Oli “Stap Biaen Long Smol Sipsip Ya”

“Olgeta oli stap biaen long Smol Sipsip ya long evri ples we hem i pas long hem.”—REV. 14:4.

1. ?Ol tru disaepol we oli biaen long Jisas oli gat wanem tingting?

JISAS i prij tu yia haf, nao “hem i stap tijim ol man insaed long haos blong prea long Kapaneam.” Plante man oli harem se tok blong Jisas i strong tumas, “nao oli gowe long hem, oli no moa biaen long hem bakegen.” Taem Jisas i askem long ol twelef aposol blong hem sipos oli wantem gowe long hem, Saemon Pita i talem long hem se: “Masta. ?Bambae mifala i save go long hu? Yu nomo yu gat ol tok blong laef ya we i no save finis. Mo mifala i bilif finis long yu. Mifala i save finis we yu yu Tabu Man blong God.” (Jon 6:48, 59, 60, 66-69). Ol tru disaepol blong Jisas oli no lego hem. Afta we oli kasem tabu spirit, oli gohed blong folem Jisas mo ol tok we hem i talem.—Wok 16:7-10.

2. (a) ?Hu ya “slef ya we i stret mo waes,” no “man blong wok we i gat hed”? (b) ?Olsem wanem slef ya i pruvum gud finis se hem i stap“biaen long Smol Sipsip ya”?

² ?Yumi save talem wanem long saed blong ol tabu Kristin tede? Long profet tok long saed blong saen we ‘i soemaot we Jisas i stap mo we en blong fasin blong laef blong wol ya i kam,’ Jisas i tokbaot wan grup blong ol tabu Kristin we oli stap yet long wol, hemia “slef ya we i stret mo waes” no “man blong wok we i gat hed.” (Mat. 24:3, 45, NW; Luk 12:42) Olsem wan grup, slef ya i pruvum gud finis se hem i “stap biaen long Smol Sipsip ya long evri ples we hem i pas long hem.” (Ridim Revelesen 14:4, 5.) Ol memba blong grup ya oli holem laef blong olgeta i klin long saed blong wosip. Oli no folem bilif mo fasin blong ‘Bigfala Babilon,’ hemia olgeta giaman skul blong wol. (Rev. 17:5) Neva giaman tijing i “kamaot long maot blong olgeta,” mo i no gat wan samting nating long wol blong Setan we oli folem “blong mekem olgeta oli doti long fes blong God.” (Jon 15:19) Long fiuja, ol brata blong Jisas we oli stap yet long wol, bambae oli “biaen long” Smol Sipsip ya long heven.—Jon 13:36.

3. ?From wanem i impoten we yumi trastem grup ya we i olsem slef?

³ Jisas i putumap slef ya we i stret mo waes, blong i “lukaot long ol man blong hem,” hemia wanwan memba blong grup ya we i olsem slef, mo blong i “givim kakae long olgeta long stret taem blong hem.” Mo tu, hem i putumap grup ya we i olsem slef blong i “lukaot long olgeta samting blong hem.” (Mat. 24:45-47, NW) Wan long “olgeta samting blong hem,” hemia “bigfala kampani” blong ol “narafala sipsip” we i stap kam bigwan moa oltaem. (Rev. 7:9, NW; Jon 10:16) ?Olsem wanem? ?I stret we ol wanwan tabu Kristin mo “narafala sipsip” oli trastem slef ya we Jisas i putumap blong i lukaot long olgeta? Yes, i gat plante risen from wanem yumi save trastem slef ya. Tu impoten risen se: (1) Jeova i trastem grup ya we i olsem slef. (2) Jisas tu i trastem grup ya. Bambae yumi luk sam samting we oli pruvum se Jeova God mo Jisas Kraes tufala i trastem fulwan slef ya we i stret mo waes.

Jeova i Trastem Slef Ya

4. ?From wanem yumi save trastem ol kakae we i kamaot long Tok blong God we slef ya we i stret mo waes i givim?

⁴ Tingbaot wanem i mekem se slef ya we i stret mo waes i naf blong givim ol gudfala kakae we i kamaot long Tok blong God, long stret taem blong hem. Jeova i talem se: “Mi bambae mi tijim yu long rod we i stret blong yu yu folem.” Hem i gohed i se: “Bambae mi stap givim gudfala tingting long yu, mo mi stap lukaot gud long yu.” (Sam 32:8) Yes, Jeova i stap lidim grup ya we i olsem slef. Taswe, yumi save trastem ol save blong Baebol we slef ya i givim, ol samting we hem i luksave, mo ol advaes we hem i givim blong lidim yumi.

5. ?Wanem i pruvum se spirit blong God i stap givim paoa long grup ya we i olsem slef?

⁵ Jeova i blesem grup ya we i olsem slef wetem tabu spirit blong hem. Nating we yumi no save luk  spirit blong Jeova, be yumi save luk gudfala wok we ol man oli mekem from tabu spirit ya. Tingbaot wok we slef ya we i stret mo waes i mekem blong givim witnes long olgeta ples blong wol long saed blong Jeova God, Pikinini blong hem, mo Kingdom blong hem. Ol man blong wosipim Jeova oli stap talemaot gud nius blong Kingdom long bitim 230 kantri mo aelan. ?Olsem wanem? ?Hemia i no pruvum gud se spirit blong God i givim paoa long slef ya? (Ridim Ol Wok 1:8.) Blong rerem mo givim kakae long stret taem long ol man blong Jeova long ful wol, grup ya we i olsem slef i mas mekem plante impoten desisen. Taem slef ya i mekem mo folem ol desisen ya, ol rod blong hem oli soemaot lav, kwaet fasin, mo ol narafala frut blong tabu spirit.—Gal. 5:22, 23.

6, 7. ?Wanem i pruvum se Jeova i trastem gud grup ya we i olsem slef?

⁶ I gud we yumi tingbaot olsem wanem promes we Jeova i mekem wetem ol memba blong slef ya, i pruvum se hem i trastem gud grup ya. Aposol Pol i raetem se: “Taem pupu ya i krae, God bambae i mekem ol dedman oli laef bakegen, we bambae oli no moa save ded bakegen samtaem. Mo bambae hem i jenisim bodi blong yumi . . . Bodi ya we i blong ded, i mas jenis blong kam we bambae i no moa save ded samtaem, mo bodi ya we i blong lus, hem i mas jenis blong kam we bambae i no moa save lus bakegen samtaem.” (1 Kor. 15:52, 53) Ol tabu man ya we oli folem Kraes mo we oli stap tru long God, oli ded wetem bodi we i blong lus, be oli laef bakegen wetem wan laef we i hae moa long laef ya we i no save finis blong ol spirit man. God i givim wan laef long olgeta we i no save lus samtaem mo we i no gat samting i save spolem. Mo tu, bambae oli kasem bodi we i no blong ded mo i no save rotin samtaem, i olsem we i stap kam niuwan oltaem. Revelesen 4:4 i eksplenem se taem ol man ya oli laef bakegen, oli sidaon long ol bigfala jea blong king mo oli putum hat blong king we oli wokem long gol. Yes, ol tabu Kristin ya oli stap wet blong kasem paoa olsem ol king long heven. Be i gat sam moa samting yet we oli soem se Jeova i trastem ol tabu Kristin ya.

⁷ Revelesen 19:7, 8 i talem se: “Taem i kam finis blong Smol Sipsip blong [God] i mared. Mo woman ya we hem i promes blong mared long hem, hem i rere finis. Woman ya, God i givim ol gudfala klos long hem blong i werem, we oli klin gud, oli saen. (Ol gudfala klos ya blong hem, hemia ol gudfala fasin ya we ol man blong God oli mekem).” Jeova i jusum finis ol tabu Kristin blong oli kam olsem woman ya we bambae i mared long Pikinini blong hem. Bodi we i no save lus samtaem, laef we i no save finis long heven, ol king blong wan gavman, mo ‘Smol Sipsip i mared’—!olgeta blesing ya oli nambawan tumas! Ol samting ya oli pruvum gud se God i trastem ol tabu Kristin we oli  “stap biaen long Smol Sipsip ya long evri ples we hem i pas long hem.”

Jisas i Trastem Slef Ya

8. ?Olsem wanem Jisas i soem se hem i trastem gud ol tabu man blong hem?

⁸ ?Wanem i soemaot we Jisas i trastem gud ol tabu man blong hem? Long laswan naet blong Jisas long wol, hem i mekem wan promes long ol 11 aposol we oli stap tru long hem, i se: “Yufala ya, oltaem yufala i bin stap wetem mi long olgeta traem we mi mi bin kasem. Mo mi mi mekem wan kontrak wetem yufala, olsem we Papa blong mi i mekem wan kontrak wetem mi, from wan kingdom, blong bambae yufala i save kakae mo dring long tebel blong mi, long kingdom blong mi. Nao bambae yufala i sidaon long ol jea blong king, yufala i jajem ol twelef laen blong ol man Isrel.” (Luk 22:28-30, NW) Kontrak we Jisas i mekem wetem ol 11 aposol blong hem long taem ya, hem i mekem long olgeta 144,000 tabu Kristin. (Luk 12:32, NW; Rev. 5:9, 10, NW; 14:1) ?Sipos Jisas i no trastem olgeta, yu ting se hem i save mekem wan kontrak wetem olgeta blong bambae oli rul wetem hem long Kingdom? Nogat.

9. ?Wanem sam long “olgeta samting blong [Kraes]”?

⁹ Jisas Kraes i putumap slef ya we i stret mo waes blong i lukaot long “olgeta samting blong hem,” hemia olgeta samting blong Kingdom we oli stap long wol ya. (Mat. 24:47) Sam long ol samting ya, hemia ol faktri mo haos long hedkwota blong ol Witnes blong Jeova, mo long ol branj ofis long ol defdefren kantri, mo ol Haos Asembli mo ol Haos Kingdom long olgeta ples blong wol. Mo tu, hemia wok blong talemaot gud nius blong Kingdom mo pulum ol man oli kam disaepol. Sipos Jisas i no trastem slef ya, hem i no save putum ol sas samting blong hem long han blong slef ya, blong i lukaot long olgeta mo yusum.

10. ?Wanem i soemaot we Jisas Kraes i stap wetem ol man blong hem?

¹⁰ Smol taem afta we Jisas i laef bakegen mo bifo we hem i go long heven, hem i kamtru long ol disaepol we oli stap tru long hem, mo i mekem promes long olgeta se: “Yufala i mas save se mi bambae mi stap wetem yufala oltaem, gogo wol ya i finis.” (Mat. 28:20) ?Olsem wanem? ?Promes ya blong Jisas i kamtru? Fiftin yia bifo, i gat samwe 70,000 kongregesen blong ol Witnes blong Jeova long wol, be naoia i gat bitim 100,000. Namba ya i moa long 40 pesen antap long namba blong bifo. ?I gat hamas man we oli tekem baptaes? Long ol 15 yia ya, i gat klosap fo milian haf disaepol we oli tekem baptaes—samwe 800 man oli baptaes evri dei. Ol bigfala namba ya oli pruvum gud se Kraes i stap lidim ol tabu man blong hem, long ol miting blong kongregesen, mo long wok blong pulum ol man oli kam disaepol.

 Slef Ya i Stret Mo i Waes

11, 12. ?Olsem wanem slef ya i soemaot se hem i stret mo i waes?

¹¹ ?From we Jeova God mo Jisas Kraes, tufala i trastemgud slef ya we i stret mo waes, olsem wanem, yumi tu, yumi save trastem hem? Yes, slef ya i pruvum finis se hem i stret, taem i mekem gud olgeta wok we God i putum long han blong hem. Tingbaot ol 130 yia ya we slef ya i gohed nomo blong printim Wajtaoa magasin. Mo oltaem i gat ol miting, asembli, mo distrik asembli blong ol Witnes blong Jeova we oli bildimap bilif blong yumi.

¹² Slef ya we i stret, hem i waes tu, from we hem i neva hareap blong mekem wan samting folem tingting blong hem nomo, hem i wet long Jeova fastaem. Be taem hem i luksave klia tingting blong God, hem i no slo tu blong mekem samting we God i wantem. Tingbaot olsem wanem slef ya i defren long ol lida blong ol giaman skul. Taem ol man we oli stap tingbaot olgeta nomo mo oli no laekem God oli folem ol rabis fasin blong wol, ol lida blong ol giaman skul oli no tok agensem olgeta. Sam long ol lida ya oli talemaot klia se ol fasin ya oli oraet nomo. Defren olgeta, grup ya we i olsem slef i givim woning long yumi, blong yumi no foldaon long ol trap blong rabis wol blong Setan. Slef ya i givim ol waes advaes mo ol woning long stret taem, from we Jeova God mo Jisas Kraes tufala i blesem wok blong hem. Taswe i stret we yumi trastemgud slef ya. ?Olsem wanem yumi save soemaot se yumi trastem slef ya we i stret mo waes?

Oli “Go Wetem” Ol Tabu Man Taem Oli Biaen Long Smol Sipsip

13. ?Folem profet tok blong Sekaraea, olsem wanem yumi soem se yumi trastem slef ya we i stret mo waes?

¹³ Buk blong Sekaraea long Baebol i stap tokbaot “ten man” we oli kam luk “wan man Jiu” mo oli talem se: “Bambae mifala i go wetem yufala.” (Ridim Sekaraea 8:23. *) Vas ya i tokbaot “wan man Jiu” se “yufala,” we i olsem wan grup blong man. Long taem blong yumi, grup ya hemia smol namba blong ol tabu Kristin we oli stap yet long wol, we oli haf blong “Isrel blong God.” (Gal. 6:16, NW) “Ten man we oli kamaot long olgeta lanwis blong ol neson,” i minim bigfala kampani blong ol narafala sipsip. Olsem ol tabu Kristin we oli biaen long Jisas long evri ples we hem i pas long hem, bigfala kampani i “go wetem” no i joen wetem slef ya we i stret mo waes. Olgeta we oli blong bigfala kampani, oli neva mas sem blong soemaot se oli ol fren blong olgeta we ‘God i singaot olgeta’ blong oli go stap long heven. (Hib. 3:1) Jisas i no sem blong singaot ol tabu man ya se ol “brata” blong hem.—Hib. 2:11.

14. ?Olsem wanem yumi save givhan long ol brata blong Kraes?

¹⁴ Jisas Kraes i talem se sipos yumi givhan long ol brata blong hem, yumi stap mekem i gud long Jisas stret. (Ridim Matiu 25:40.) ?Olgeta we oli wantem laef long wol, oli mas mekem wanem blong givhan long ol tabu brata blong Kraes? Bigfala samting se oli mas halpem olgeta blong talemaot gud nius blong Kingdom. (Mat. 24:14, NW; Jon 14:12) Long ol yia we oli pas, namba blong ol tabu man we oli stap long wol i stap godaon, be namba blong ol man long bigfala  kampani i stap go antap. Taem olgeta we oli gat tingting blong laef long wol oli joen long wok blong prij, mo sipos oli naf blong wok fultaem olsem ol evanjelis, oli stap givhan long ol tabu brata ya blong mekem wok ya blong pulum ol man oli kam disaepol. (Mat. 28:19, 20) Mo tu, oli gat janis blong givim presen mane long defdefren rod blong sapotem wok ya.

15. ?Ol Kristin wanwan oli mas harem olsem wanem taem oli kasem ol kakae long slef ya long stret taem blong hem, mo taem slef ya i mekem ol desisen long saed blong ogenaesesen?

¹⁵ ?Ol Kristin wanwan oli gat wanem tingting long kol kakae, olsem ol buk we oli stanap long Baebol mo ol Kristin miting mo asembli, we slef ya we i stret mo waes i givim long stret taem blong hem? ?Olsem wanem? ?Yumi glad blong tekem ol kakae ya mo mekem ol samting we yumi lanem oli wok long laef blong yumi? ?Yumi harem olsem wanem long ol desisen blong slef ya we i stret mo waes, long saed blong ogenaesesen blong Jeova? Fasin blong yumi blong wantem obei long slef ya, i soemaot bilif we yumi gat long rod ya we Jeova i yusum blong lidim yumi.—Jem. 3:17.

16. ?From wanem ol Kristin oli mas lesin long ol brata blong Jisas?

¹⁶ Jisas i talem se: “Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi.” (Jon 10:27) Hemia i tru long saed blong ol tabu Kristin. ?Olsem wanem long olgeta we oli “go wetem” ol tabu Kristin ya? Olgeta ya oli mas lesin long Jisas. Oli mas lesin long ol brata blong hem tu. God i putum bigfala wok ya blong lidim mo lukaot long ol man blong hem long han blong ol tabu Kristin ya. ?Yumi save mekem wanem blong soem se yumi lesin long voes blong ol brata blong Kraes?

17. ?Yumi mas mekem wanem blong soem se yumi stap lesin long grup ya we i olsem slef?

¹⁷ Slef ya we i stret mo waes i putumap Hed Kampani, blong i lidim mo i lukaot long wok blong talemaot gud nius blong Kingdom tede long olgeta ples blong wol. Ol memba blong Hed Kampani, oli ol tabu Kristin elda we oli mekem wok blong God plante yia finis. Olgeta ya nao we Baebol i tokbaot se ‘oli stap lidim yumi.’ (Hib. 13:7) Ol elda ya we tabu spirit i makemaot olgeta, oli “wok strong long ol wok ya blong Masta blong yumi,” blong lukaot long moa long 7,000,000 man we oli stap talemaot gud nius blong Kingdom long bitim 100,000 kongregesen. (1 Kor. 15:58) Rod we yumi folem blong lesin long grup ya we i olsem slef, hemia blong yumi wok gud wetem Hed Kampani.

Olgeta We Oli Lesin Long Grup Ya We i Olsem Slef Oli Kasem Blesing

18, 19. (a) ?Wanem blesing blong olgeta we oli lesin long slef ya we i stret mo waes? (b) ?Yumi mas gat strong tingting blong mekem wanem?

¹⁸ Long olgeta yia we slef ya we i stret mo waes i mekem wok blong hem, hem i bin “tijim [plante] man blong mekem ol stret fasin.” (Dan. 12:3) Ol man ya, hemia olgeta we oli wantem stap laef taem rabis wol ya i lus. !Hemia bambae i wan nambawan blesing blong olgeta we oli holem stret fasin long fes blong God!

¹⁹ Long fiuja, ‘taon ya we i tabu, we hemia niufala Jerusalem [ol 144,000 man], bambae i aot long heven i kam, olsem woman we bambae i mared, we oli flasemgud hem blong i go mitim man blong hem.’ ?Long taem ya, olgeta we oli bin lesin long voes blong slef ya bambae oli kasem wanem blesing? Baebol i talem se: “God bambae i kampani wetem olgeta. . . . Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Rev. 21:2-4) Yes, i gat plante risen from wanem yumi mas lesin long Kraes mo ol tabu brata blong hem we hem i trastem gud olgeta.

[Futnot]

?Yu Yu Lanem Wanem?

• ?Wanem i soemaot se Jeova i trastem slef ya we i stret mo waes?

• ?Wanem i soemaot se Jisas i trastemgud slef ya we i stret mo waes?

• ?From wanem i stret we yumi trastem man blong wok ya we i gat hed?

• ?Olsem wanem yumi soem se yumi trastem slef ya we i stret mo waes?

[Kwestin]

[Tok blong pija long pej 25]

?Yu yu save hu olgeta we Jeova i jusum blong bambae oli kam woman blong Pikinini blong hem?

[Tok blong pija long pej 26]

Jisas Kraes i putumap slef ya we i stret mo waes, blong i lukaot long “olgeta samting blong hem”

[Tok blong pija long pej 27]

Taem yumi joen long wok ya blong talemaot gud nius, yumi givhan long ol tabu Kristin