?Eksampol Blong Meri i Save Tijim Wanem Long Yumi?

?Olsem wanem? ?Samtaem yu yu harem olsem se yu no moa gat paoa taem yu kasem wan traem we i mekem yu yu sek, no yu kasem wan wok we yu no bin tingbaot blong mekem? ?Yu yu harem se yu taed tumas from we evri dei yu mas traehad blong kasem ol samting we yu nidim blong laef? Maet yu yu wan long ol milian man ya we tingting blong olgeta i fasfas mo oli fraet from we oli mas lego kantri blong olgeta mo go laef long defren kantri olsem ol refuji. ?Mo hu long yumi i no harem yet bigfala soasore mo i harem se laef blong hem i no moa gat mining, afta we hem i lusum wan gudfala fren mo famle long ded?

?YU YU save se Meri, mama blong Jisas, i bin fesem olgeta trabol ya? !Mo hem i naf blong winim olgeta evriwan! ?Eksampol blong hem i save tijim yumi long wanem samting?

I tru se ol man long olgeta ples long wol oli save long Meri. Yumi no sapraes long samting ya from we hem i mekem wan wok we i spesel tumas, blong mekem stamba tingting blong God i kamtru. Mo tu, plante milian man oli wosip long Meri. Long Katolik Jos, ol man oli wosipim mo leftemap Meri se hem i Mama ya we oli laekem hem tumas, mo se hem i soem wan gudfala eksampol blong bilif, hop, mo long fasin blong mekem i gud long ol narafala. Plante man oli kasem tijing ya se Meri i toktok long God long bihaf blong ol man.

?Wanem tingting blong yu long saed blong mama blong Jisas? Impoten moa ?wanem tingting we God i gat long saed blong hem?

Wan Spesel Wok

Meri, we papa blong hem Heli, i kamaot long laen blong Juda long neson blong Isrel. Faswan taem we Baebol i tokbaot Meri, hemia long taem we wan narakaen samting i kamaot. Wan enjel i go luk Meri mo i talem se: “Halo Meri. Hae God i mekem i gud tumas long yu, mo hem i stap wetem yu.” Meri i fraet mo hem i “stap traem tingbaot, from wanem enjel i toktok long hem olsem.” Taswe, enjel i talem long hem se God i jusumaot hem blong i mekem wan nambawan wok we i impoten tumas tu, hemia se bambae hem i gat bel, mo i save bonem Pikinini blong God, mo i mas lukaot long pikinini ya.—Luk 1:26-33.

!Hemia wan impoten wok we yangfala woman ya we i no mared yet, i mas mekem! ?Meri i mekem wanem? Maet hem i stap tingting se hu bambae i bilivim stori blong hem. Sipos hem i gat bel, ?maet man we bambae hem i mared wetem, Josef, i no moa lavem hem? ?Maet samting ya bambae i karem sem i kam long hem? (Dutronome 22:20-24) Nomata long ol kwestin ya, tingting blong Meri i no hafhaf, hem i kwik blong akseptem impoten wok ya.

Meri i gat strong bilif, mo hemia i givhan long hem blong obei long samting we God blong hem, Jeova, i wantem. Hem i bilif strong se Jeova bambae i lukaot long hem. Taswe, hem i talem se: “Mi mi gel blong wok  nomo blong Hae God. Mi wantem blong i kamtru long mi olsem we yu yu talem.” Meri i tinghae long bigfala blesing ya blong leftemap nem blong God, taswe hem i rere blong fesem ol trabol we oli save kamaot biaen.—Luk 1:38.

Taem Meri i talem long Josef se hem i gat bel, Josef i wantem brekem promes blong tufala. I sua se long taem ya, tufala tugeta i wari tumas mo tufala i harem nogud. Baebol i no talem se tufala i harem nogud olsem blong hamas dei, be i sua se tufala i glad tumas taem enjel blong Jeova i kamtru long Josef. Enjel ya we God i sanem i kam, i eksplenem long Josef from wanem Meri i gat bel mo i talem long hem blong i tekem Meri i go long haos blong hem, blong i kam waef blong hem.—Matiu 1:19-24.

Ol Hadtaem

Long taem blong yumi, fulap mama we oli gat bel oli spenem plante manis blong rere from taem ya we bambae bebi blong olgeta i bon, mo maet Meri tu i mekem olsem. Hemia bambae i fasbon pikinini blong hem. Be sam samting oli hapen we i mekem se ol plan blong hem oli fasfas. Sisa Ogastas i mekem wan sensas, mo i putum wan loa se olgeta man oli mas gobak long stret ples we oli bon long hem, blong ol man blong hem oli save tekem nem blong olgeta. Ale, Josef i tekem Meri, we i gat naen manis blong hem, mo tufala i mekem wan trip blong 150 kilometa i go long Betlehem. !Ating Meri i mekem trip ya we hem i sidaon long baksaed blong wan dongki nomo! Betlehem i fulap long ol man we oli kam blong rejista. Mo Meri i nidim wan rum blong hem i save bonem bebi blong hem long hem, be tufala i faenem wan ples nomo we tufala i save stap long hem, hemia wan haos blong ol anamol. I sua se i no isi long Meri blong bonem bebi blong hem long wan haos olsem. I klia se hem i mas harem i no stret mo i fraet.

Long ol hadtaem ya long laef blong Meri, i sua se hem i mas talemaot olgeta samting we oli stap long hat blong hem long Jeova, from we hem i trastem se Jeova bambae i lukaot long hem mo bebi blong hem. Biaen, sam man blong lukaot long sipsip oli kam from we oli wantem tumas blong luk bebi ya. Oli talem se ol enjel oli singaot pikinini ya se ‘Mesaea ya i Masta we bambae i sevem yumi.’ Biaen, yumi ridim se: “Meri, hem i no fogetem olgeta samting ya, hem i stap tingbaot olgeta oltaem nomo.” Hem i tingting dip long ol tok ya mo samting ya i mekem hem i kam strong.—Luk 2:11, 16-19.

?Olsem wanem long yumi? Sam samtaem yumi save harem nogud bitim mak. Mo tu, Baebol i soem se “samting we yumi no tingbaot” i save kasem yumi evriwan, ale yumi save fesem ol defdefren hadtaem mo traem long laef long yumi. (Prija 9:11, NW) Sipos samting ya i hapen, ?yumi tingting nogud long God, mo talem se hemia i fol blong hem? I moagud we yumi mekem olsem Meri mo yumi kam klosap moa long God taem yumi lanem Tok blong hem Baebol, mo biaen yumi tingting dip long samting we yumi lanem. Sipos yumi mekem olsem, i sua se hemia bambae i givhan long yumi blong stanap strong longtaem long ol traem.

Hem i Pua Mo i Laef Long Narafala Kantri

Meri i fesem ol narafala hadtaem tu. Hem i pua mo wan taem, hem i mas lego kwiktaem ples blong hem. ?Olsem wanem? ?Yu yu fesem finis ol traem olsem? Wan ripot i talem se: “Long olgeta man we oli laef long wol, stret haf blong olgeta, hemia klosap tri bilian man, oli gat samwe 100 vatu nomo blong laef evri dei.” Mo plante milian moa oli traehad blong kasem ol samting we oli nidim blong laef, nating se oli laef long ol kantri we oli talem se oli rij. ?Olsem wanem long yu? ?Yu yu harem se traehad we yu mas mekem evri dei blong kasem kakae, klos, mo haos blong famle i mekem se yu taed tumas, mo samtaem yu taed bitim mak?

Baebol i soemaot se Josef mo Meri tufala i pua. ?Olsem wanem yumi save samting ya? Ol Gospel blong Matiu, Mak, Luk, mo Jon, oli talem se 40 dei afta we Meri i bonem Jisas, hem mo Josef tufala i go long haos tempol blong givim stret sakrefaes i go long God, olsem we Loa i talem, hemia  “tu sotleg, no tu smol nawimba.” * (Luk 2:22-24) Sakrefaes ya i blong olgeta ya nomo we oli pua tumas mo we oli no naf blong givim wan smol man sipsip. Taswe, i luk olsem se Josef mo Meri tufala i rili traehad blong kasem ol samting we tufala i nidim long laef. Nating se i olsem, tufala i nafgud blong mekem famle blong tufala i stapgud mo i gat lav. I sua se tufala i putum ol samting we oli joen long wosip blong God, oli stap long fasples long laef blong tufala.—Dutronome 6:6, 7.

I no longtaem afta we Jisas i bon, wan samting i hapen we i mekem se laef blong Meri i jenis bakegen. Wan enjel i talem long Josef blong i tekem famle blong hem mo ronwe i go long Ijip. (Matiu 2:13-15) Hemia namba tu taem we Meri i mas lego ples blong hem, be naoia hem i mas go long wan defren kantri. I gat plante man Jiu we oli laef long Ijip, taswe maet Meri mo Josef tufala i bin stap wetem ol man ples blong tufala. Nating se i olsem, i no isi blong laef long wan defren kantri, mo plante samting oli save mekem tingting blong man i fasfas. ?Olsem wanem long yu? ?Yu mo famle blong yu tu i joen wetem plante milian man ya we oli bin lego kantri blong olgeta, maet from we oli tingbaot ol pikinini blong olgeta, no oli ronwe from we i gat denja? Sipos yes, bambae yu yu kasem save gud long sam hadtaem we maet Meri i bin fesem long Ijip.

Wan Gudfala Waef Mo Mama

Ol Gospel oli tokbaot Meri nomo taem hem i bonem Jisas mo taem Jisas i smol, be afta long hemia, oli no talem plante samting long saed blong hem. Nating se i olsem, yumi save se Josef mo Meri tufala i gat sikis pikinini bakegen. Maet samting ya i mekem yu yu sapraes. Be tingbaot wanem we ol Gospel oli talem.

Josef i gat bigfala respek long spesel ona ya we Meri i gat blong bonem Pikinini blong God. Taswe, hem i no slip wetem Meri gogo kasem we Meri i bonem Jisas. Matiu 1:25 i talem se Josef “i no slip wetem hem gogo Meri i bonem pikinini ya blong hem.” Long vas ya, wod ya “gogo” i soem se afta we Jisas i bon, Josef mo Meri tufala i slip tugeta olsem ol hasban mo waef oli mekem. Stori blong ol Gospel i talem se from samting ya, Meri i gat sam pikinini wetem Josef, ol boe mo ol gel. Jemes, Josef, Saemon, mo Judas oli ol haf brata blong Jisas. I luk olsem se Meri i gat tu gel blong hem. (Matiu 13:55, 56) Olgeta pikinini ya oli blong Josef mo Meri. *

Meri i wan woman we i tinghae tumas long fasin fren blong hem wetem God. Loa blong Moses i no talem se ol woman oli mas joen long lafet blong Pasova, be nating se i olsem, Meri i joen oltaem wetem Josef blong wokbaot i go long Jerusalem blong mekem lafet ya. (Luk 2:41) !Evri yia, famle ya we i stap kam bigwan moa, i mas wokbaot klosap 300 kilometa blong go mo kambak! Be i sua se ol trip ya oli ol spesel taem, we famle i glad blong mekem tugeta.

Plante woman tede oli folem gudfala eksampol blong Meri. Oli no tingbaot olgeta nomo, be oli wokhad blong mekem ol wok we Baebol i talem se oli mas mekem. !Plante taem ol gudfala waef ya oli soem longfala tingting, oli stanap strong longtaem, mo oli gat tingting daon! Taem oli tingting gud long fasin blong Meri, hemia i givhan long olgeta blong oli putum ol samting we oli joen wetem wosip blong God, oli stap long fasples long laef blong olgeta, mo ol samting we olgeta nomo oli wantem blong mekem laef blong olgeta i isi mo blong oli haremgud, i kam biaen. Oli save, olsem we Meri tu i bin save, se taem oli joen wetem hasban mo ol pikinini blong olgeta blong wosipim God, famle blong olgeta i joengud mo i strong.

 Wan taem, Meri mo Josef oli stap kambak long lafet blong Pasova long Jerusalem, mo maet tufala i gat sam pikinini finis we oli folem tufala long taem ya, nao tufala i luksave se Jisas, we i gat 12 yia blong hem, i no stap wetem olgeta. !Traem tingbaot olsem wanem Meri i wari taem hem i lukaotem boe blong hem gogo tri dei i pas! Taem hem mo Josef tufala i faenem Jisas long haos blong God, Jisas i talem se: “?Yutufala i no save se mi mi mas stap long haos blong Papa blong mi?” Long stori ya bakegen, Baebol i talem se Meri i “stap tingbaot ol samting ya.” Hemia wan narafala samting we i soemaot se Meri i tinghevi long tingting we God i gat long saed blong ol samting. Hem i tingting dip mo i tingting gud long evri samting we oli hapen long Jisas. Plante yia biaen, Meri i tingbaot yet ol samting we oli hapen long taem ya, mo ol narafala samting we oli hapen long Jisas taem hem i wan pikinini. Mo i klia se hem i tokbaot olgeta samting ya long ol man we oli raetem ol Gospel.—Luk 2:41-52.

Hem i Safa Mo i Lusum Wan Pikinini, Be Hem i Stanap Strong

?Wanem i hapen long Josef, we i papa blong Jisas long wol ya? Laswan taem we ol Gospel oli tokbaot hem, hemia taem Jisas i gat 12 yia blong hem, be afta oli no moa tokbaot hem bakegen. Samfala oli ting se hemia from we Josef i ded sam yia bifo we Jisas i statem wok blong prij. * Nomata  se i olsem wanem, be i luk olsem se Meri i wan wido finis taem Jisas i finisim wok blong hem blong prij long wol ya. Bifo we Jisas i ded, hem i givim mama blong hem i go long han blong aposol Jon, blong i lukaot long hem. (Jon 19:26, 27) Jisas i no save mekem olsem sipos Josef i laef yet.

!Plante samting i bin hapen long laef blong Josef mo Meri! Ol enjel oli kam luk tufala, tufala i ronwe long wan man we rul blong hem i strong tumas, plante taem tufala i muv i go long narafala ples, mo tufala i lukaot long plante pikinini! Tingbaot hamas naet we tufala i mas sidaon tugeta mo tokbaot Jisas, asaskem se wanem samting bambae hem i fesem long fiuja, mo wari sipos tufala i trenem mo rerem hem long rod we i stret, no nogat. Ale, wantaem nomo Meri i stap hem wan.

?Olsem wanem long yu? ?Hasban no waef blong yu i ded? ?Samting ya i mekem yu yu harem nogud yet nating se plante yia oli pas finis, mo yu harem olsem se laef blong yu i no gat mining? I sua se bilif blong Meri mo save ya se ol dedman bambae oli laef bakegen, i givhan long hem blong harem gud bakegen long tingting blong hem. * (Jon 5:28, 29) Be, ol gudfala tingting ya oli no mekem se ol problem blong Meri oli finis. Olsem plante mama tede we oli stap olgeta nomo, Meri i fesem traem ya tu blong lukaot long ol pikinini blong hem, hem wan nomo.

I stret nomo blong talem se taem Josef i ded, Jisas nao i tekem ples blong hem blong wok blong kasem ol samting we famle i nidim long laef. Taem ol brata blong Jisas oli kam bigwan, olgeta tu oli naf blong mekem ol wok we oli mas mekem insaed long famle. Taem Jisas i gat “samwe long toti yia blong hem,” hem i lego hom blong hem mo i stat blong prij. (Luk 3:23) Bighaf blong ol papa mama oli haremgud mo long semtaem oli sore, taem boe no gel blong olgeta we i bigman finis, i lego olgeta blong go laef hem wan. Taem oli lukaot long ol pikinini blong olgeta, oli bin spenem plante taem, mekem bigfala traehad, mo soem plante filing long olgeta, ale taem ol pikinini ya oli lego olgeta, ol papa mama ya oli harem olsem se oli lusum wan bigfala samting. ?Olsem wanem long yu? ?Yu yu gat sam boe no gel we oli lego yu finis blong traem kasem mak we oli wantem kasem long laef blong olgeta? ?Yu yu praod from olgeta, be long semtaem, yu wantem se oli  stap klosap long yu? Sipos yu filim olsem, yu save tingbaot filing blong Meri taem Jisas i lego hom blong hem.

Ol Traem We Hem i Sek Long Olgeta

Meri i kasem wan moa traem bakegen, mo ating Meri i neva tingbaot se bambae hem i kasem wan traem olsem. Taem Jisas i stap prij, plante man oli biaen long hem, be ol stret brata blong hem nogat. Baebol i talem se: “Ol brata ya blong hem tu oli no bilif long hem.” (Jon 7:5) I sua se Meri i tokbaot long olgeta, toktok we enjel i bin talem long hem, se Jisas i “Pikinini blong God.” (Luk 1:35) Be yet, Jemes, Josef, Saemon, mo Judas oli luk Jisas olsem bigfala brata blong olgeta nomo. Samting ya i mekem se famle blong Meri i no gat wan tingting long saed blong wosip.

?Olsem wanem? ?Hemia i mekem tingting blong Meri i foldaon nao hem i no moa traehad blong givhan long ol pikinini blong hem blong oli jenis? !Nogat! Long wan taem we Jisas i stap prij long Galili, hem i go kakae long wan haos mo bigfala hip blong man oli hivap blong lesin long hem. ?Mo hu i stap lukaotem hem afsaed? Hemia Meri mo ol brata blong Jisas. Taswe, taem Jisas i stap prij klosap long haos blong famle blong hem, Meri i folem hem mo i klia se hem i tekem ol narafala pikinini blong hem tu wetem hem. Maet hem i tingting se bambae oli jenisim tingting blong olgeta long saed blong Jisas.—Matiu 12:46, 47.

Maet yu tu yu stap traehad blong folem Jisas. Be yu fesem traem ya we ol narafala memba blong famle blong yu oli no wantem mekem olsem yu. !Yu no mas letem tingting blong yu i foldaon mo yu no mas stop blong givhan long olgeta! Plante papa mo mama oli mekem olsem Meri. Blong plante yia, oli gat longfala tingting mo oli gohed blong leftemap tingting blong famle blong olgeta gogo kasem we oli jenisim fasin blong olgeta. Fasin blong stanap strong longtaem olsem i sas tumas long ae blong God, nomata sipos ol narafala oli jenisim tingting blong olgeta, no nogat.—1 Pita 3:1, 2.

Traem Ya We i Had Moa Long Ol Narafala Traem

I sua se laswan traem we Baebol i tokbaot se Meri i kasem, i mekem hem i harem nogud moa i bitim ol narafala traem. Afta we ol man ples blong Jisas oli tanem baksaed long hem, Meri i wajem boe blong hem we hem i laekem tumas, i harem nogud bitim mak gogo i ded. Plante papa mama oli tokbaot se taem wan pikinini long famle i ded, nomata sipos pikinini ya i yangfala yet no i bigman finis, oli harem olsem se oli “lusum evri samting we oli gat,” mo se “ded ya i mekem oli  harem nogud bitim mak.” !Stret olsem profet tok i bin talem plante yia bifo, Meri i harem olsem se wan naef i stikim hem!—Luk 2:34, 35.

?Olsem wanem? ?Meri i letem laswan traem ya i spolemgud ol filing blong hem mo i slakem bilif blong hem long Jeova? Nogat. Nekis taem we Baebol i tokbaot Meri bakegen, hemia taem we hem i stap wetem ol disaepol blong Jisas, hem i “stap joen oltaem blong prea” wetem olgeta. Mo i no hem wan nomo. Long taem ya, ol narafala boe blong Meri oli stat blong bilif long bigfala brata blong olgeta, ale olgeta tu oli stap wetem Meri. !Hemia i mas mekem Meri i glad tumas! *—Ol Wok 1:14.

Meri i wan woman we i fasgud long God, i wan gudfala waef mo mama, mo hemia i mekem se laef blong hem i fulwan mo hem i haremgud. Taem hem i stap mekem wok blong God, hem i luk plante samting we oli mekem hem i glad. Hem i winim plante traem mo trabol. Taem yumi fesem ol traem we yumi sek long olgeta no taem yumi wari from ol problem long famle, yumi save lanem plante samting long gudfala eksampol blong hem blong stanap strong longtaem.—Hibrus 10:36.

?Be wanem samting yumi save talem long saed blong Meri se hem i wan spesel woman we yumi mas mekem wosip long hem? ?Spesel wok ya we Baebol i talem se Meri i mekem, i wan risen blong yumi wosip long hem?

[Ol futnot]

[Bokis blong pija long pej 6]

?Jisas i Gat Ol Brata Mo Sista Blong Hem?

Yes, hem i gat ol brata sista. Plante taem ol Gospel oli talemaot samting ya klia nomo, be sam man we oli stadi long ol tijing blong jos, oli mekem plante toktok blong traem soemaot se hemia i no tru. (Matiu 12:46, 47; 13:54-56; Mak 6:3) Be sam man we oli stadi long saed blong Baebol, oli tokbaot tu samting long saed blong ol tijing we oli soemaot se Meri i no bonem sam narafala pikinini bakegen, afta long Jisas. Wan long tufala samting ya, hemia se i gat wan risen from wanem oli stanemap ol tijing ya. Risen ya se oli wantem sapotem wan bilif we bambae i kamaot plante yia biaen, mo we jos bambae i tijim. Bilif ya hemia se Meri i neva slip wetem man samtaem long ful laef blong hem. Namba tu samting, hemia se ol tijing ya oli no gat pruf blong olgeta.

Tingbaot wan long ol tijing ya we i talem se “ol brata” ya we Baebol i talem se oli brata blong Jisas, oli rili ol haf brata blong hem, from we oli ol boe we Josef i bin gat wetem faswan waef blong hem, bifo we hem i mared long Meri. I no gat wan samting we i save pruvum se tijing ya i tru. From we sipos i tru, hemia i soemaot se Jisas i no fasbon we i kamaot long laen blong Deved, taswe bambae hem i no gat raet blong rul long Kingdom.—2 Samuel 7:12, 13.

Wan narafala tijing se, ol brata ya oli rili ol kasen brata blong Jisas nomo. Be Grik haf blong Baebol i gat ol stret wod blong talem “brata,” “kasen” mo “famle.” Taswe, tija ya Frank E. Gaebelein i talem se i hadwok blong bilivim ol tijing ya. Hem i talem bakegen se: “I isi blong kasem save se hu ya ‘ol brata’ ya, . . . from we Baebol i talem se oli ol boe blong Meri mo Josef, taswe oli ol brata blong Jisas, from oli gat wan mama nomo.”

[Bokis blong pija long pej 7]

Hem i No Fraet Blong Jenisim Jos Blong Hem

Taem Meri i bon, famle blong hem i stap joen long skul blong ol man Jiu, mo hem tu i folem jos ya. Hem i joen oltaem long haos prea blong ol man Jiu we oli kolem Sinagog, mo oltaem hem i go long haos prea blong Jerusalem. Be taem hem i kasem save moa long ol stamba tingting blong God, hem i luksave se God i no moa glad long ol kastom we ol bubu blong hem oli stap folem. Ol lida blong skul blong ol man Jiu oli holem Pikinini blong hem we i Mesaea, mo oli kilim hem i ded. Be bifo we samting ya i hapen, Jisas i talem long olgeta i se: “Yufala i luk. God i lego yufala finis, ples blong yufala i emti i stap.” (Matiu 23:38) God i tekemaot blesing blong hem long jos ya we Meri i gruap long hem.—Galesia 2:15, 16.

Taem Kristin kongregesen i stat, maet Meri i gat samwe 50 yia olsem. ?Hem i mekem wanem? ?Hem i tingting se from we hem i bon long skul blong ol man Jiu, bambae hem i gohed nomo blong folem kastom blong ol bubu blong hem? ?Hem i talem se hem i olfala tumas blong jenisim jos blong hem? !Nogat! Meri i kasem save se naoia blesing blong God i stap wetem Kristin kongregesen, taswe hem i gat bilif mo i no fraet blong jenisim jos blong hem.

[Tok blong pija long pej 5]

Ronwe i go long Ijip olsem ol refuji

[Tok blong pija long pej 8]

Wan rabis traem we wan mama i gotru long hem