Yumi Wok Blong God Ya We i Mekem Yumi Fri

“Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.”​—1 JON 5:3.

?BAMBAE YU YU ANSA OLSEM WANEM?

?Setan i mekem wanem blong man i ting se loa blong Jehova i strong tumas?

?From wanem yumi mas jusum gud ol fren blong yumi?

?Wanem i save givhan long yumi blong stap tru oltaem long Jehova?

1. ?Jehova i yusum fasin fri blong hem olsem wanem? ?Hem i mekem we Adam mo Iv, tufala i naf blong mekem wanem?

JEHOVA nomo hem i fri olgeta. Mo hem i yusum fasin fri blong hem long rod we i stret. Hem i no bos long evri smosmol samting we ol man blong hem oli mekem. Be hem i letem olgeta oli fri blong mekem prapa desisen blong olgeta, mo blong oli harem gud long ol samting we oli wantem mekem. Yu traem tingbaot. Jehova i talem wan samting nomo we Adam mo Iv i no save mekem. Tufala i no mas kakae frut blong “tri ya we i save mekem man i save ol fasin we i gud, mo ol fasin we i nogud.” (Jen. 2:17) Taswe, tufala i naf blong mekem samting we God i wantem, mo tufala i fri.

2. ?From wanem Adam mo Iv i kam slef blong sin?

² ?From wanem Jehova i mekem we Adam mo Iv tufala i fri? Hemia from we Jehova i mekem tufala blong tufala i save yusum tingting blong tufala, mo blong tufala i tekem fasin blong hem. Hem i save we tufala i naf blong mekem samting we i stret from we tufala i lavem hem. (Jen. 1:27; Rom 2:15) Sore tumas, Adam mo Iv i no tinghae long fasin fri we Jehova i givim long tufala. Tufala i wantem se tufala nomo i jusum wanem fasin i gud mo wanem fasin i nogud. Tufala i ting se long rod ya, tufala i fri. Be taem tufala i mekem olsem, tufala wetem ol pikinini blong tufala, olgeta evriwan i kam slef blong sin. Ale, oli harem nogud mo oli ded.​—Rom 5:12.

3, 4. ?Setan i pulum yumi blong gat wanem tingting long ol loa blong Jehova?

³ Nating se Adam mo Iv i stret gud olgeta, Setan i naf blong trikim tufala, blong tufala i sakemaot hae rul blong Jehova. Hem i trikim plante enjel tu. Mo hem i naf blong trikim yumi. Setan i no jenisim ol trik blong hem. Hem i traem pulum yumi blong ting se ol loa blong Jehova oli strong tumas, mo oli blokem yumi blong harem gud long laef. (1 Jon 5:3) Ol man long wol oli tingting olsemia. Sipos yumi joen  wetem ol man ya oltaem, bambae yumi gat sem tingting olsem olgeta. Wan sista we i gat 24 yia i talem se ol fren blong hem oli mekem we hem tu i gat sem tingting olsem olgeta. Hem i fraet blong gat tingting we i defren long ol narafala yangfala. Ale, hem i mekem rabis fasin. Ating yu tu yu luksave se ol fren blong yu oli save spolem ol fasin blong yu.

⁴ Sore tumas, samfala insaed long kongregesen oli letem tingting blong ol fren blong olgeta i gat paoa long fasin blong olgeta. Wan yangfala brata i talem se: “Sam yangfala long kongregesen oli fren wetem ol man we oli no wosipim Jehova. Taem mi joen moa wetem ol yangfala ya, mi gat fasin olsem olgeta. Ale, mi no moa fren gud wetem Jehova. Mi no moa harem gud long ol miting, mo mi no moa prij. Long taem ya nao, mi luksave se mi mas stop blong joen wetem ol fren ya.” ?Yu yu luksave se ol fren oli save spolem fasin blong yu? Bambae yumi tokbaot stori blong wan man long Baebol, we i save givhan long yumi.​—Rom 15:4.

HEM I PULUM OL MAN OLI KAM LONG SAED BLONG HEM

5, 6. ?Absalom i trikim ol narafala man olsem wanem? ?Plan blong hem i kamtru?

⁵ Baebol i tokbaot stori blong plante man we fasin blong olgeta i spolem ol narafala. Wan long ol man ya hemia Absalom, pikinini blong King Deved. Absalom i wan naes man. Be Absalom i letem nogud tingting i gru long hat blong hem. Hem i wantem kam king long ples blong papa blong hem, nating se hem i no gat raet blong mekem olsem. * Absalom i traem blong kasem wanem we hem i wantem. Hem i trikim ol man blong oli ting se king i no wantem givhan long olgeta, be hem nao bambae i givhan long olgeta. Hem i mekem olsem Setan. Hem i mekem ol man oli ting se hem i stap tingbaot olgeta mo hem i talem ol giaman tok agens long papa blong hem Deved.​—2 Saml. 15:1-5.

⁶ ?Olsem wanem? ?Plan blong Absalom i kamtru? I luk olsem se plan blong hem i kamtru. Baebol i talem se hem “i stap pulum [ol man Isrel] oli kam long saed blong hem.” (2 Saml. 15:6) Absalom i trikim plante man. Be biaen, oli kilim Absalom, from we hem i flas tumas. Absalom wetem olgeta we hem i trikim olgeta, evriwan oli ded.​—2 Saml. 18:7, 14-17.

7. ?Yumi lanem wanem long stori blong Absalom?

⁷ ?From wanem i isi long Absalom blong trikim ol man Isrel? Maet from we ol man ya oli wantem ol samting we Absalom i promes blong givim long olgeta. Maet from we Absalom i naes. Nomata se i olsem wanem, yumi save se ol man Isrel oli no stap tru long Jehova mo long king we hem i jusumaot. Tede, Setan i stap yusum ol man we fasin blong olgeta i olsem Absalom blong trikim ol man blong Jehova. Maet ol man ya oli talem se ol samting we Jehova i wantem yumi blong mekem oli strong tumas. Oli talem se ol man we oli no wosipim Jehova oli fri moa. Taem yu harem ol tok olsem, ?yu yu luksave se hemia ol giaman tok? ?Bambae yu gohed blong stap tru long Jehova? ?Yu yu luksave se loa blong Kraes we i “stret olgeta” i save mekem yu fri? (Jem. 1:25) Sipos yes, yu mas soemaot se yu laekem loa ya, mo yu yusum fasin fri blong yu blong mekem Jehova i glad.​—Ridim 1 Pita 2:16.

8. ?Wanem sam stori we i soemaot se sipos yu no obei long Jehova bambae yu harem nogud?

⁸ Setan i wantem tumas blong trikim ol yangfala. Wan brata we i gat 30 yia i talem se taem hem i yangfala, hem i no luksave se ol samting we Jehova i wantem hem blong mekem, oli blong lukaotgud long hem. Hem i ting se oli strong tumas, oli mekem hem i no fri. Ale, hem i mekem nogud fasin. Be hem i no harem gud, mo hem i harem se hem i gat fol. Blong plante yia hem i stap harem nogud from fasin we hem i mekem. Wan sista i talem se taem hem i yangfala, hem i mekem rabis fasin. Biaen hem  i harem nogud tumas mo hem i tingting nogud long hem wan. Hem i talem se: “Naentin yia i pas nao, be mi stap tingbaot yet rabis fasin ya.” Wan narafala sista i talem se: “Mi mi save se fasin blong mi i mekem ol man we mi laekem olgeta tumas, oli harem nogud. Ale, tingting blong mi i trabol, mi harem nogud, mo mi no moa fren wetem God. I nogud we i nogud blong tingbaot se Jehova i no moa glad long mi.” Setan i no wantem se yu tingbaot frut we bambae i kamaot from sin we yu mekem.

9. (1) ?I gud we yumi askem wanem kwestin? (2) ?From wanem yumi mas savegud Jehova?

⁹ Ol stori ya oli soemaot se taem man i no obei long God, hem i save kasem bigfala trabol. Sore tumas, plante yangfala mo olfala long kongregesen, oli mekem olsem mo oli harem nogud tumas. (Gal. 6:7, 8) Taswe i gud yu askem se: ‘?Mi mi luksave ol trik we Setan i yusum blong giaman long mi? ?Mi mi tingbaot Jehova olsem wan gudfala fren blong mi, we oltaem hem i tok tru mo i wantem se mi glad? ?Mi mi bilif strong se Jehova bambae i neva haedem wan samting we i blong mekem i gud long mi, mo mekem mi mi harem gud?’ (Ridim Aesea 48:17, 18.) Sipos yu savegud Jehova, bambae yu ansa ‘yes’ long ol kwestin ya. Yu mas luksave se Jehova i givim ol loa mo ol tok blong hem long Baebol, from we hem i lavem yu, be i no blong blokem yu olsem we yu kalabus.​—Sam 25:14.

YUMI PREA BLONG YUMI WAES MO BLONG YUMI OBEI

10. ?From wanem yumi mas folem fasin blong King Solomon taem hem i yangfala?

¹⁰ Taem Solomon i yangfala, hem i gat tingting  daon mo i prea long Jehova i se: “Mi mi yangfala nomo, mo mi no save fasin blong rul, be yu yu letem mi mi tekem ples blong [papa blong mi], mi kam king.” Biaen Solomon i askem long Jehova blong i givim waes long hem mo i givhan long hem blong i obei oltaem long ol tok blong hem. (1 King 3:7-9, 12) Jehova i ansa long prea blong Solomon. Long sem fasin, nating se yu yangfala no olfala, sipos yu askem samting olsem Solomon i askem, bambae Jehova i lesin long prea blong yu. I tru se bambae Jehova i no mekem yu waes wantaem nomo. Be bambae hem i mekem yu waes sipos yu stadi gud long Tok blong hem, yu prea blong askem tabu spirit, mo yu obei long ol tok we yu harem long ol miting. (Jem. 1:5) Tru ya, Jehova i mekem ol yangfala we oli wosipim hem oli waes moa i bitim ol man we oli no obei long hem, mo i bitim “ol man we oli waes, mo ol man we oli skul gud” long wol ya.​—Luk 10:21; ridim Ol Sam 119:98-100.

11-13. (1) ?Yumi lanem wanem long Ol Sam 26:4, Ol Proveb 13:20, mo 1 Korin 15:33? (2) ?Bambae yu mekem wanem blong folem ol tok long ol vas ya?

¹¹ Bambae yumi tokbaot sam vas long Baebol we oli save tijim yumi blong jusum gud ol fren blong yumi. Ol vas ya bambae i givhan long yumi blong luksave se i impoten blong stadi Baebol mo tingting dip long hem. Nao bambae yumi savegud Jehova. Ol Sam 26:4 i talem se: “Mi mi no save go stap wetem ol man blong giaman. Mi no gat bisnes nating wetem ol man ya we oli gat tu tingting.” Ol Proveb 13:20 i talem se: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.” Mo 1 Korin 15:33 i talem se: “Ol stret man nomo, be ol fren blong olgeta we oli no stret, oli save spolem fasin blong olgeta.”

¹² ?Ol vas ya oli tijim wanem long yumi? (1) Jehova i wantem se yumi jusum gud ol fren blong yumi. Hem i wantem lukaotgud long yumi, blong yumi no mekem wan samting we i save spolem yumi, mo i save mekem yumi no moa fren gud wetem hem. (2) Ol fren oli save pulum yumi blong mekem ol fasin we i gud, mo ol fasin we i nogud. Yumi no save ronwe long samting ya. Ol tok blong ol vas ya i soemaot se Jehova i wantem kasem hat blong yumi. I gud blong makem se ol tok ya i isi nomo blong kasem save long olgeta. Oli no ol rul blong talem se “yu no mas mekem samting ya.” Defren olgeta, i olsem we Jehova i stap talem long yumi se: ‘Ol tok ya oli trutok. ?Bambae yu mekem wanem? ?Wanem i stap long hat blong yu?’

¹³ Ol vas ya oli givhan long ol man bifo. Tede tu, oli save givhan long ol man long plante defren haf long laef. I gud we yu askem ol kwestin olsem: ?Olsem wanem mi save luksave ol man we “oli gat tu tingting”? ?Mi save mekem wanem blong no fren wetem olgeta? (Prov. 3:32; 6:12) ?Hu “ol waes man” we Jehova i wantem se mi fren wetem olgeta? ?Hu “ol man we oli no gat hed” we mi no mas joen wetem olgeta? (Sam 111:10; 112:1; Prov. 1:7) ?Wanem ol gudfala fasin blong mi we bambae mi spolem sipos mi jusum ol nogud fren? ?Ol ‘fren we oli no stret’ hemia olgeta nomo we oli no save Jehova? (2 Pita 2:1-3) ?Bambae yu yu ansa olsem wanem long ol kwestin ya?

14. ?Yu save tokbaot wanem long naet blong Famle Wosip?

¹⁴ Taem yu stap tingting dip long wan vas blong Baebol, we i save givhan long yu mo famle blong yu, i gud yu lukluk ol vas raonabaot blong luksave tingting blong God. * Papa mo mama i save tokbaot ol save ya long naet blong Famle Wosip. Mo tufala i mas tingbaot blong halpem wanwan long famle blong luksave se God i givim ol loa mo ol tok blong hem from we hem i lavem yumi. (Sam 119:72) Stadi olsem i save mekem evriwan long famle i kam moa klosap long Jehova mo oli joen gud.

15. ?Olsem wanem blong save sipos yu waes mo yu obei?

¹⁵ ?Olsem wanem blong save sipos yu waes mo yu obei? Taem yu ridim stori blong ol man blong God, yu traem luk sipos tingting blong yu i olsem tingting blong olgeta. Wan long ol man ya hemia King Deved. Hem i talem se: “Mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.” (Sam 40:8) Mo man we i raetem Ol Sam 119 i talem se: “Hae God. Mi mi laekem Loa blong yu tumas, mi stap tingting long hem i stat long moning, gogo kasem sapa.” (Sam 119:97) Yu mas traehad blong laekem ol loa blong Jehova. Yu mas stadi gud long Baebol, yu prea mo yu tingting dip, nao bambae yu lavem moa ol loa blong Jehova. Mo taem yu luk we yu kasem blesing from we yu obei long ol tok blong Jehova, hemia tu i mekem yu laekem moa ol loa blong hem.​—Sam 34:8.

YUMI MAS TRAEHAD

16. ?Sipos yu wantem winim faet blong yu long saed blong spirit, yu mas tingbaot wanem?

¹⁶ Plante yia finis ol kantri oli stap faet blong oli fri. Be yumi ol Kristin, yumi stap mekem wan faet long saed blong spirit, blong yumi fri oltaem. Yumi mas faet agensem Setan mo ol tingting blong wol ya. Mo yumi mas agensem sin we i stap long yumi, mo hat blong yumi we i save trikim yumi. (Jer. 17:9; Efes. 2:3) Jehova i save givhan long yumi blong winim faet ya. Taem yumi traehad blong mekem fasin we i gud, yumi save harem gud long tu samting. Fas samting se yumi mekem Jehova i glad. (Prov. 27:11) Nambatu samting se bambae yumi traehad oltaem blong stap long rod ya we i go kasem laef we i no save finis. Hemia from we yumi luksave se taem yumi obei long loa blong Kraes, yumi harem gud. Long fiuja, bambae Jehova i mekem yumi fri olgeta olsem we hem i bin promes finis long olgeta man we oli stap tru long hem.​—Jem. 1:25; Mat. 7:13, 14.

17. ?From wanem yumi no mas harem nogud taem yumi mekem mastik? ?Mo hu i save givhan long yumi?

¹⁷ I tru se yumi evriwan i mekem mastik. (Pri. 7:20) Sipos yu mekem wan sin, yu no mas harem nogud, nao yu ting nating long yu wan. Yu mas traehad blong no moa mekem mastik ya, mo askem ol elda blong oli givhan long yu. Man we i mekem sin, i olsem we hem i sik. Disaepol Jemes i talem se: “Prea blong man we i bilif bambae i hilim sikman ya. Masta blong yumi bambae i mekem bodi blong hem i strong bakegen, mo sipos hem i bin mekem sam sin, Masta blong yumi bambae i fogivim hem from.” (Jem. 5:15) Yu no mas fogetem se Jehova i sore long yu, mo i wantem se yu stap long kongregesen from we hem i luk wan gudfala fasin blong yu. (Ridim Ol Sam 103:8, 9.) Taem yu stap mekem wok blong Jehova long olgeta hat blong yu, oltaem bambae Jehova i givhan long yu.​—1 Kron. 28:9.

18. ?Yumi save mekem wanem blong Jehova i lukaotgud long yumi?

¹⁸ Long naet bifo we Jisas i ded, hem i prea wetem ol 11 aposol blong hem, mo i askem long papa blong hem blong i lukaotgud long olgeta. Jisas i talem se: “Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef.” (Jon 17:15) Jisas i tingbaot ol aposol blong hem mo olgeta man blong hem tede tu. Taswe, yumi save harem gud se Jehova bambae i lukaotgud long yumi long taem ya we laef i kam strong tumas. Baebol i tokbaot Jehova i se: “Hem . . . i stap blokemgud olgeta blong trabol i no kasem olgeta. Hem i stap lukaot gud long olgeta we oli stap mekem i stret nomo long ol narafala man, mo i stap gad gud long olgeta we tingting blong olgeta i stap strong long hem.” (Prov. 2:7, 8) I tru se i no isi blong obei oltaem long ol tok blong Jehova. Be sipos yumi obei, bambae yumi save kasem laef we i no save finis, mo bambae yumi fri olgeta. (Rom 8:21) !Maet ol narafala oli gat defren tingting, be yu no mas letem olgeta oli trikim yu!

[Ol futnot]

[Kwestin]

[Tok blong pija long pej 19]

?Wanem i givhan long yumi blong luksave ol man we oli gat fasin olsem Absalom? ?Mo yumi mas mekem wanem blong oli no spolem yumi?