Yu Save Gat Wan Gudfala Laef Naoia Mo Blong Olwe

?YU MAS mekem wanem blong harem gud long laef we yu gat naoia? God i waes, mo waes blong hem i save givhan long yumi. Taswe, yumi mas folem ol tingting blong God we oli stap long Baebol. Naoia yumi save tokbaot sam long ol tingting ya.

TOK BLONG BAEBOL: King Solomon i raetem se: “I gud yumi evriwan i gohed, yumi stap kakae, mo yumi stap dring, mo yumi stap glad long ol samting ya we yumi stap hadwok long hem, from we ol samting ya oli kam long God nomo.”—PRIJA 3:13.

God i mekem we yumi ol man, yumi man blong wok. Taswe taem man i wok had mo i luk gudfala frut blong wok blong hem, hem i harem gud. Nomata we laef i had olsem wanem, yumi save harem gud long laef blong yumi naoia, sipos yumi no les blong wok mo yumi mekem wok blong yumi wetem fasin we i stret, i no blong giaman mo i no blong stil.

TOK BLONG BAEBOL: “Man we i stap givim presen i go, hem i save harem gud moa, i winim man we i stap kasem presen blong hem.”—OL WOK 20:35.

Plante man oli stap givim taem mo paoa blong olgeta blong mekem sam samting no sam wok blong givhan long narafala man. Maet oli wok blong givhan long man long taem blong trabol. Ol man we oli mekem olsem, oli glad tumas from we oli harem se oli stap yusum laef blong olgeta blong mekem wan gudfala samting. Solomon i raetem se: “Sipos yu gat janis blong givhan long narafala man, i gud yu gohed, yu mekem i gud long hem, stret olsem we hem i wantem.”—Ol Proveb 3:27.

Yu traem tingbaot man ya Ralph. Taem hem i ritae long wok blong hem, hem i mekem desisen blong spenem moa taem long wok blong tijim Baebol long ol man. Woman blong Ralph i stap mekem wok ya finis. Naoia Ralph i joen wetem hem, mo tufala tugeta i spenem plante aoa evri manis long wok ya. Ralph i talem se: “Long sapa, taem mitufala i kasem haos, mitufala i taed from we mitufala i no moa yangfala. Be i no hemia nomo. Long ful dei ya mitufala i yusum olgeta paoa blong mitufala blong mekem wok blong Papa blong yumi long heven. Be mitufala i harem gud tumas from we mitufala i save se hemia i wan gudfala wok.” Ralph mo woman blong hem, tufala i glad from we tufala i no stap tingbaot tufala nomo, be tufala i stap yusum laef blong tufala blong givhan long narafala.

TOK BLONG BAEBOL: “Fren blong yu, oltaem hem i stap soemaot we hem i lavem yu, mo ol brata blong yumi oli stap, blong yumi save givgivhan long yumi long taem blong trabol.”—OL PROVEB 17:17.

Sipos yu gat wan fren we i save givhan long yu, bambae ol trabol blong yu oli no hevi tumas. Wan man Inglan we nem blong hem Francis Bacon, i raetem se ol man we oli no gat tru fren oli olsem “man we i stap long wan draeples nomo.” Yes, i gud blong  gat tru fren, mo i gud we yu gat fasin we i mekem se narafala i tingbaot yu tu se yu tru fren blong olgeta. Samting ya i save mekem we ol trabol blong yu oli no hevi tumas. Yu save harem se yu glad long laef blong yu taem yu gat tru fren.

TOK BLONG BAEBOL: “Olgeta we oli stap lukaot God from we oli no gat paoa blong hem long laef blong olgeta, oli save harem gud.”—MATIU 5:3.

Jisas nao i talem tok ya long Matiu 5:3. Tok ya i soemaot long yu, wanem samting we yu mas mekem sipos yu wantem luk ol promes blong God oli kamtru long wol ya. Jisas i talem se yu mas luksave se yu nidim God long laef blong yu. Ale yu mas traem faenem hem. Yumi ol man, yumi no olsem ol anamol. Yumi wantem save from wanem yumi laef, mo yumi wantem save wanem samting bambae i kamtru long laef blong yumi. Sipos yumi wantem kasem ol save ya long saed blong laef blong yumi, yumi mas lukluk i go long Jehova God. Jehova nomo i save givim save we yumi nidim. Hem i givim save ya long Tok blong hem, Baebol. Baebol i talem from wanem God i mekem wol ya, from wanem yumi laef, mo from wanem yumi safa. Mo Baebol i talem wanem we God i wantem yumi blong mekem. Yumi tokbaot ol samting ya finis long fas haf blong magasin ya. I gud blong gat save long saed blong ol trutok we oli stap long Baebol, from we samting ya i save halpem yumi blong harem gud long laef. Mo i save halpem yumi blong yumi no tingting se laef i blong nating nomo. Ol man we oli stadi long Baebol, mo oli mekem ol tok blong hem i wok long laef blong olgeta, oli glad. ?From wanem? From we oli stap kam klosap moa long God ya we i mekem olgeta samting. Yes, Jehova God we i “stap harem gud oltaem,” hem i fren blong olgeta, mo oli trastem hem.—1 Timoti 1:11.

TOK BLONG BAEBOL: “God i mekem yumi, mo . . . oltaem yufala i mas tingbaot hem. I nogud yufala i stap wet go kasem taem ya we evri dei, ol trabol bambae oli stap kam kasem yufala, mo evri yia, bambae yufala i stap talem se, ‘Mi mi no glad nating long laef ya.’”—PRIJA 12:1.

King Solomon i givim advaes ya long ol yangfala, se oli mas tingbaot God. Samtaem ol yangfala oli no luksave se laef i sot, mo oli no tingbaot se trabol i save kasem olgeta enitaem nomo. Nating se Solomon i givim advaes ya long ol yangfala, be hem i stret long yumi evriwan. I gud yu tingbaot God ya we i Mekem yu. Hem i mas stap long fas ples long laef blong yu. Nao bambae yu harem se laef blong yu i impoten. I nogud yu gat sem tingting olsem sam man we oli se: “Yumi kakae, yumi dring, from we tumora bambae yumi ded.” (1 Korin 15:32) I gud yu tingbaot God fastaem long evri samting we yu stap mekem. Sipos yu mekem olsem, Prija 8:12 i talem se ‘olgeta samting long laef blong yu bambae oli stap ron gud.’

Wan gel we nem blong hem Wendi, i agri wetem tingting ya. Taem hem i yang yet, hem wetem sista blong hem, tufala i lanem lanwis blong Spen, from we tufala i wantem go stap long Dominikan  Ripablik. Tufala i harem se long kantri ya oli nidim moa man blong talemaot gud nius blong Baebol. Wendi i talem se: “Mitufala i lego plante samting we mitufala i laekem, from we mitufala i wantem go givhan long ples we i gat nid. Mo mitufala i glad we i glad long taem we mitufala i spenem long wok ya. !Tru ya, mi no sore nating long ol 6 manis we mi stap long kantri ya! Ol gudgudfala samting we mitufala i kasem oli gud moa i winim olgeta samting we mitufala i lego.”

Man We Tingting Blong Hem i Stap Strong Long God, Hem i Harem Gud Long Laef

Sipos yu kam wan fren blong Jehova, samting ya i save mekem we yu harem gud from we yu gat wan risen blong laef. ?Wanem risen ya? Setan i pulum Adam mo Iv blong tufala i agensem rul blong God. Be i no hemia nomo. Hem i wantem soemaot tu se i no gat wan man nating long wol ya we bambae i save putum tingting blong hem i stap strong long God, long taem blong trabol. (Job 1:9-11; 2:4) Ale yu yu save soemaot we Setan i man blong giaman. ?Yu save mekem samting ya olsem wanem? Tingting blong yu i mas strong long God. Yu mas obei oltaem long ol loa blong hem. Yu mas soemaot we yu yu agri fulwan se Jehova nomo i gat raet blong talem long yu wanem samting i gud mo wanem samting i nogud.—Revelesen 4:11.

Taem yu wantem folem rod we i stret long fes blong God, bambae yu kasem sam trabol. ?Sipos ol trabol ya i kasem yu, samting ya bambae i mekem we laef blong yu i blong nating nomo? Nogat. Traem tingbaot sipos wan rabis man i talem wan giaman stori blong spolem wan fren no famle blong yu. Bambae yu harem nogud mo bambae yu mas tok blong talemaot se fren no famle ya i no olsem. Be taem yu tok, maet rabis man ya i wantem kilim yu. ?Olsem wanem nao? From we rabis man ya i wantem kilim yu, ?yu ting se samting ya bambae i mekem yu yu harem se laef blong yu i blong nating nomo? !Nogat! Bambae yu no tingting olsem. Yu no wantem save sipos rabis man ya i wantem kilim yu, from we yu yu save se samting we yu stap mekem i stret. Ale, yu mas mekem sem mak long saed blong God. Taem tingting blong yu i stap strong long God nomata wanem trabol we i kasem yu, yu stap mekem God i glad tumas.—Ol Proveb 27:11.

Bambae Yu Harem Gud Blong Laef Olwe

I gud yu traem bes blong yu blong save moa long saed blong God mo ol samting we bambae hem i mekem. Jisas Kraes i talem se: “Mo laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) God bambae i mekem wol ya i kam wan paradaes, olsem we hem i wantem fastaem. Taem paradaes ya i kamtru, ol man we tingting blong olgeta i stap strong long God bambae oli gat “laef we i no save finis.” Long taem ya bambae yumi no harem se yumi laef blong nating nomo. Be bambae yumi glad long laef mo bambae yumi mekem ol wok we yumi harem gud long hem.—Ol Sam 145:16.

?Be olsem wanem blong kasem save ya long saed blong God mo Jisas? Save ya i stap long Tok blong God, Baebol. Sipos yu wantem we wan man i givhan long yu blong faenem ol save ya long Baebol, yu no mas fraet blong raet i go long olgeta we oli wokem magasin ya. Olgeta ya bambae oli glad blong mekem plan wetem wan man no woman blong i kam halpem yu blong save wanem samting we Baebol i tijim.