Ol Yangfala, ?Bambae Yufala i Yusum Laef Blong Yufala Olsem Wanem?

“Sipos i olsem we mi boksing, be mi no save sakem han blong mi i go olbaot, we i no kasem man.”—1 KOR. 9:26.

1, 2. ?Wanem samting we yu mas save sipos yu wantem karem gudfala frut long laef blong yu?

SIPOS yu wantem go wokbaot long wan ples we yu no save, ating bambae yu karem wan map mo wan tos wetem yu. Wan map bambae i givhan long yu blong save wanem rod blong folem. Mo wan tos bambae i givhan long yu, blong yu no lusum rod taem ples i tudak. Be map mo tos tufala tugeta i no save givhan long yu sipos yu no save weples yu wantem go long hem. I mas klia long tingting blong yu se yu wantem kasem wanem ples. Sipos no, bambae yu wokbaot krangke nomo.

² Taem yu stap kam bigman, i olsem se yu stat blong mekem wan wokbaot. Yu yu gat wan gudfala map mo tos. Baebol i olsem wan map we i save givhan long yu blong save wanem rod blong folem long laef blong yu. (Prov. 3:5, 6) Mo tingting blong yu i olsem wan tos. Sipos yu trenem gud tingting blong yu folem ol tok blong Baebol, bambae i givhan long yu blong yu no lusum rod. (Rom 2:15) Be sipos yu wantem karem gudfala frut long laef blong yu, yu mas save se yu wantem yusum laef blong yu olsem wanem. Yu mas putum sam mak we yu wantem kasem long laef blong yu, mo ol mak ya oli mas klia long tingting blong yu.

3. ?Folem ol tok blong Pol long 1 Korin 9:26, from wanem i gud blong putum ol mak?

³ Aposol Pol i talem from wanem i gud blong putum ol mak mo traehad blong kasem olgeta. Hem i talem se: “Fasin blong mi, sipos i olsem we mi resis, be mi mas go blong win nomo, no sipos i olsem we mi boksing, be mi no save sakem han blong mi i go olbaot, we i no kasem man.” (1 Kor. 9:26) Sipos yu traehad blong kasem sam mak long laef blong yu, bambae yu resis blong win. I no longtaem, bambae yu mas mekem sam bigfala desisen long saed blong wosip, wok, mared, famle, mo sam narafala samting bakegen. Samtaem, maet yu harem se i gat plante tumas rod we yu save jusum, nao tingting blong yu i fasfas. Be sipos yu tingting gud long rod we yu wantem folem long laef blong yu, mo ol desisen blong yu oli stanap long ol trutok mo tingting blong God we oli stap long Baebol, bambae yu no lusum rod.—2 Tim. 4:4, 5.

4, 5. (a) ?Wanem i save hapen sipos yu no traehad blong kasem sam mak long laef blong yu? (b) ?From wanem yu mas tingbaot blong putum ol mak we Jeova i glad long olgeta?

⁴ Sipos yu no traehad blong kasem sam mak long laef blong yu, ating ol fren blong yu mo ol tija blong yu bambae oli pulum yu blong mekem samting we olgeta oli ting se i stret long yu. I tru, nating se ol mak we yu wantem kasem oli klia long tingting blong yu, maet sam fren mo tija blong yu oli talemaot yet ol narafala rod we yu save jusum. Taem yu stap lesin long ol tingting blong olgeta, i gud yu askem se, ‘?Ol mak we oli wantem mi blong kasem, bambae oli givhan long mi blong tingbaot Jeova taem mi yangfala yet, no bambae oli pulum tingting blong mi i go long narafala rod?’—Ridim Prija 12:1.

⁵ ?From wanem yu mas tingbaot blong mekem God i glad, taem yu jusum ol samting we bambae yu mekem long laef blong yu? Wan risen, hemia from se evri samting we yu kasem we oli gud, Jeova nao i givim. (Jem. 1:17) Yumi evriwan i mas talem tangkiu long Jeova from ol samting we hem i mekem. (Rev. 4:11) Nambawan rod blong talem tangkiu long Jeova, hemia blong putum ol mak we Jeova i glad long olgeta. Bambae yumi tokbaot ol gudfala mak we yu save putum, mo wanem we yu mas mekem blong kasem olgeta.

 ?Wanem Sam Mak We Yu Save Putum?

6. ?Wanem wan bigfala mak we yu mas kasem? ?From wanem?

⁶ Olsem yumi tokbaot long laswan stadi, wan bigfala mak we yu mas kasem, hemia blong pruvum se ol samting we yu yu lanem long Baebol oli tru. (Rom 12:2; 2 Kor. 13:5) Maet ol yangfala raonabaot long yu oli bilif long evolusen * no long sam narafala giaman tijing blong ol jos. Oli bilif long ol tijing ya from we ol narafala oli talem long olgeta blong mekem olsem. Be yu no nid blong bilif long wan tijing from we narafala i talem long yu, nogat. Yu mas tingbaot se, Jeova i wantem we yu wosipim hem long olgeta tingting blong yu. (Ridim Matiu 22:36, 37.) Papa blong yumi long heven i wantem se bilif blong yu i stanap long ol samting we i tru.—Hib. 11:1.

7, 8. (a) ?Wanem sam mak we yu save kasem kwik mo we oli save mekem bilif blong yu i strong moa? (b) ?Taem yu kasem sam long ol mak ya, bambae yu harem olsem wanem?

⁷ Blong mekem bilif blong yu i kam strong moa, i gud yu putum sam mak we yu save kasem kwik from we oli no strong tumas. Wan mak we yu save putum, hemia blong prea evri dei. Blong mekem se yu no talem ol sem toktok evri taem long prea blong yu, i gud yu tingbaot no yu raetemdaon ol samting we oli hapen, we yu wantem tokbaot long prea blong yu. I gud yu tokbaot ol trabol we oli kasem yu, be yu no mas fogetem blong tokbaot tu, ol samting we yu harem gud long hem. (Fil. 4:6) Wan narafala mak we yu save traehad blong kasem, hemia blong ridim Baebol evri dei. Sipos yu ridim fo pej evri dei, yu save finisim ful Baebol long wan yia nomo. * Ol Sam 1:1, 2 i talem se: ‘Olgeta we oli glad blong ridim Loa blong Hae God oltaem, mo oli stap tingting long hem long dei mo long naet, olgeta ya oli save harem gud.’

⁸ Namba tri mak we yu save kasem kwik, hemia blong rerem wan ansa blong givim long evri miting blong kongregesen. Fastaem, yu save ridim ansa blong yu no yu save ridim wan vas. Biaen, yu save putum mak blong ansa long prapa toktok blong yu. Evri taem yu yu givim wan ansa, yu  givim wan presen i go long Jeova. (Hib. 13:15) Taem yu kasem sam long ol mak ya, bambae tingting blong yu i kam strong, bambae yu laekem Jeova moa, mo bambae yu rere blong putum sam mak we oli tekem longtaem moa blong kasem.

9. ?Sipos yu yu no wan pablisa blong Kingdom yet, wanem sam mak we yu save putum we oli tekem longtaem moa blong kasem?

⁹ ?Wanem sam mak we yu save putum we oli tekem longtaem moa blong kasem? Sipos yu no stat yet blong talemaot gud nius long ol man, yu save putum mak ya blong kam wan pablisa blong Kingdom. Taem yu kasem nambawan mak ya, yu mas joen oltaem long wok blong prij, we yu no mestem wan manis. Mo yu mas traehad blong karem frut long wok ya. Yu mas lanem blong yusum Baebol taem yu prij long man. Mo taem yu lanem samting ya, bambae yu luk se yu harem gud moa long wok blong prij. Ale yu save putum mak blong spenem moa taem long wok blong prij long ol haos wanwan, mo yu save traehad blong statem wan Baebol stadi. Taem yu yu wan pablisa we i no baptaes yet, yu save putum nambawan mak ya blong kam naf blong givim laef blong yu long Jeova God mo tekem baptaes olsem wan Witnes blong hem. I no gat wan mak we i gud moa blong kasem long laef blong yu.

10, 11. ?Wanem sam mak we ol yangfala oli save kasem taem oli baptaes finis?

¹⁰ Sipos yu yu baptaes finis blong kam wan man blong Jeova, yu save putum sam narafala mak we oli tekem longtaem moa blong kasem. Samtaem yu save givhan long ol kongregesen we oli no stap prij plante long ples blong olgeta. Yu save yusum paoa blong yu mo strong bodi blong yu blong mekem wok blong haftaem no fultaem paenia. Plante taosen brata mo sista we oli kasem bigfala glad long wok blong paenia, bambae oli talem long yu se wok blong paenia i nambawan rod blong tingbaot God ya we i mekem yu, taem yu yangfala yet. Yu save kasem ol mak ya taem yu stap yet wetem papa mama blong yu. Mo bambae yu givhan long kongregesen blong yu taem yu kasem ol mak ya.

¹¹ Sam narafala mak we oli tekem longtaem moa blong kasem, oli save lidim yu blong givhan long plante narafala kongregesen tu. Yu save putum mak blong go long wan narafala ples no kantri we i nidim moa man blong prij. Maet yu wantem givhan blong wokem ol Haos Kingdom mo ol branj ofis long ol narafala kantri. Maet yu save wok long Betel no mekem wok blong misinari. Be bifo we yu save kasem ol mak ya, fastaem yu mas kasem mak ya blong baptaes. Sipos yu yu no baptaes yet, i gud yu tingbaot wanem we yu mas mekem blong kasem bigfala mak ya long laef blong yu.

?Olsem Wanem Blong Kasem Mak Blong Baptaes?

12. ?From wanem samfala oli baptaes? ?Mo from wanem ol risen ya oli no stret?

¹² ?Long tingting blong yu, from wanem man i baptaes? Samfala oli ting se sipos oli baptaes, bambae samting ya i blokem olgeta blong oli no foldaon long sin. Sam narafala oli harem se oli mas baptaes from we ol fren blong olgeta oli baptaes. Sam narafala yangfala oli wantem mekem papa mama blong olgeta oli glad. Be baptaes bambae i no givhan long yu blong blokem sin, sipos tingting blong yu i lidim yu blong wantem mekem samting we i no stret. Mo bambae i no stret sipos yu baptaes from we narafala i talem se yu mas mekem olsem. I stret blong yu baptaes taem yu kasem save gud wanem we yu mas mekem olsem wan Witnes blong Jeova, mo taem yu rere blong holem promes ya.—Pri. 5:4, 5.

13. ?From wanem yu mas baptaes?

¹³ Wan stret risen blong baptaes, hemia from we Jisas i talem long ol man blong hem blong oli ‘pulum ol man oli kam man blong hem mo baptaesem olgeta.’ Jisas i givim eksampol long yumi taem hem wan i baptaes. (Ridim Matiu 28:19, 20; Mak 1:9.) Mo tu, baptaes i wan samting we man i mas mekem sipos hem i wantem se God i sevem hem. Aposol Pita i tokbaot se Noa i bildim wan bigfala sip, blong hem mo famle blong hem oli stap sef taem bigfala wota i ron. Nao hem i talem se: “[Samting ya] i pija blong baptaes ya we i sevem yufala . . . from we God i mekem Jisas Kraes i laef bakegen.” (1 Pita 3:20, 21) Samting ya i no min se yu mas baptaes from we yu wantem nomo se God i sevem yu. Yu mas baptaes from we yu lavem Jeova, mo yu wantem mekem wok blong hem wetem olgeta hat, laef, tingting, mo paoa blong yu.—Mak 12:29, 30.

14. ?From wanem samfala oli no baptaes yet? ?Wanem i save leftemap tingting blong yu?

 ¹⁴ Samfala oli no wantem baptaes from we oli fraet se, sipos oli baptaes nao oli mekem wan sin, kongregesen i save putumaot olgeta. ?Yu yu fraet long samting ya? I no rong blong fraet long samting ya, from we fraet ya i save soemaot se yu tinghevi long bigfala promes ya, mo long wok we yu mas mekem olsem wan Witnes blong Jeova. Maet i gat wan narafala samting tu we i stap blokem yu blong yu no wantem baptaes. Maet tingting blong yu i no strong yet se beswan fasin blong laef, hemia blong folem ol loa blong God. Sipos yu tingting olsem, i gud yu tingting long ol nogud frut we ol man oli kasem taem oli no wantem folem ol tok blong Baebol. Samting ya i save givhan long yu blong mekem wan gudfala desisen. Maet yu yu laekem tumas ol loa blong God, be yu fraet se yu yu no naf blong folem olgeta long laef blong yu. Fraet ya tu i wan gudfala samting, from we i soemaot se yu gat gudfala fasin ya, tingting daon. Baebol i talem se tingting no hat blong yumi ol sinman, i save giaman long yumi. (Jer. 17:9) Be yu yu save win, sipos oltaem yu ‘obei long ol tok blong God.’ (Ridim Ol Sam 119:9.) Nomata wanem risen i mekem se yu no baptaes yet, be yu mas tekem aksen blong winim samting ya. *

15, 16. ?Yu yu save mekem wanem blong luksave sipos yu yu rere blong baptaes?

¹⁵ ?Yu yu save mekem wanem blong luksave sipos yu yu rere blong baptaes? Yu mas tingbaot ol kwestin olsem: ‘?Mi mi save eksplenem ol stamba tijing blong Baebol long narafala? ?Mi mi joen long wok blong prij taem papa mama blong mi tufala i no go prij? ?Mi mi traehad blong stap long olgeta Kristin miting? ?Mi save tingbaot sam taem we mi no letem ol narafala yangfala oli pulum mi blong mekem i no stret? ?Sipos papa mama blong mi mo ol fren blong mi oli no moa mekem wok blong Jeova, bambae mi mi gohed yet? ?Mi mi prea long God blong talemaot long hem se mi tinghae long fasin fren we mi mi gat wetem hem? ?Mi mi prea finis long God blong mekem promes long hem blong givim olgeta laef blong mi i go long hem?’

¹⁶ Baptaes i gat bigfala paoa long laef blong yumi, mo i wan desisen we yumi mas tinghevi long hem. ?Olsem wanem? ?Yu yu naf blong tinghevi long desisen ya, olsem man we i bigman finis long tingting blong hem? Bigman long tingting, i no minim nomo se yu yu save givim ol gudfala tok long platfom mo ol gudfala ansa long miting. Hemia i min se yu save mekem ol desisen we oli stanap long save blong yu long Baebol. (Ridim Hibrus 5:14.) Sipos yu yu naf blong mekem olsem, yu yu save kasem blesing ya we i bigwan moa i bitim ol narafala blesing long laef blong yu. Hemia se, yu save mekem wok blong Jeova wetem olgeta hat blong yu, mo laef blong yu i save soemaot se promes we yu mekem blong givim laef blong yu i go long Jeova, i tru.

17. ?Afta we yu baptaes, wanem bambae i givhan long yu blong winim ol samting we oli traem yu?

¹⁷ Afta we yu baptaes, maet yu harem se tingting blong yu i strong we i strong blong mekem wok  blong God. Be i no longtaem, sam samting bambae oli traem bilif blong yu mo fasin blong yu blong stanap strong. (2 Tim. 3:12) I nogud yu ting se yu wan nomo yu mas winim ol samting ya we oli traem yu. Yu save askem advaes long papa mama blong yu. Yu save askem long olgeta long kongregesen we oli strong long bilif, blong oli givhan long yu. I gud yu fren gud oltaem wetem olgeta we bambae oli halpem yu blong stanap strong. Mo yu no mas fogetem se, Jeova i stap tingbaot yu, mo bambae hem i givim paoa we yu nidim, blong winim olgeta trabol we oli kasem yu.—1 Pita 5:6, 7.

?Olsem Wanem Blong Kasem Ol Mak We Yu Putum?

18, 19. ?From wanem i gud we yu jekem ol samting we yu stap putum long fasples long laef blong yu?

¹⁸ ?Nating se yu gat gudfala tingting, maet yu harem se yu no gat taem blong mekem ol samting we yu wantem mekem mo ol samting we yu mas mekem? Sipos yu harem olsem, i gud yu jekem ol samting we yu stap putum olgeta long fasples long laef blong yu. Yu traem mekem samting ya: Yu karem wan baket mo yu putum sam ston insaed long hem, nao yu fulumap sanbij long hem. Ale, baket blong yu i fulap long ol ston mo sanbij. Nao yu kafsaedem ol ston ya mo sanbij, be yu no sakem olgeta. Nao yu traem narafala rod. Fastaem yu fulumap sanbij ya long baket, mo biaen yu traem fulumap ol ston ya bakegen. ?Olsem wanem? ?Yu luk se baket i smol? Hemia from we yu putum sanbij i go insaed long baket fastaem.

¹⁹ Yu save kasem problem olsem long saed blong fasin blong yu blong yusum taem. Sipos yu mekem fastaem ol samting we oli no impoten tumas olsem ol pleplei, bambae yu luk se yu no moa gat taem blong mekem ol samting we oli impoten, hemia ol samting blong wosipim God. Be i gud yu folem advaes ya blong Baebol, we i talem se yu mas ‘jusumaot wanem fasin we i stret gud olgeta.’ Hemia i min se, yu mas mekem ol samting we oli impoten fastaem. Sipos yu mekem olsem, bambae yu luk se yu save mekem ol wok blong Kingdom, mo bambae yu gat smol taem yet blong pleplei.—Fil. 1:10.

20. ?Sipos yu stap traehad blong kasem ol mak blong yu, nao yu wari mo tingting blong yu i hafhaf, yu mas mekem wanem?

²⁰ Taem yu stap traehad blong kasem ol mak we yu putum, wetem mak ya blong baptaes tu, maet samtaem yu wari, mo maet tingting blong yu i hafhaf. Taem yu harem olsem, i gud yu ‘putum ol trabol blong yu long Hae God, nao hem bambae i blokem yu, i sevem yu.’ (Sam 55:22) Yu yu gat janis blong joen naoia long nambawan wok ya we i impoten moa long ol narafala wok we ol man oli mekem long ol yia we oli pas finis, hemia wok blong prij mo tijim ol man. (Wok 1:8) Yu save jusum blong lukluk nomo long ol narafala we oli mekem wok ya, be yu wan yu no joen. Be i moa gud sipos yu jusum blong joen long nambawan wok ya. Yu no mas fraet blong yusum save mo gudhan we yu yu gat, blong mekem wok blong Kingdom i go moa. Neva bambae yu sore we yu mekem wok blong ‘God ya we i mekem yu, taem yu yangfala yet.’—Pri. 12:1.

[Ol futnot]

?Bambae Yu Yu Ansa Olsem Wanem?

• ?From wanem yu mas putum ol mak we bambae yu traehad blong kasem long laef blong yu?

• ?Wanem sam mak we yu mas kasem?

• ?Yu mas mekem wanem blong kasem mak ya blong baptaes?

• ?Sipos yu jekem ol samting we yu stap putum olgeta long fasples long laef blong yu, samting ya i save givhan long yu olsem wanem blong kasem ol mak blong yu?

[Kwestin]

[Tok blong pija long pej 21]

?Yu yu stap traehad blong kasem mak ya blong ridim Baebol evri dei?

[Tok blong pija long pej 23]

?Wanem bambae i givhan long yu blong kasem mak ya blong baptaes?

[Tok blong pija long pej 24]

?Pija ya i tijim yu long wanem samting?