?Yumi Kam Wea?

?FROM WANEM I IMPOTEN BLONG FAENEMAOT ANSA? Plante man oli kasem tijing ya se laef long wol ya i kamaot olsem nomo mo oli lanem se laef i kamaot long evolusen, hemia i min se sam samting i joen wetem ol gas we oli stap raonabaot long wol, nao laef i stat long wan smol samting mo i jenis gogo i kam wan man we i gat filing, tingting, mo nid ya blong faenemaot from wanem hem i laef.

Be tingbaot samting ya. Sipos yumi rili kamaot long evolusen mo i no gat Man we i Wokem yumi, bambae yumi olsem ol pikinini we oli no gat papa mama. I min se i no gat wan man we i waes moa long yumi blong askem advaes long hem—i no gat man blong halpem yumi blong winim ol trabol we yumi fesem. Sipos i olsem, bambae yumi mas dipen nomo long waes blong man blong blokem ol man blong oli no spolem ol samting we oli stap raonabaot long yumi, blong faenem rod blong winim ol rao blong politik, mo blong givhan long yumi blong winim ol problem we yumi wanwan i fesem.

?Olsem wanem? ?Yu yu harem se yu gat pis long tingting blong yu taem yu tingbaot se i gat waes blong man nomo blong lidim yu long laef? Sipos yu ansa se no, naoia traem tingbaot sipos i gat wan man we i waes moa long yumi. ?Yu yu harem olsem wanem nao? Ating bambae yu harem gud moa long tingting blong yu mo yu luksave klia se wan man we i waes moa i wokem yumi.

Wanem We Baebol i Talem

Baebol i tijim se God nao i bin wokem ol man. Yumi no kamaot long evolusen we i no gat tingting mo filing. Defren olgeta, yumi ol pikinini blong wan Papa we i gat lav mo i waes tumas. Ridim wanem we Baebol i talem.

Jenesis 1:27. “[God] i mekem man, mo man ya i tekem fasin blong hem, i olsem hem stret. Fastaem, hem i mekem tu man nomo, wan we i man mo wan we i woman.”

Ol Sam 139:14. “Yu yu mekem mi long fasin we i narafala, mo i nambawan olgeta. Mi mi ona long yu, mo mi presem nem blong yu from. Olgeta samting we yu yu mekem oli gud we i gud tumas. Samting ya, mi mi save we mi savegud.”

Matiu 19:4-6. “?Ating yufala i no ridim tok blong Baebol? Baebol i talem se, ‘God we i mekem olgeta samting, fastaem, hem i mekem tu man nomo, wan we i man, wetem wan we i woman. Nao hem i talem se, “From samting ya, bambae man i mas aot long papa mo mama blong hem, i mas go joen wetem woman blong hem. Nao tufala bambae i kam olsem wan bodi nomo.” Mo Jisas i gohed i talem se, ‘Nao from samting ya, tufala i no moa tu, tufala i olsem wan bodi nomo. Mo from we God i joenem tufala olsem, man i no mas brekem mared blong tufala.’”

Ol Wok 17:24, 25. “God ya nao i mekem wol ya, mo olgeta samting we oli stap long hem, mo hem i Masta blong heven mo wol. Hem i no save stap long ol haos blong prea ya we yumi man, yumi wokem. I no gat wan samting nating we hem i sot long hem, we yumi man, yumi save wokem blong givim long hem, from we hem nomo i stap mekem yumi evriwan i laef, mo hem i stap givim olgeta samting long yumi.”

Revelesen 4:11. “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.”

Ansa Blong Baebol i Givim Trufala Pis Long Tingting

Taem yumi save se God nao i ‘givim nem long olgeta famle long wol,’ samting ya i save jenisim tingting we yumi gat long narafala man. (Efesas 3:15, NW) Mo tu, save ya i gat paoa long tingting we yumi gat long saed blong yumi wan mo ol problem we yumi fesem. Tingting blong yumi bambae i jenis folem ol rod ya we bambae yumi tokbaot.

Taem yumi mas mekem ol bigfala desisen, bambae yumi no wari tumas long ol defdefren tingting blong man. Be, bambae yumi trastem fulwan advaes blong Baebol. ?From wanem? From we “olgeta tok blong Baebol oli kamaot long God fastaem. . . . Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.”—2 Timoti 3:16, 17.

Yes i tru, yumi mas traehad blong mekem ol advaes blong Baebol i wok long laef blong yumi mo yumi mas bos long yumi wan. Samtaem, blong folem advaes blong Baebol yumi mas mekem samting we i defren long wanem we yumi wantem mekem. (Jenesis 8:21) Be, sipos yumi agri se Papa blong yumi long heven we i lavem yumi, hem nao i wokem yumi, ale i stret nomo  blong tingting se hem i save beswan rod blong yumi folem long laef. (Aesea 55:9) Taswe Tok blong Hem i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” (Ol Proveb 3:5, 6) Sipos yumi mekem advaes ya i wok long laef blong yumi, bambae i givhan long yumi blong sakemaot plante long ol wari we yumi gat taem yumi fesem ol problem mo taem yumi mas mekem wan desisen.

Taem ol man we oli flas from kala blong skin no kalja blong olgeta oli mekem trabol long yumi, bambae yumi no harem nogud long tingting blong yumi mo yumi no ting nating long yumi. Mo, bambae yumi no ting se yumi daon moa long narafala from we hem i blong wan defren kantri no kalja. Nogat. Defren olgeta, bambae yumi wokem wan tingting we i stret mo bambae yumi gat respek long yumi wan. ?From wanem? From we Papa blong yumi, Jeova God, hem i “stap mekem i sem mak nomo long olgeta man. . . . Sipos wan man i ona long God mo i mekem ol samting we i stret long fes blong hem, bambae God i glad long hem, i nating we hem i wan laen bong Isrel, no i kamaot long wan narafala laen olgeta.”—Ol Wok 10:34, 35.

Save ya se God i mekem i sem mak long olgeta man i givhan long yumi blong blokem fasin ya blong flas from kala no kalja blong i no spolem gudfala tingting we yumi gat long narafala. Bambae yumi kasem save se i no gat wan gudfala risen blong ting se yumi hae moa long narafala from we kala no kalja blong hem i defren. Hemia from we God “i mekem wan man nomo, nao olgeta man long wol oli kamaot long man ya, mo hem i putum olgeta oli stap long evri ples long wol.”—Ol Wok 17:26.

Yes taem yumi save se i gat wan Man we i Wokem yumi mo hem i kea long yumi, i olsem we yumi stap putum wan fandesen blong kasem trufala pis long tingting blong yumi. Be sipos yumi wantem gat pis oltaem long tingting blong yumi, yumi nidim blong save sam moa samting.