Kwestin Blong Olgeta We Oli Ridim Magasin Ya . . .

?Yu Yu Mas Bilif Long Triniti Blong Kam Wan Kristin?

▪ Wan buk blong hae skul, we nem blong hem World Religions of Denmark, mo we oli printim long 2007, i tokbaot se ol Witnes blong Jeova oli wan smol grup blong ol Kristin we oli folem gud Baebol. Blong talem stret, ol Witnes blong Jeova oli namba tri Kristin jos long Denmak.

Be wan bisop blong Nasnal Jos blong Denmak i agensem bigwan desisen blong woman we i raetem buk ya, blong putum ol Witnes blong Jeova long lis ya. ?From wanem? Hem i talem se: “Mi mi no mitim yet wan man we i stap stadi long bilif blong ol jos, we i ting se [ol Witnes blong Jeova] oli Kristin. Ol Witnes blong Jeova oli no bilif long Triniti, we i stamba blong Kristin skul.”

Woman we i raetem buk ya, nem blong hem Annika Hvithamar. Hem i wan tija blong Yunivesiti tu, we i stap tijim ol save long saed blong ol jos mo laef blong man. Woman ya i talem se taem yu askem long wan man, from wanem hem i wan Kristin, neva man ya bambae i talem long yu se, ‘mi mi wan Kristin from we mi bilif long Triniti.’ Mo tu, wan haf insaed long buk ya we nem blong hem, “?Yu Yu Wan Kristin?” i talem se: “Tijing blong Triniti i had moa blong eksplenem i bitim ol narafala Kristin tijing.” Buk ya i gohed i se: “Plante taem i had blong eksplenem long ol Kristin, speseli olgeta we oli neva stadi long ol tijing blong jos, se God blong ol Kristin i wan god nomo, be i no tri defren god.”

Samting we Baebol i tijim long saed blong God mo Jisas, i klia mo i isi. I no had blong man i kasem save long hem. Tok ya “Triniti” i no stap nating long Tok blong God. Baebol i talem klia se Jisas Kraes i fasbon Pikinini blong God. (Kolosi 1:15, NW) Baebol i tokbaot Jisas tu olsem man blong “tekem ol man oli kam joen wetem God.” (1 Timoti 2:5) Long saed blong Papa, Baebol i talem se: “Plis yu mekem olgeta oli save we yu nomo yu Hae God, yu nao yu hae King blong olgeta ples long wol.”—Ol Sam 83:18.

Ol Witnes blong Jeova oli gat strong tingting se man i mas bilif long Jisas. (Jon 3:16) Hemia nao risen from wanem oli tinghae long tok blong Jisas, we i talem se: “Yu mas mekem wosip long Hae God we i God blong yu, mo bambae yu mas mekem wok blong hem nomo.” (Matiu. 4:10) Tru ya, man we i traehad blong obei long ol tok blong Jisas, hem i stret blong karem nem ya Kristin.

[Tok blong makem poen long pej 18]

“Tijing blong Triniti i had moa blong eksplenem i bitim ol narafala Kristin tijing”