem wanem yu save gat taem blong lukaot gud long bodi blong yu? Sam papa mo mama oli serem ol wok. Hemia i min se taem wan i lukaot long pikinini, narawan i spel no i mekem samting we hem i wantem. Yu mas luksave wanem samting i no impoten tumas, nao yu yusum taem ya blong mekem samting we i givhan long bodi blong yu. I no isi blong skelem gud ol samting olsemia.

Yu mas tokbaot trabol blong yu long wan gudfala fren. Nating se fren blong yu i no gat wan pikinini we i handikap, be plante taem ol man olsem oli gat bigfala sore. ?Olsem wanem? ?Prea i save givhan? Yasmina i gat tu pikinini we tufala i handikap, mo hem i talem se: “Plante taem, ol samting oli kam hevi tumas long mi, mo mi harem olsem se wan samting i stap jokem nek blong mi. Long taem olsem, mi askem long Jehova blong i tekemaot ol hevi samting ya mo i givim paoa long mi. Afta, mi harem se mi save gohed bakegen.”—Ol Sam 145:18.

Taem wan pikinini i handikap, hemia i jenisim plante samting long famle, olsem kakae, ol ples we famle i go long hem, mo hamas taem we papa mo mama i spenem wetem ol pikinini wanwan. From samting ya, maet ol narafala pikinini oli harem se papa mo mama tufala i no spenem naf taem wetem olgeta. Mo tu, sam papa mo mama we oli spenem plante taem blong lukaot long pikinini we i handikap, oli luk se oli no gat taem blong mekem mared blong olgeta i stap gud. Wan papa long Laeberia, nem blong hem Lionel, i talem se: “Samtaem woman blong mi i talem se hem i stap mekem bighaf blong wok, mo se mi mi no tingbaot smol boe blong mitufala. Long taem olsem, mi harem se hem i stap daonem mi, nao mi tok strong long hem.”

ADVAES: Yu mekem plan blong joen wetem ol pikinini blong yu blong mekem samting we oli laekem. Olsem nao, bambae oli luksave se yu tingbaot olgeta. Jenny we yumi tokbaot finis, i talem se: “Samtaem mitufala i mekem wan samting we i spesel long fasbon boe blong mitufala. Maet mitufala i tekem hem i go pleplei long wan ples blong spel, no narafala samting olsem.”

Yu mas toktok oltaem long man no woman blong yu, mo yutufala i mas prea tugeta. Hemia bambae i mekem i gud long mared blong yutufala. Wan papa long India, nem blong hem Asi, i gat wan boe we i handikap. Hem i talem se: “Samtaem, mi mo woman blong mi, mitufala i harem se mitufala i taed tumas mo i no gat rod blong kamaot long trabol ya. Long taem olsem, mitufala i tektaem blong sidaon blong storian mo prea. Evri moning, taem ol pikinini oli slip yet, mitufala i tokbaot wan vas blong Baebol.” Sam narafala man mo woman oli storian bifo we oli slip long naet. Taem yutufala i wari tumas, ol gudfala storian mo prea oli save mekem mared blong yutufala i stap gud. (Ol Proveb 15:22) Wan man mo woman blong hem, tufala i talem se: “Taem mitufala i tingting bak, mitufala i luksave se sam long ol taem we oli beswan long mared blong mitufala, hemia ol taem we oli had moa.”

Baebol i mekem promes se i no longtaem, bambae God i finisim ol sik we oli mekem ol yangfala mo ol olfala tu oli handikap. (Revelesen 21:3, 4) Long taem ya, ‘bambae i no moa gat man we i save talem se hem i sik.’ *—Aesea 33:24.

Gogo kasem taem ya, yu we yu papa no mama blong wan pikinini we i handikap, yu save win. Kalo mo Maena we yumi tokbaot finis, tufala i talem se: “Taem evri samting i gorong, yu no mas letem tingting blong yu i foldaon. Yu traem tingbaot nomo ol gudfala samting we oli mekem se yu laekem tumas pikinini blong yu. !I gat plante samting olsem!”