Long Julae 1879 ol Witnes blong Jehova oli stat wokem magasin ya Wajtaoa. Stat long taem ya i kam kasem tede, laef long wol i jenis plante, mo magasin ya tu i jenis plante. (Yu luk pija we i stap antap.) Long Wajtaoa we yu stap ridim naoia, bambae yu luk se i gat sam narafala jenis bakegen. ?Wanem samting we i jenis? *

Long plante kantri naoia, ol man oli stap yusum Intenet moa i bitim bifo. Oli go long Intenet blong lukaot save we oli wantem, mo oli laekem rod ya from we i isi blong yusum. Long Intenet i gat enikaen save nomo, mo i isi long man blong faenem ol save ya mo ridim. Plante buk, magasin, mo niuspepa oli stap long Intenet.

From we plante man oli stap yusum Intenet, mifala i jenisim sam samting long Websaet blong mifala, hemia jw.org. Mifala i wantem we ol man oli laekem moa blong ridim ol toktok long Websaet ya, mo mifala i wantem mekem i isi moa long olgeta blong oli faenem ol save we oli nidim. Taem ol man oli kam long Websaet blong mifala, oli save ridim ol buk blong mifala long bitim 430 lanwis. Be i stat long manis ya, ol man bambae oli save ridim sam narafala samting long Websaet ya. Bifo, ol magasin blong mifala we oli stap kamaot evri manis, oli tokbaot plante defdefren samting. Be stat naoia, sam long ol samting ya bambae oli stap kamaot long Intenet nomo.

Plante haf blong ol magasin blong mifala bambae oli stap long Intenet. Taswe i stat naoia, ol Wajtaoa we i blong pablik, bambae oli no moa gat 32 pej blong olgeta, be bambae oli gat 16 pej nomo. Oli wokem Wajtaoa ya long 204 lanwis finis. Be naoia we Wajtaoa bambae i gat 16 pej nomo, samting ya i mekem we plante moa tim blong translesen bambae oli save tanem magasin ya i go long lanwis blong olgeta.

Mifala i wantem we ol jenis ya oli givhan long plante moa man blong oli kasem gud nius blong Baebol. Gud nius ya i save sevem laef blong man. Mifala i wantem gohed blong printim buk mo putum ol save long Intenet. Ol save ya bambae oli givhan long ol man we oli tinghae long Baebol, mo ol man we oli wantem tumas blong save ol tijing blong Baebol.

Olgeta we oli wokem buk ya