?Yu Yu Save?

?From wanem ol man we oli stap jenisim mane, oli stap long haos blong God long Jerusalem?

▪ Smoltaem bifo we Jisas i ded, Jisas i tokbaot wan fasin we i no stret nating we ol man blong jenisim mane oli stap mekem long haos blong God. Baebol i talem se: ‘Jisas . . . i ronemaot ol man we oli stap mekem maket long yad blong haos ya. Hem i kafsaedem ol tebol blong ol man we oli stap jenisim mane, mo ol jea blong olgeta we oli stap salem nawimba. Nao hem i talem long olgeta se, “Oli raetem long Baebol se, ‘Haos blong mi, bambae ol man oli stap singaot se, “Haos blong Prea.”’ Be yufala, yufala i stap mekem i kam ples blong haed blong ol man blong stil.”’—Matiu 21:12, 13.

Ol man Jiu bifo mo ol narafala man we oli joen long wosip blong ol man Jiu, oli aot long ol defdefren ples mo taon blong wokbaot i go long haos blong God long Jerusalem. Taem oli go, oli karem mane blong ples blong olgeta i go wetem olgeta. Be long haos prea long Jerusalem, oli no save yusum mane blong narafala ples blong pem takis blong haos blong God, pem ol anamol blong mekem sakrefaes, mo blong pem narafala presen bakegen. Oli mas yusum mane blong ples ya nomo. From samting ya, ol man blong jenisim mane oli stap long haos blong God, blong jenisim mane blong ol man we oli kam long ol defren ples. Mo oli stap askem mane tu from wok we oli mekem. Ale, klosap long taem blong lafet blong ol man Isrel, ol man blong jenisim mane oli kam putum tebol mo mekem maket long haos blong God, long yad blong ol man we oli no laen blong Isrel.

Jisas i tok agensem fasin blong ol man ya blong jenisim mane. Hem i talem se oli mekem haos blong God “i kam ples blong haed blong ol man blong stil.” Tok blong Jisas i soemaot klia se mane we ol man ya oli askem from wok blong olgeta i antap tumas.