Kwestin Blong Olgeta We Oli Ridim Magasin Ya . . .

?Olgeta gudfala Kristin oli go long heven?

▪ Plante man oli harem gud taem oli ridim ol tok blong Jisas we i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) ?Tok ya blong Jisas i min se olgeta gudfala man we oli wosipim Papa blong hem Jehova God, bambae oli go long heven blong harem gud long laef ya we i no save finis?

Jisas i talem wan tok we i pulum tingting blong man, i se: “I no gat man we i go antap long heven samtaem. Mi, mi Pikinini blong Man, mi nomo mi kamaot long heven, mi kamdaon.” (Jon 3:13) Jisas i stap soemaot se ol man we oli wosipim Jehova bifo olsem Noa, Ebraham, Moses mo Deved, oli no go long heven. (Ol Wok 2:34) ?Ale, ol man ya oli go long weples? Long wan tok we i sot nomo, yumi save talem se: Ol gudfala man ya we yumi tokbaot, oli stap slip nomo long beregraon, oli no save wan samting. Oli wet blong God bambae i mekem olgeta oli laef bakegen.—Prija 9:5, 6; Ol Wok 24:15.

Jisas nao i fas man we i talem se, sam man bambae oli laef bakegen blong go long heven. Hem i talem long ol disaepol blong hem se, bambae hem i go mekemrere ples blong olgeta long heven. (Jon 14:2, 3) Hemia wan niufala save long ol man blong God bifo. Biaen, aposol Pol i eksplenem se afta we Jisas i ded mo i go long heven, hem i ‘openem wan niufala rod we i laef,’ blong ol disaepol blong hem. Bifo we Jisas i go long heven, i no gat wan man i folem rod ya yet.—Hibrus 10:19, 20.

?Hemia i min se stat long taem ya, olgeta gudfala man bambae oli go long heven? Nogat, from we ol man we oli go long heven, oli go blong mekem wan wok we God i givim long sam man nomo blong mekem. Long las naet blong Jisas wetem ol disaepol blong hem, Jisas i talem long olgeta se bambae oli ‘sidaon long ol jea blong king’ long Kingdom blong heven, blong jajem ol man. Taswe wok blong ol man we oli go long heven, hemia blong rul wetem Jisas.—Luk 22:28-30.

God i no givim nambawan wok ya long ol aposol nomo, be i gat sam narafala man tu we bambae oli mekem wok ya. Long wan vison we Jon i luk, hem i luk Jisas wetem wan grup blong ol man we God i mekem olgeta oli laef bakegen long heven. Hem i eksplenem se olgeta ya oli kam ol ‘king mo pris, blong oli rul long olgeta man long wol.’ (Revelesen 3:21; 5:10) ?I gat hamas man evriwan? Long olgeta kantri, i gat stret namba blong ol man we oli wok long gavman. Hemia i sem mak long saed blong Kingdom blong heven. I gat sam man nomo we bambae oli rul long Kingdom ya. Jisas we i Smol Sipsip blong God, hem i rul wetem ol 144,000 man we “God i pemaot olgeta finis, i tekemaot olgeta long ol narafala man.”—Revelesen 14:1, 4, 5.

I tru, ol 144,000 man ya oli smol nomo, taem yumi tingbaot namba blong olgeta gudfala man bifo mo long taem blong yumi. Olgeta ya oli plante we oli plante tumas. I klia se, ol 144,000 man ya oli go long heven blong mekem wan spesel wok we i tabu. Yu traem tingbaot: Sipos yu wantem bildim wan haos, ?bambae yu askem evri man long ples blong yu we oli gat gudhan blong bildim haos, blong oli kam bildim haos ya? Nogat. Ating bambae yu nidim sam man nomo blong mekem wok ya. Sem mak, God i no jusum evri gudfala man blong oli mekem spesel wok ya blong rul wetem Kraes long heven.

Gavman ya blong heven bambae i mekem stamba tingting blong God long saed blong ol man, i kamtru long wol. Jisas mo ol 144,000 man we bambae oli rul wetem hem, oli lidim wok ya blong mekem fulwol i kam wan paradaes, blong ol gudfala man oli save stap long hem. Olgeta ya oli plante we oli plante tumas, i no gat man i save kaontem olgeta. Ol man ya bambae oli harem gud long laef ya we i no save finis long paradaes ya. (Aesea 45:18; Revelesen 21:3, 4) Long olgeta we oli laef long paradaes ya, i gat ol dedman ya tu we God i stap tingbaot olgeta yet. Bambae hem i mekem olgeta oli laef bakegen.—Jon 5:28, 29.

Evri gudfala man blong Jehova we oli wosipim hem bifo mo tede tu, bambae oli kasem gudfala presen ya, laef we i no save finis. (Rom 6:23) I gat smol man nomo we bambae oli go long heven blong mekem wan spesel wok, be bighaf blong ol man bambae oli stap long wan paradaes we i kavremap fulwol.