Kwestin Blong Olgeta We Oli Ridim Magasin Ya

?From Wanem God i Ansa Long Sam Prea Nomo?

God i glad taem man i wantem toktok wetem hem. Hem i olsem wan papa we i gat lav mo we i glad taem ol pikinini blong hem oli kam blong tokbaot eni samting wetem hem. Yes, Jeova i glad taem yumi prea i go long hem. Be long wan narafala fasin tu, Jeova i olsem papa we i waes. Hem i no givim evri samting we yumi askem, mo hem i gat gudfala risen blong mekem olsem. ?Olsem wanem? ?Ol risen ya blong God oli haed, no i gat sam tok long Baebol we i save givhan long yumi blong kasem save from wanem God i ansa long sam prea nomo?

Aposol Jon i eksplenem se: “Taem yumi kam long fes blong God long prea, yumi bilif strong se sipos yumi askem samting long hem we i stret long tingting blong hem, hem bambae i harem prea blong yumi.” (1 Jon 5:14) Ol samting we yumi askem long prea oli mas laenap wetem tingting blong God. Samfala oli prea from ol samting we oli no laenap nating wetem tingting blong God—olsem blong winim lotri, no blong oli win taem oli plei laki. Sam narafala oli prea wetem wan tingting we i no stret. Disaepol Jemes i givim woning long ol man we oli stap mekem olsem se: “Taem yufala i askem long God, yufala i no kasem from we tingting blong yufala i no stret. Yufala i stap askem ol samting ya long God, blong mekem yufala nomo i harem gud.”—Jemes 4:3.

Traem tingbaot tufala tim we i plei futbol, nao tugeta saed i prea long God blong oli win. Taem tufala tim ya i prea, i olsem se wan i prea agensem narawan. Taswe i stret nomo we God i no ansa long wan prea olsem. Samting ya i sem mak long wan faet we tufala saed i prea blong winim faet ya.

Ol man we oli no wantem folem loa blong God long laef blong olgeta, oli no mas ting se God bambae i ansa long prea blong olgeta. I gat wan taem we Jeova i bin talem long ol man we oli gat tu fes, se: “Nating we yufala i stap mekem plante prea, be bambae mi no save lesin, from we han blong yufala i fulap long blad blong man.” (Aesea 1:15) Baebol i talem se: “Sipos yu no obei long ol loa blong Hae God, hem bambae i no save lesin nating long ol prea blong yu, bambae i tanem baksaed long yu.”—Ol Proveb 28:9.

Defren olgeta, Jeova i stap lesin long ol man blong hem we oli prea long fulhat blong olgeta. Ol man ya oli traehad oltaem blong mekem samting we i stret folem tingting blong God. ?Hemia i minim se, oltaem God bambae i mekem samting we oli askem long hem? Nogat. Tingbaot sam eksampol long Baebol.

Moses i frengud wetem God, be hem tu i mas askem samting we i “stret long tingting blong [God].” Moses i askem wan samting we i no laenap nating wetem tingting blong God, hemia blong go long kantri blong Kenan: “Plis yu letem mi mi gokros long Jodan Reva, blong mi luk ol gudfala graon ya.” Be bifo finis hem i mekem sin, nao God i talem long hem se bambae hem i no save gokros nating. Taswe Jeova i no mekem samting we Moses i askem, be i talem nomo long Moses se: “!Yu stap kwaet! !Yu no talem ol tok ya bakegen!”—Dutronome 3:25, 26; 32:51.

I gat wan trabol we i olsem “nil blong aranis” we i stap stikim aposol Pol, mo hem i prea blong God i karemaot trabol ya. (2 Korin 12:7) Trabol we Pol i kasem, maet hem i wan problem blong ae, no ating i minim ol man we oli agensem hem mo ‘olgeta we oli talem se oli fren blong hem, be oli giaman nomo.’ (2 Korin 11:26; Galesia 4:14, 15) Pol i raetem se: “Tri taem mi askem long Masta blong yumi, blong hem i tekemaot.” Be God i save se sipos Pol i gohed blong prij nating se “nil blong aranis” i stap gohed blong stikim hem, samting ya bambae i soemaot paoa blong God i klia nomo, mo bambae i soemaot se Pol i trastem God fulwan. Taswe God i no mekem olsem we Pol i askem, be hem i talem long Pol se: “Taem we yu yu no gat paoa, paoa blong mi i save kam strong moa long yu.”—2 Korin 12:8, 9.

Yes, yumi no save wanem samting we i gud long yumi, be God i savegud. Taem yumi prea long God, hem i mekem samting ya nomo we i save se i gud long yumi. Oltaem Jeova i ansa long prea we i laenap wetem tingting blong hem we i stap long Baebol.