Man Ya We i Jenisim Laef Blong Plante Man

Plante bilian man oli laef mo oli ded long wol ya. Plante long olgeta oli no mekem wan bigfala samting we man i save tingbaot olgeta from. Be i gat samfala we oli gat bigfala paoa long laef blong ol man​—mo tu, long laef blong yu evri dei.

YU GIRAP long moning mo yu onem laet. From we yu sik, yu tingbaot blong tekem meresin we dokta i givim blong halpem yu blong winim sik blong yu. Biaen, yu tekem wan buk no magasin mo yu gobak long bed. Yu no statem gud dei blong yu yet, be sam man we oli gat bigfala paoa long laef blong ol man, oli givhan long yu finis.

Michael Faraday Hem i bon long yia 1791. Inglis man ya i stadi long ol bigfala paoa raonabaot long yumi, olsem lektrik we i stap long win. Hem nao i faswan man blong mekem enjin we i wok long lektrik mo wan smol jenereta. Wok ya blong hem blong faenem mo wokem ol niufala samting, i givhan blong mekem se olgeta man oli save yusum lektrik tede.

Ts’ai Lun Hem i wan haeman long haos blong empera blong Jaena. Samwe long yia 105 K.T., * hem i faenem wan rod blong wokem pepa, we i givhan long ol man biaen blong yusum masin blong wokem plante pepa.

Johannes Gutenberg Samwe long yia 1450, man Jemani ya we i stap mekem ol niufala samting, i wokem faswan masin we i save printim buk. Wetem masin ya, oli save wokem plante buk blong givim fulap save long man mo i no sas tumas blong wokem olgeta.

Alexander Fleming Long yia 1928, man Skotlan ya i faenem wan samting we i wokem meresin long hem, mo hem i putum nem blong meresin ya se penisilin. Ol man long plante ples blong wol oli yusum meresin ya blong winim sik we i kamaot from ol jem.

I klia se, sam man oli bin faenem plante niufala samting we oli mekem i gud long plante bilian man, mo oli givhan long helt blong man tu.

Be i gat wan man we i defren olgeta long ol narafala man. Ol man oli save hem, be i no from we hem i faenem sam niufala save long saed blong saens no meresin. Oli save hem from ol tijing blong hem we oli givim hop long man mo oli leftemap tingting tu. Man ya i no gat haenem mo hae posisen, mo hem i ded klosap 2,000 yia finis. Taem ol man oli traem skelem olsem wanem tijing blong hem i gat paoa long laef blong ol man long wol, plante oli agri se hem i man ya we i jenisim laef blong plante moa man i bitim eni narafala man.

Man ya hemia Jisas Kraes. ?Hem i tijim wanem? ?Mo tijing ya i save mekem wanem long laef blong yu?

[Futnot]