Givhan Long Ol Sipsip We Oli Lus
Givhan Long Ol Sipsip We Oli Lus
“Yufala i kam joen wetem mi, yufala i glad wetem mi, from we mi mi faenem sipsip ya blong mi we i lus.”—LUK 15:6.
1. ?Olsem wanem Jisas i soem se hem i wan man blong lukaot long sipsip we i lavem ol sipsip blong hem?
BAEBOL i talem se Jisas Kraes, stret Pikinini blong Jeova, hem nao i ‘nambawan man blong lukaot long ol sipsip blong God.’ (Hib. 13:20) Baebol i talemaot fastaem finis se bambae hem i kam, mo i soemaot se bambae hem i wan spesel Man blong lukaot long sipsip we i traehad blong faenem “ol sipsip [long Isrel] we oli lus.” (Mat. 2:1-6; 15:24) Mo tu, Jisas i ded blong sevem ol man we oli gat fasin olsem sipsip mo we oli bilif long sakrefaes blong hem, sem mak olsem wan man blong lukaot long ol prapa sipsip blong hem i rere blong ded blong protektem ol sipsip blong hem.—Jon 10:11, 15; 1 Jon 2:1, 2.
2. ?Wanem i save slakem wan Kristin gogo i no moa mekem wok blong God?
2 Sore tumas, samfala we fastaem i luk olsem se oli gat tangkiu from sakrefaes blong Jisas mo oli givim laef blong olgeta i go long God, oli no moa joen wetem Kristin kongregesen. Maet tingting blong olgeta i foldaon, maet oli gat problem blong helt, no wan narafala problem we i slakem olgeta gogo oli no moa mekem wok blong God. Be i nogud we oli gowe long ol sipsip blong God, from we long kongregesen nomo oli save kasem pis mo glad we Deved i tokbaot long Sam 23. Deved i singsing se: “Hae God [Jeova] i stap lukaot gud long mi olsem we mi mi sipsip blong hem, nao mi no save sot long wan samting.” (Sam 23:1) Olgeta we oli joen long kongregesen blong ol sipsip blong God oli gat evri samting we oli nidim blong stap frengud wetem God. Be ol sipsip we oli lus oli no gat ol gudfala samting ya. ?Hu i save givhan long olgeta? ?Olsem wanem blong halpem olgeta? ?Wanem samting we yumi save mekem blong halpem olgeta blong oli joen bakegen wetem ol sipsip blong God?
?Hu i Save Givhan?
3. ?I nidim wanem blong halpem ol sipsip blong God we oli lus, mo olsem wanem Jisas i soemaot samting ya?
3 I nidim bigfala traehad blong halpem ol sipsip blong God we oli lus. (Sam 100:3) Jisas i talem wan pijatok blong soem samting ya, i se: “?Sipos wan man i gat handred sipsip blong hem, nao wan long olgeta i go lus, bambae man ya i mekem olsem wanem? Bambae hem i mas livim ol naenti naen sipsip ya oli stap kakae gras long saed blong hil, nao i go lukaot hemia we i lus. Tru mi talem long yufala, taem we hem i faenem sipsip ya, bambae hem i save glad moa long hem, i winim we hem i glad long ol narafala naenti naen sipsip ya blong hem we oli no lus. Mo long sem fasin, Papa blong yufala long heven, hem i no wantem we bambae wan long ol pikinini ya i lus.” (Mat. 18:12-14) ?Hu i save givhan long ol sipsip blong God we oli no moa joen wetem kongregesen?
4, 5. ?Ol elda oli mas gat wanem tingting long ol sipsip blong God?
4 Blong ol Kristin elda oli save halpem ol sipsip we oli lus, oli mas tingbaot oltaem se ol sipsip blong God oli wan kongregesen blong ol man we oli givim laef blong olgeta i go long Jeova. Yes, ‘ol sipsip ya blong God’ oli sas long ae blong hem. (Sam 79:13) Ol gudfala sipsip ya oli nidim we narafala i lukaot long olgeta long kaen fasin. Hemia i min se ol man blong lukaot long ol sipsip blong God we oli gat lav, oli mas intres long wanwan long ol sipsip ya. Sipos oli visitim ol sipsip mo storian gud blong leftemap tingting blong olgeta, samting ya i save karem gudfala frut. Ol tok blong leftemap tingting we man blong lukaot long ol sipsip blong God i talem wetem lav, i save halpem ol sipsip ya blong frengud wetem God bakegen, mo i save mekem se oli wantem kam joen bakegen wetem ol narafala sipsip.—1 Kor. 8:1.
5 Wan wok blong ol man blong lukaot long ol sipsip blong God, i blong faenem ol sipsip we oli lus mo traem halpem olgeta. Aposol Pol i mekem ol Kristin elda long kongregesen blong Efesas bifo oli tingbaot wok blong olgeta blong lukaot long ol sipsip blong God, i se: ‘Yufala i mas lukaot gud long yufala, mo long ol man ya we tabu spirit i putum olgeta oli stap finis long han blong yufala. Yufala i mas lukaot long ol man blong [“kongregesen,” NW] blong God, olsem we man blong lukaot long sipsip i stap lukaot long ol sipsip blong hem. Yufala i mas mekem olsem, from we God i pemaot ol man ya finis long blad blong Pikinini blong hem.’ (Wok 20:28) Long sem fasin, aposol Pita i givim advaes long ol elda we tabu spirit i makemaot olgeta, se: “Yufala i mas lukaot gud long ol man we God i givim long yufala, olsem we man blong lukaot long sipsip i stap lukaot gud long ol sipsip blong hem. Yufala i mas lukaot gud long olgeta, we tingting blong yufala i glad blong mekem, olsem we God i wantem. I nogud yufala i mekem blong kasem pei . . . Yufala i mas mekem from we yufala i glad long hem. Bambae yufala i no kam olsem bigfala masta blong olgeta ya we God i putum olgeta long han blong yufala. Yufala i mas soemaot ol stret fasin long ol man blong yufala, blong oli save folem, olsem we ol sipsip oli folem man blong lukaot long olgeta.”—1 Pita 5:1-3.
6. ?From wanem ol sipsip blong God tede oli nidim moa we ol elda oli lukaot gud long olgeta?
6 Ol Kristin man blong lukaot long ol sipsip blong God oli mas folem fasin blong Jisas we hem i “gudfala man ya blong lukaot long sipsip.” (Jon 10:11) Hem i wari bigwan long ol sipsip blong God. Taem hem i talem long Saemon Pita blong ‘lukaot gud long ol sipsip blong hem,’ hem i soemaot klia se wok ya i impoten. (Ridim Jon 21:15-17.) Tede ol sipsip ya oli nidim moa we ol elda oli lukaot gud long olgeta, from we Setan i strong moa blong traem mekem ol man blong God oli foldaon. Setan i stap yusum ol slak fasin blong ol sipsip blong Jeova, mo hem i yusum wol ya tu, blong traem lidim olgeta blong mekem samting we i no stret. (1 Jon 2:15-17; 5:19) Olgeta we oli no moa mekem wok blong God, oli stap long denja moai bitim ol narafala. Taswe oli nidim help blong oli save folem advaes ya blong ‘letem tabu spirit i lidim olgeta.’ (Gal. 5:16-21, 25) Blong givhan long olgeta, ol elda oli mas prea oltaem blong askem God blong givim tabu spirit blong lidim olgeta. Mo oli mas savegud Tok blong God, blong oli save yusum ol vas we oli stret blong halpem ol sipsip ya.—Prov. 3:5, 6; Luk 11:13; Hib. 4:12.
7. ?Fasin we ol elda oli mekem blong lukaot gud long ol sipsip we God i putum long han blong olgeta, i rili impoten?
7 Long Isrel bifo, ol man blong lukaot long sipsip oli holem wan wokingstik we en blong hem i tanem olsem wan huk, mo oli yusum stik ya blong lidim ol sipsip. Taem ol sipsip oli stap kam insaed long yad mo goaot, oli pas aninit long wokingstik blong man blong lukaot long olgeta, blong hem i kaontem olgeta. (Lev. 27:32; Maeka 2:12; 7:14) Sem mak long ol Kristin man blong lukaot long ol sipsip blong God. Oli mas save ol sipsip we God i putum long han blong olgeta mo oli mas save sipos wanwan long olgeta oli stap gohed gud no nogat. (Skelem Ol Proveb 27:23, NW.) Taswe, wok ya blong lukaot gud long ol sipsip blong God, hemia wan long ol impoten wok we ol elda oli tokbaot taem oli miting tugeta. Long ol storian blong olgeta, oli mekem plan blong givhan long ol sipsip we oli lus. Jeova i talem se hem wan bambae i faenem ol sipsip blong hem mo lukaot gud long olgeta olsem oli nidim. (Esik. 34:11) Taswe God i glad taem ol elda oli folem fasin ya blong hem blong traem faenem ol sipsip we oli lus, mo givhan long olgeta blong joen bakegen wetem kongregesen.
8. ?Olsem wanem ol elda oli save givhan long wan sipsip we i lus?
8 Taem wan Kristin i sik long saed blong bodi nao wan elda i go luk hem, hemia i save leftemap tingting blong sikman ya mo mekem hem i glad. Sem mak taem ol elda oli go luk wan Kristin we hem i slak long saed blong bilif. Maet oli ridim sam vas blong Baebol long hem, tokbaot wan magasin, tokbaot ol bigfala poen long wan miting, prea wetem hem, mo mekem sam narafala samting olsem. Oli save talem long hem se olgeta long kongregesen bambae oli glad tumas blong luk hem bakegen long ol miting. (2 Kor. 1:3-7; Jem. 5:13-15) !Sipos oli visitim hem, toktok long hem long telefon, no raetem wan leta long hem, samting ya i save gat bigfala paoa long hem! Mo tu, Kristin elda we i sore long sipsip ya we i lus mo i traehad blong halpem hem, bambae hem i kasem bigfala glad from.
Yumi Evriwan i Save Givhan
9, 10. ?From wanem i no ol elda nomo we oli mas soemaot se oli wari long ol sipsip we oli lus?
9 Yumi evriwan i bisi, mo yumi stap long wan taem we laef i had. Taswe, maet yumi no luksave se sloslo wan Kristin brata no sista i stap lus long kongregesen. (Hib. 2:1) Be ol sipsip ya oli ol gudgudfala samting long ae blong Jeova. Wanwan long olgeta oli impoten, olsem we ol wanwan haf blong bodi blong yumi oli impoten. Taswe, yumi evriwan i mas soem se yumi tingbaot ol brata sista blong yumi mo yumi rili kea long olgeta. (1 Kor. 12:25) ?Olsem wanem? ?Yu yu gat tingting olsem?
10 I tru se ol elda nao oli lidim wok ya blong faenem ol sipsip we oli lus mo givhan long olgeta. Be i no ol Kristin elda nomo we oli mas soemaot se oli wari long ol sipsip ya. Ol narafala oli save wokgud wetem ol elda blong halpem ol sipsip we oli lus. Yumi evriwan i save leftemap tingting mo givhan long ol Kristin brata sista blong yumi we oli nidim help blong joen bakegen long kongregesen, mo yumi mas mekem olsem. ?Olsem wanem yumi save givhan long olgeta?
11, 12. ?Wanem janis we maet yu kasem blong givhan long wan Kristin we i nidim help?
11 Maet ol elda oli mekem plan se wan pablisa we i strong long wok blong Kingdom i mekem Baebol stadi wetem wan sipsip we i askem help from we hem i no moa mekem wok blong God. Plan ya i blong halpem olgeta we oli kam slak, blong oli lavem God bakegen ‘olsem we oli lavem hem fastaem.’ (Rev. 2:1, 4) Blong leftemap tingting blong ol Kristin ya mo halpem olgeta blong kam strong bakegen, ol pablisa oli save tokbaot ol save we ol Kristin ya oli mestem taem oli no moa joen wetem kongregesen.
12 Sipos ol elda oli askem long yu blong stadi wetem wan Kristin we i nidim help blong kam strong bakegen, yu mas prea long Jeova blong askem hem blong lidim yu mo blesem ol traehad blong yu. Yes, “sipos yu askem long Hae God blong i lukluk gud long ol plan blong yu, wok blong yu bambae i save gohed gud.” (Prov. 16:3) Yu mas tingting dip long sam vas blong Baebol mo sam save we i save mekem bilif i strong, nao yu save yusum ol samting ya taem yu stadi wetem hemia we i nidim help. Yu save tingting dip tu long nambawan eksampol blong aposol Pol. (Ridim Rom 1:11, 12.) Pol i wantem tumas blong luk ol Kristin long Rom, blong hem i givhan long olgeta blong kasem paoa blong tabu spirit mo kam strong long bilif. Hem i wantem tu we olgeta oli leftemap tingting mo bilif blong hem. Hemia nao tingting we yumi mas gat taem yumi traehad blong givhan long wan sipsip blong God we i lus.
13. ?Yu save tokbaot wanem wetem wan Kristin we i no moa joen long wok blong Jeova?
13 Taem yu stadi wetem Kristin ya, yu save askem se, “?Olsem wanem yu yu bin kasem trutok fastaem?” Yu save givhan long hem blong tingting bak long ol gudfala taem we oli bin givim glad long hem long wok blong Jeova. Yu save pulum hem blong tokbaot olsem wanem hem i bin harem gud bifo, taem hem i bin go long ol miting, long wok blong prij, mo long ol asembli. Yu save tokbaot gudfala taem we maet yu mo hem yutufala i bin joen tugeta blong mekem wok blong Jeova. Yu save tokbaot olsem wanem yu yu glad tumas blong stap klosap long Jeova. (Jem. 4:8) Soemaot tangkiu we yu yu gat from fasin blong God blong givim ol samting we ol man blong Hem oli nidim. Antap moa, soemaot tangkiu we yu yu gat from we taem yu kasem trabol, God i givhan long yu blong yu harem gud bakegen mo putum tingting blong yu long ol gudfala promes blong hem.—Rom 15:4; 2 Kor. 1:3, 4.
14, 15. ?I gud blong pulum ol Kristin we oli no moa mekem wok blong Jeova blong oli tingting bak long wanem blesing we oli bin haremgud long hem?
14 Ating i gud blong pulum tingting blong Kristin ya i gobak long sam blesing we hem i bin kasem taem hem i joen fulwan long kongregesen. Wan long ol blesing ya, se hem i kasem ol niufala save oltaem long Tok blong God mo long saed blong ol plan blong hem. (Prov. 4:18) Ating hem i luksave se taem hem i bin ‘letem tabu spirit i lidim hem,’ i isi moa long hem blong blokem ol samting we oli save pulum hem blong foldaon long sin. (Gal. 5:22-26) From samting ya, tingting blong hem i bin klin long fes blong God, nao hem i glad blong toktok long Jeova long prea. Mo tu, hem i harem gud long ‘pis we God i givim, we i bigfala moa, i bitim save blong yumi, we hem i putum long tingting blong yumi blong lukaot gud long yumi.’ (Fil. 4:6, 7) I gud yu holem ol advaes ya long tingting blong yu, yu soem se yu rili intres long Kristin brata no sista blong yu, mo plis, toktok wetem lav blong leftemap tingting blong hem blong i kambak long kongregesen.—Ridim Filipae 2:4.
15 Maet yu yu wan elda we yu go blong visitim wan Kristin brata wetem woman blong hem we tufala i no moa mekem wok blong Jeova. Maet yu pulum tufala blong tingting bak long taem ya we tufala i jes kasem save long trutok blong Baebol. !Ating tufala i bin ting se trutok i gud we i gud, i no strong tumas, i givim ol save blong God we tufala i nidim, mo i mekem tufala i harem se tufala i friman! (Jon 8:32) !Ating tufala i bin harem se hat blong tufala i fulap long tangkiu from ol samting we tufala i lanem long saed blong Jeova, lav blong hem, mo ol nambawan plan blong hem! (Skelem Luk 24:32.) I gud yu mekem tufala i tingbaot gudfala fasin fren wetem Jeova mo nambawan blesing blong prea we ol Kristin we oli givim laef blong olgeta i go long God finis, oli gat. Traehad fulwan blong leftemap tingting blong olgeta we oli no moa mekem wok blong God, blong oli obei bakegen long ‘gud nius blong God ya we i stap harem gud oltaem,’ Jeova.—1 Tim. 1:11.
Gohed Blong Soem Se Yu Lavem Olgeta
16. Talem wan eksampol we i soem se ol traehad blong halpem olgeta we oli no moa mekem wok blong Jeova oli karem frut.
16 ?Olsem wanem? ?Ol advaes we yumi tokbaot finis, oli rili wok? Yes. Tingbaot wan yangfala we hem i kam wan pablisa blong Kingdom taem hem i gat 12 yia. Taem hem i gat 15 yia, hem i kam slak, be biaen, hem i joen bakegen long wok ya. Naoia hem i mekem wok blong prij fultaem blong 30 yia finis. Bigfala samting we i halpem hem blong kam strong bakegen, hemia help we wan Kristin elda i givim long hem. !Hem i gat bigfala tangkiu from help ya we hem i kasem!
17, 18. ?Wanem ol fasin we bambae oli givhan long yu blong halpem wan sipsip blong God we i lus?
17 Lav nao i pulum ol Kristin blong givhan long olgeta we oli no moa mekem wok blong Jeova, blong oli joen bakegen long kongregesen. Jisas i talem long ol man we oli folem hem se: “Mi mi givim wan niufala loa long yufala se, ‘Yufala i mas lavlavem yufala.’ Olsem we mi mi lavem yufala, ale long sem fasin, yufala i mas lavlavem yufala. Nao from we yufala i stap lavlavem yufala, bambae olgeta man oli luksave se yufala i man blong mi.” (Jon 13:34, 35) Yes, lav nao hem i fasin we i makemaot ol trufala Kristin. ?Yu ting se i stret blong soem lav ya tu long ol Kristin we oli baptaes finis be oli kam slak blong mekem wok blong God? !Yes yumi mas! Be taem yumi stap givhan long olgeta, yumi mas gat plante gudfala Kristin fasin.
18 ?Sipos yu wantem halpem wan sipsip blong God we i lus, wanem ol fasin we maet yu nidim? Yu nidim lav, mo antap long hemia, ating bambae yu nidim sore, kaen fasin, kwaet fasin, mo longfala tingting. Maet yu nidim blong fogivim hem tu, sipos hemia i stret long samting we i bin hapen. Pol i raetem se: “Yufala i mas gat sore long ol man mo yufala i mas mekem i gud long olgeta. Tingting blong yufala i mas stap daon, mo yufala i mas kwaet man, mo tingting blong yufala i mas longfala. Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we [“Jeova,” NW] i fogivim yumi. Mo wetem ol fasin ya, yufala i mas lavem ol man, from we fasin ya blong lavem man, hem i save joenemgud olgeta samting, blong oli kam wan.”—Kol. 3:12-14.
19. ?From wanem i no blong nating nomo we yumi traehad blong halpem ol Kristin blong oli joen bakegen long kongregesen?
19 Nekis stadi bambae i tokbaot risen from wanem sam sipsip blong God oli lus. Bambae stadi ya i soemaot tu olsem wanem yumi mas mekem long olgeta we oli joen bakegen long kongregesen. Taem yu stadi long nekis haf mo tingting bak long stadi ya, yu save gat strong tingting se hadwok blong yu blong traem halpem ol Kristin blong oli joen bakegen wetem kongregesen, i no blong nating nomo. Long wol ya, plante man oli spenem ful laef blong olgeta blong wokhad blong hivimap mane nomo. Be laef blong wan sipsip blong God i sas moa i bitim olgeta mane long wol. Jisas i soemaot samting ya long pijatok blong hem long saed blong sipsip ya we i lus. (Mat. 18:12-14) I gud yu no fogetem impoten poen ya, taem yu traehad blong halpem ol gudfala sipsip blong Jeova we oli lus, blong oli hareap blong joen bakegen long kongregesen.
?Bambae Yu Yu Ansa Olsem Wanem?
• ?Wanem wok we ol Kristin man blong lukaot long ol sipsip blong God oli gat long saed blong ol sipsip we oli lus?
• ?Yu yu save mekem wanem blong givhan long olgeta we oli no moa joen long kongregesen?
• ?Wanem ol fasin we oli save halpem yu blong givhan long ol sipsip we oli lus?
[Kwestin]
[Tok blong pija long pej 15]
Ol Kristin man blong lukaot long ol sipsip blong God oli traehad wetem lav blong halpem ol sipsip we oli lus